Sersiammi tlun ih Covo le Țuanvo (sim tu - Rev. Fr. David Kap Cin Mang), February 9, 2021.

Sersiammi tlun ih Covo le Țuanvo

Thuthangtha sim tu - Rev. Fr. David Kap Cin Mang

February 9, 2021. 

Siarding: Gen 1:20-2:4; Ps 9:4-9; Mk 7:1-13.

          RVA ihsin thuthangtha a rak ngai tu duhdawtmi nulepa ulenau pawl nan zate par ah Bawipai pek mi hnangam daihnak le pumsa thlarau thinlung harhdamnak a thar in thleng hram seh ti’n cibai ka run lo buk hrih hai a si.

          Tui tum kan kawlram ih kan duh lo zet mi thil pakhat a cang mi ruangah mipi kan thin a nuam lo ih kan thinlung khal a vaivuan cio ding zum a um. Ziangkhal le, zumtu kan si vek in thil ziangkim hi Pathian ih kut sungah a um ih minung pawl ih cangvaihnak hmuahhmuah khal ah amah kan biak Pathian thotho hi thu nei tu a si timi ruahnak thawn kan kawlram thatnak ding khal hi amaih hnen ah kan thum cio pei uh ti’n ka run lo sawm a si.

          Culawng si lo in, tui tum ah mai umnak hmun cio in duhphorhnak kan tuah ih kan inn sung ih umhai khokheng pawl a siat mi tla an tam vio ding ka zum, social media par khal ah hmuh ding tampi an tarlang mi a um. Kei ka hmuhdaan ah cun kan mai um hmun te ih duh kan phorh mi hi a tha lo cu a si lo nan, kan khokheng pawl ih siatnak men lawng a si ding ka phang. Cuhnak in kan ram thatsalnak ding hrangah zumnak taktak thawn Pathian hnen ah thla cam in kan ti thei tawk te’n kan kiangkap ih ummi pawl hrangah thiltha tuah kan zuam ding hi Christian zumtu pawl ih hna tuan a si ding ti’n ka ruat. Cuti ih ka ti ruangah Christian zumtu pawl hrangah tui tum ih thilcang mi vek hi poisat a tul lo ka ti duh san si lo in, khokheng tum men fangih duhphorh tu si lo in, kan ram thatnak ding hrangah kan ti thei tawk ih kan zuam ding ka ti duhsan mi a si sawn.

          Cule tuini ih kan siarmi Cathianghlim lam ah vung kat sehla. Tuini ih kan siarmi Cathianghlim pawl cu Gen 1:20-2:4; Ps 9:4-9; Mk 7:1-13 sungta pawl an si. Tui tum ah a voi khatnak ih kan siar mi Semtirnak sungta hmang in hlawmawknak run neih ka duh.

          Tuini a voikhatnak ih kan siar mi hi mani ih kan siarmi ih peh a si ih sersiamnak thuhla pawl an si. Mani ah Fr. Pius in Pathian cu hnatuan ringring tu Pathian a sinak thu le tuini tiang khal ah kan leilungpi le a sung um mi kanmah khal in thar tersal ringring tu a sinak thu pawl fiang zet in in sim zo.

          Tuini ih kan siarmi sungah Pathian in milai a sersiamnak thu le sersiammi thil hmuahhmuah parih thuneihnak milai hnen ih a peknak thu kan thei. A hmaisa ih ruah khawm ka duh mi cu Pathian in milai a sersiam tik ah “Milai tuah thlang uh si; kanmah ih hmuihmel kengin kanmah bangin kan tuah pei” a ti (Gen 1:26). Himi kan zoh tikah Pathian hi mipum pakhat lawng um mi a si lo nak a fiang. Mipum tam a khihhmuh mi ‘KAN’ timi tongfang a hmang. Hi thu thawn pehpar aw in Bible thiam hrekkhat cun Pathian in ‘kan’ a timi hi amah hnatuan bawmtu Vancungmi pawl a ti duhsan a si ti’n an sim. Asinain, Pathian in a Vancungmi pawl hi sersiamtu dinhmun ah a telh pei maw timi ruah ding a um. Curuangah Bible thiam midang pawl cun hitawk zawn ih Pathian in “Kan” a timi hin a Pathian sinak ah mipum pakhat lawng a si lo timi a khihhmuh ti’n an pom. 

          Mani ih kan siarmi Gen 1:2 sungah Pathian ih Thlarau cu tipi parah a leng a ti. Cuihsin Pathian in milai lo a dang thil hmuahhmuah hi ‘um seh’ timi tongkam thawngin a sersiam mi a si.  Curuangah Pathian ih sersiamnak a tuah thok in Thlarau le Tongkam an um zo ti cu a fiang. Hi thu a hmu fiang tu Johan in Gospel thuthangtha a ngan tikah a hram thok ihsin Tongkam a rak um ih cuih Tongkam cu Pathian thawn an um ih amah khal Pathian a si; cule cuih Tongkam cu minung ah a cang ih kan lak ah a um zo ti’n Jn 1:1-18 sungah fiang zet in in sim. Tulai san ah Christian zumtu ka si a ti nain, thumkom Pathian a zum lo le a pom lo tu kanmah laimi lak hman ah an rak um ih a poi ngaingai. Thungai te ih Bible kan zoh tik ah kan biak Pathian cu a Pathian sinak ah Pa le Fapa le Thiang Thlarau ti’n mipum pathum thawn kom khawm mi a sinak thu tampi hmuh theih a si. Kan Bawipa Jesuh Khrih rori hman in a thuzirhmi a zum ih a thlun tu pawl cu Pa le Fapa le Thiang Thlarau hmin in Baptism pe dingah a Dungthluntu pawl a rak cah a si(Mt 28:19). Culawng silo in Pathian ih sersiamnak a rak tuah thok ihsin Pathian ih thlarau a simi Thiang Thlarau le a tongkam a simi Fapa Jesuh khal an tel zo timi hi mani le tuini ih kan siar mi Cathianghlim sungah fiang zet in kan hmu thei.

          Cule a pahnihnak ih ruah khawm ding ka duh mi cu Pathian in milai hnen ah sersiammi thil dang pawl parih thuneihnak a pek mi hi a si. Pathian in milai a sersiam tikah amaih hmuihmel kengih a sersiam lawng silo in thuneihnak tiang in a tawm a si. Leilung par ih thil ziangkim hi milai thathnem pi dingih tuah mi lawnglawng an si. Cun, hi thuneihnak thawn kop in ziang a ra ti a si le kilkhawi ding tuanvo a si. Hi tuanvo hi mirang cun “stewardship” ti’n kan ko ih Pope John Paul II san lai ihsin leitlun mi pawl in kan leilungpi le a sung um thilri pawl hi kan duhduh in kan hmang nain a kilhim ding le a kilkhawi ding tuanvo hmuah zo hman in ziang ih kan rel lo ruangah kan leilungpi a siat deuhdeuh nak thu pawl ralrinnak in rak pe rero zo. 

          Tuih in hruaitu kan Pope Francis khal in 2015 kum ah “Laudato Si” timi thulu thawn zirhnak cabu pakhat a suah. Cumi cu leilungpi kilhim ding thu thawn pehpar aw mi zirhnak a si ih, leitlun ram uktu pawl le leilungpi kilhim ding thu thawn pehpar in fimthiamnak a zirhtu pawl ih an sirhsan theumi zirhnak cabu pakhat khal a si. A san ih zir in Bible thawn kaih ih zirh awk nak pakhat khal a si. 

          Curuangah tulai san ih Christian zumtu pawl ih tuanvo tum bik pakhat cu kan leilungpi le kiangkap kilhim ding hi a si thlang. Kan ram uktu pawl ih thatlonak ruangah kan ram ah thingkung thatha pawl an cem ih ruah dongtu le khawltu tupi pawl an um nawn lo tikah kan ram a car sinsin. Khat lei lamah ram thangso pawl ih cetzung ihsin meikhu suak mi ruangah thli a bal ih natnak a phunphun a karh lawng si lo in plastic pawl tha teih kan hlon/ur lo ruangah kan kiangkap a bal ih ramnung pawl an hloral deuhdeuh. 

          Leilungpi le a sungum thil hmuahhmuah hi kan duh tawk ih hmang dingah Pathian in thuneihnak cu in pe ko nain, a kilhim ding tuanvo kan neihmi ziang ih kan siar lo a si  ahcun rei in awh lo dingih kanmaih hrangah thatnak lam hnakin siatnak lam khal ah in thlenpi thei a si. Kan tik le cu a that nawn lo khal hi milai pawl in kan tuanvo ziangih kan rel lo ruangah a si bik timi mifim tampi in an hmufiang zo.

          Nang le kei khal Christian zumtu kan si; Pathian lam ah kan zuam zet kan ti rero nain kiangkap kilhim ding lam ah ziang rel lo ih kan um a si pangah cun tuini Gospel kan siarmi sungih kan Bawipa in ‘an hmurka lawng in in biak ih an thinlung cu keimah thawn an hla ngaingai’ tiih Farasi pawl a ti san vek tla kan hluan pang ding. 

          Covo le tuanvo thei tu zumtu tha si cio dingah Bawipa in thluasuah in pe cio hram seh. Amen.