Simeon vek in thih na ngam zo maw (sim tu Rev. Fr. David Mangte), December 29, 2020.

Simeon vek in thih na ngam zo maw?

Thuthangtha sim tu Rev. Fr. David Mangte

December 29, 2020.

Siarding: 1 Jn. 2: 3-11; Lk 2:22-35

          RVA ihsin thuthangtha a rak ngaitu hmuntin ih um mi duhdawtmi nulepa ulenau pawl nan zate hnen ah Christmas thluasuah phunkim thleng hram seh ti’n thlaza cam phah in cibai ka run lo buk hai a si.

Tuini cun December 29 kan thlengthlang ih Christmas Octave kan timi caan sunglawi sungih a ni 5nak khal a si thlang a si. Tuitum Christmas ih thluasuah kan co mi le kan lungawinak pawl hin hmai kum thar sung hmuahhmuah a daih ding khal ka beisei a si. 

          Tuini ih Gospel kan siarmi cu Lk 2:22-35 sungta a si ih Mary le Joseph in naute Jesuh Biakinnpi ih an apnak thuhla a si. Himi thu in Bawi Jesuh ih nulepa hi biaknak lam ih a zuam zet mi an si zia le Pathian thu fel zet ih a thlun tu an si zia a lang ter. Ziangahtile, Lv 12:2-8 sungih Moses ih daan rak pek mi vek in naute Jesuh ih nu Mary thianfainak  dingah biakinn ih a ra mi an si lawng silo in, Ex 13:2, 12 sungih fatir mipa hmuahhmuah Pathian hnen ih hlan ding timi daan thlun rero khal an si. 

          Hitawk zawnte ah Mary le Joseph ih nun in thil tha zet pakhat in zirh mi a um. An pahnih in naute Jesuh hi Pathian Fapa a si ti an thei ko nan, “Pathian Fapa a si ko sisi, amah Pathian in kilkhawi men seh, Moses ih pekmi daan pawl thlun rero tla a tul lo pi” ti’n an daithlang men lo. Pathian Fapa a simi naute Jesuh parah nulepa tuanvo a famkim thei patawp in an la ih anmaih nun rori hmang in Pathian ih duh zawngih nungtu si dingah an zirh a si. Kan Bawipa Jesuh Khrih khal in a nulepa ih thu ngai in a Pa Pathian ih duh zawngih nung dingah a zir ve ti’n kan Bible in in simfiang a si. Kannih Christian zumtu nulepa pawl khal in fate kan neih mi pawl hi Pathian ih in pek mi sisi, amah Pathian in kaihruai men seh ti hrawnghrang in nunsim le nun zirh tum lo ih kan um cun a poi ngaingai ding. Kan Bawipa hman khi Joseph le Mary ih thu ngai in so khaw Pathian ih duhnak a rak zir hmaisa. Joseph le Mary te khal in Pathian duhnak vek in nun zirh an rak zuam ve. 

           Cule Jesuh, Mary Joseph tei innsungsang biakinn ih an feh tikah lungawinak thawn a rak khat ngah tu cu Simeon le nuhmeinu Anna te an si. Hite pahnih ih lungawinak kan zoh tikah an rak hngahhlap zet mi Pathian ih thukam mi a famkimnak an hmuh ngah ruangah a si. 

          Kan duh zet mi kan par ih thukam mi pakhatkhat reipi a hngak dah tu cun Simeon le Anna teih thinlung sungih ummi kan theihthiam sak ko ding ka zum. Kan duh zet mi, a silole, kan hngahhlap zet mi thil pakhatkhat caan reipi hngak tahrat ih kan parih a ra thlen ngaingai tikah kan thinlung ziangti’n a um timi a tong dah tu pawl cun kan thei cio ko. Video sungih kan hmuh theu mi cu tlangval pakhatkhat in a falanu hnen ihsin a phi a dil mi hi cutik ni ah ka lo pek ding a rak ti tikah cuih ni a thlen zangzang ding a hngahhlap zia hi nasa tak in an lang ter theu. Tuini gospel kan siarmi sungih Simeon le Anna khal cu cuti vek cekci an si.

          Tlangval pa in a duh zet mi fala hnen ihsin a phi a ngah hlan lo a duhzulh ih nundaan tha thawn a hngah rero vek in Simeon le Anna khal cun Bawipai thukammi a kim ding ni cu an nun rori in an rak hngakhlap ve. Cucu ziangti’n an lang ter ti a sile biakinn ah thlacam in caan an hmang ringring a si. Anna sinsin tla cu thlacam lawng si lo in rawl khal ul rero tiang in a hngak ti a si. Cuti ih an hngah ruangah kan Bawipa a rat taktak khal ah an rak hmuh ngah lawng silo in an rak thei ngah a si. Cuih an hmuhnak le an theihnak cun lungawinak in a khat ter ih thih khal an poi sa nawn lo. Curuangah Simeon in verse 29 sungah na salpa cu dai te’n na cawl ter thei zo a si ti rori’n Pathian par ah a lungawinak a rak lang ter. 

          Tuini ah zumtu nang le kei teh von cek aw hnik sehla, Immanuel Pathian a simi runtu Messiah ih suahnak puai kan theh ngah zo si khaw, in umpitu Pathian a sinak hi kan tep taktak maw? Simeon vekin thih ngamthlak tiang hnangam lungawinak kan hmu zo maw? Pathian ih umpi nak kan tep ngaingai lo a si ahcun hnangam daihnak le lungawinak khal kan co thei lo ding. Cuti vek co thei lo ih in kham tu teh ziang ha a si ding? Mani kan siarmi sungih kan hmuhmi siangpahrang Herod vek fangih iksiknak le tihphannak thawn Jesuh Khrih hawltu kan si pang maw?

          Tuini a voikhatnak ih kan siarmi 1Jn 2:3-11 sungah Immanuel Pathian a thei taktak tu cun a thukham khal an thlun ih tleunak sungah an um ti’n in zirh. Cuih tleunak sungih a um taktak tu cun huatnak nei lo in dudawtnak thawn a khat a ti. Cuih thukham a timi cu dudawtnak hi a si mai. Duhdawtnak nei lo ih Pathian kan thei kan ti a si ahcun thuphan per kan si ti’n Johan in in zirh. Curuangah Immanuel Pathian ih umpinak a tep ngahtu le amah a thei ngahtu kan si ih cuih kan theihnak hi duhdawtnak thawn a lang ter tu si thei dingah Bawipa in thluasuah in pe cio hram seh law. Amen.