Savun thawl thar kan si (Rev. Fr. Pius Cung), January 18, 2021.

"Savun thawl thar kan si"

Thuthangtha sim tu  \Rev. Pius Kei Lian Cung

Zarhkel Zarh (2) nak, Nikhat ni

Siarding: Mk 2:18-22

          Pa le Fapa le Thiangthlarau hmin in Amen.  Bawipa pekmi damnak, hnangamnak le lungawinak   cu nan zate parah a thar in thleng hram seh. Kum 2021, Jan 18, sun hrangih thuthangtha cu Mk 2:18-22 a si. Kan ngai tlangta pei.

          Voikhat ah baptisma petu Johan thluntu pawl le Farasi mi pawl rawl an ul. Mi thenkhat pawl Jesuh hnenah an ra ih, “ziangah so baptisma petu Johan dungthluntu pawl le Farasi thluntu pawl cu rawl an ul nain, nang a lo thluntu pawl cu rawl an ulh lo?” tiah an sut. Jesuh in mopuai ih sawmmi pawlkhi rawl an ul tiin nan ruat maw? An ul lo! Mopa an hnenih a um sungah cun rawlcu an ul lo ding. Sikhalsehla an hnen ihsin mopa lak hlo a si ni a  thleng dingih cutikah rawl cu an ul ve leh ding. Angki hlun belhnak ah zo hmanin puan tharte an hmang dah lo; ziangahtile belhnak puan thar cu a com dingih hnipuan hlun sawn kha a tlek ter dingih a ong ciami kha a kau  sinsin ding. Cun sabitti thar kha savun thawl hlun sungah an than dah lo, ziangahtile sabitti thar in savun thawl hlun cu a kuai ter dingih sabit le a thawl cu an cemral ding. Curuangah sabitti thar cu savun thawl thar sungah than sawn ding a si,” tiah a ti. Kan Bawipa ih tongka a si. 

            “Savun thawl thar kan si” timi thulu hmangin, kan siarmi sungin thlarau ti rawl phun (4) hlawmaw tlang u si. 

1.: Mopa cu Jesuh a si.

            Jesuh in a mah le a mah Mopa tiah a ko aw a si. Jn 3:29 ah Tipil petu Johan khal in Jesuh cu Mopa a si thu a sim. Dungthlun tu pawl cu Mopa ih rualpi an si. Dungthluntu pawl thawn hmunkhat ah kan nih khal Mopuai ah sawmmi kan si. Mopa Jesuh thawi um tlang, nuntlang hicu mopuai tuahnak hmunih um rero a si ih nitin a nuam ringring. Mopa Jesuh hmaiah riahsia in kan um ngam ding maw? um ngam hrimhrim hlah ee. Mopa a nomnak ah nuam ve u si. Mithmai pante le thin hnangam ten Jesuh ih mopuai nitin cen rero u si. Amen.

2. Sabitti thar cu Jesuh a si.

           Jesuh ih thuzirhmi le anunzia umtudan pawlcu Judah mipi hrangah thuthar a si ih cohlan ding a har zet, an pom thei lo. Jesuh tu sawn riangri kha dan pahbal tu, dan siatsuah tu in an hmu sawn. Curuangah Jesuh ih zirhnak cu sabit ti thar a si ih cumi thannak ding ah savun thawlthar hman  a tul. Thinlung thar le thlengawknak a tul. Dungthlun tu pawl le Judah mi hrekkhat pawl cun Jesuh cu an cohlang tikah sabit thawl a thar ah an cang. 

3. Savun thawl hlun cu Judah pawl an si.

           Ahlei ce in Farasipawl, Sadusi, Danthiam upa pawl le Puithiam pawl hrangah cun Jesuh ih thuzirhmi le anunzia umtudan pawl cu thuthar a si ih an cohlang thei hrimhrim lo. Savun ih tuahmi sabit ti thawl cu kum a rei tikah a ro, a carih  a puar thei lo, a zawr thei lo. A car ngah zo ruangah pungsan thlengawk le thinawk sal a ngah nawn lo. Judah hruaitu pawlle mipi tampi khal cun Moses ih dan hrampi pawl le an nunphung ih zirhmi dan tehrek tiangin thupi tukin an pom ih malte hman thleng an duh lo. Thuthar bet khal an duh lo. Curuangah Sabath thu, Samaria thu, le rawlulh thu tivek ah Jesuh cu dan pahbal tu tin an hmu. An dan sungah Jesuh an lut ter thei lo. Dan buartu in an hmu ringring ruangah an thin lung le an nunah Jesuh le a thuzirh mi cu hmunhma a la thei lo. 

 Savun thawl hlun cu a mai pungsan teih, um kel, sikel rori in rozet, hak zet in a um tikah Sabitti thar ih khu le rimra cun a pahsuak ih kuainak le siatralnak ah a cang. Kan hrangah a va thupi ve. Thlarau nun le Biaknak hna khalah miring in One Way an tiih, kawlin talanmaung an ti theu mi, Maithu teuti ti fekfek hi, pawlkom kuainak le thinlung hmuhawk lo nak, remawk lo nak le thenthek awknak a suahpi theu. Thinlung nem le Jesuh duhdan le mi tam sawn duhdan tivek thawi atawkzawn te ih nem thei, thleng awk thei hi a thupi tuk. Pawlpi hrangah cun kan tang hnet zet ko nain nuntharnak le thlarau lam ah cun kekar karkhat tehman hmainor tum lo rori tla Krifa  kan um rero lai. Jesuh cohlang lotu lunghak Judah pawl lakah tel pang lo ding in ralring u si. 

4. Savun thawl thar cu kanmah kan si.

          Thawl thar kan si theinak thu pa (3) in thlir hnik u si. Cupawl cu;Jesuh zumtu kan si ruangah, Bawipa ih Thi le Sa Sacrament ih kan ei ngah ruangah cun Jesuh ih duhdan in thlengawthei, remaw thei kan si ruangah a si.

          Dungthluntu pawl, Judah mihrek khat pawl le kannih zumtu Krifa pawl cun Jesuh ih in zirhmi kan pom ih Amah rori khal rundamtu, kan Pathian le kan Bawipa ih kan cohlan ruangah savun thawlthar kan si. Jesuh ih pekmi rundamnak le thuthangtha cu kan thlarau hrangah Sabitti thaw bik a siih Jesuh a cohlang tu, a zumtu pawlih kan nun le kan thlarau ah thawzet in tlaizet in kan in ngah ih liam thluahthlo in Bawipa in in pek. 

          Mopa Jesuh le Monu Pawlpi ih tthitum puai, Mopuai ah cun Jesuh in a mai taksa le a thisen in rawl in do. Kanaan Mopuai laiah Jesuh in tidai cu sabitti ah a cang ter. Jesuh a mah rori Mopa a tuancan, Amai puaiah cun Sabitti cu a thisen ah a cangter a si. Bawipa thisa kan ei, kan co nak hi Sabitti thawlthar kan si nak a si. Thuphuan 19:9 ah “Tuufa nupi thitpuaiih sawmmi pawl cu mi lungawi an si” a ti. Mi lungawi le mi thluasuah kan si hi kan sungih um Jesuh thawngin a si. 

          Savun thawlthar ih thatnak cu sabitti ih duhdandan in a puar, a tum vivo thei. Sabitti a thar cu savun thawl sungah thli suak lo in kan ret tikah thawl sungah (gas) timi a khu le a thaw, a rimra, tli cu a tthang, a tam vivo. Cumi sabitti le a tli cun sunglamin a pah vivo tikah Savun thawlcu a puam, a puar ih a tthang.  Phundang in kan sim a si le savun thawl thar cun  sabit ti ih duhdandan in a thleng aw. Krifa kan rak si thok pek teih Kan nunnak le kan thlarua ih ummi Jesuh cu a thanlian vivo a tul ih, Jesuhih duhdan thlunin tthangding, tum ding, thlengaw vivo ding kan si. Kan thinlung, kan ruahnak le kan tuannak khal ah Jesuh hmin in a thar le a thlengaw mi um vivo hramseh. Cutiih Jesuh ruangih kan nun le kan lungput a thlengaw vivo, a remhaw vivo tikah Savun thawlthar kan sinak cu fiangzet in a lang ding a si. 

          “Sabitti thar cu Savun thawl thar sungah than ding a si,” Jesuh in a ti. Jesuh Krih ih nun, thu in zirhmi le a mai in pekmi a ruangpum Thile Sa cu kan thlarau le kan pumsa sungah cohlangin Bawipa hrangah Sabitti Thawlthar si cio u si. Sabiti thar Jesuh duhdan in kan nun khal rem aw in thleng aw vivo thei hramseh. Savun thawl thar, manol zet le mawinak neilote kan si konan kan sungih um Jesuh ih thlarau le a nunnak thawngin sunlawinak le cawisannak kan co a si. Maw Jesuh Bawipa, na hrangah Savun thawl thar in si ter ringring hram aw, Amen. 

Add new comment

20 + 0 =