Sitawp in si lemah - sim tu Rev. Fr. Joseph Ro Nei Thang (July 16, 2021)

Sitawp in si lemah

Thuthangtha sim tu Rev. Fr. Joseph Ro Nei Thang

July 16, 2021

Siarding: Suah 11:10-12:14; Saam 116: 12-13, 15-18; Mt 12:1-8

            Radio Veritas Asia Falam Chin service ah leitlun hmun tinkip ihsin thlarau rawl a zawh ringringtu Bawi Khrih ah duhdawt zetmi nu le pa, u le nau pawl, “Bawipa cu nanmah thawn um sehlaw” tiah cibai ka run lo buk. Tuihni cu 2021, July thla ni 16, Caankeel kaar 15 nak, tlawngkai ni 5 ni asi. Tuihni ih kan siar dingmi cu Suahlannak 11:10-12:14 tiang pawl ansi pei ih Thuthang ttha ahcun Mt 12:1-8 tiang pawl tla ansi pei. Tuihni ih kan ruah khawm dingmi cu “si tawpin si lem lawn” tiah asi pei. 

            Cumi kan ruah hlanah tuihni kan siarmi thuthang ttha hi siar hmaisa uhsi. Mt 12:1-8 ah Cuih hnu reilote ah Zarhpini ah Jesuh cu sangvut lo lakin a feh. A dungthluntu pawl an ril an rawn ruangah sangvut an zuutih a fang kha an ei. Cumi kha Farasi pawlin an hmu tikah Jesuh hnenah “Zoh hnik, na dungthluntu pawlin Zarhpini ah hitin an tuah hi daan an buar asi” tiah anti. Jesuh in an hnenah “David le a rualpi pawl an ril a rawn laiah David in ziang a rak tuah ti kha nan siar dahlo maw? David cu Pathian ih inn sungah a lutih Pathian hnenih pekmi sangreu cu a rualpi pawl thawn an ei asi kha! Cutiih an ei cu daan ih duhlomi asi; ziangahtile a cuih sangreu cu puithiam pawl lawng ih ei theimi sangreu asi. Cuih tlun ah Zarhpini tintein biakinn sungah puithiam pawlin Zarhpini daan an buar ringring ti kha Moses ih daan sungah nan siar dahlo maw? Asinain misual ah ruah ansi uallo. Thungaiin ka lo sim, ‘ttilva thawn raithawinak silo in mizaangfahnak sawn ka duh asi’ tiah a timi hi a tican ngaingai thei ngah uhla a suallomi pawl kha nan sual asi tiin nan ti lo ding. Ziangahtile mifapa hi Zarhpini tlun ih Bawi asi” tiah ati, tiin kan siar thei asi. 

            Duhdawtmi nu le pa, u le nau pawl, Bawipa Jesuh sanah Israel miphun pawl le Judah miphun pawlin Moses ih pekmi daan pawl le Pathian ih thukham pawl hi ziangtin an cohlangih ziangtin an thlun ttheu timi pawl hi kan thei a ttul zet asi. Pathian ih thukham pathumnak ah “Pathian ih ni cu nan ulh pei” tiah ulh dingin le thianhlimter dingin Pathian in Moses hnenah thu a pek asi. Neta ah Pathian ih pekmi thukham cu an karh vivo ih tuihni kan siarmi thuthang ttha sungih Jesuh Khrih le a dungthluntu pawl, Zarhpini ih khual tlawng rengreng hi sual asi zo. Sangvut an nuai ih an ei rengreng tla sualnak asi tiah an hmu asi. U le nau pawl, Judah pawl le Israel pawlin Bawipa Jesuh sanah Zarhpini ah thilrit phur theilo, khai theilo anti asi. Cun arti hawng tlukih a ritmi cu ngaidam a um nain haa ttuh a tum deuh hmantu pawl hrang ahcun poi mawh a um zo anti asi. Bawipa Jesuh ih Dung thluntu pawlin sangvut kha an zuut ih an nuai ih a fang kha an einak hi daan pathum an buar asi tiah anti. Sangvut an zuutnak thawngin fang-aatnak sual an tuah; an kut in sangvut vui an nuainak thawngin fanghum cilnak sual an tuah; cu an nuai ttheh hnu ah sangvut hi le a fang an thleidannak thawngin rawl tim tuahnak sual an tuah asi tiah mawh an thluk hi asi.

            Farasi pawl le daan thiam saya pawlin daan cu fek zetin an thlunih anmah vekin daan a thlun theilotu pawl cu misual ah an rel asi. A tifekfek mi Farasi pawl tla cu an roh sinsin lai. Annih in khual tlawng tum, thil zuar tum, thil lei tum, tidai khai tum, thilri phur tum, hnattuan fate ttuan tum hman ah sualnak a si zo anti asi. Tum menmen tla a ngah lo anti asi. Zarhpini ih in le ei dingmi pawl hi Zarhte ni ah tuah cia ttheptthep an ttul asi. Zarhpini ah mah ih inn ah siseh, hmun dang ah siseh hna a ttuantu, khual a tlawngtu, lo a thlotu, meisa a urtu, meisa a muahtu, ran-nung a totu, ran-nung a thahtu, ran-nung a dawi tu, thang a kamtu, nga a sio tu le sur a vorhtu pohpoh cu thihpi tlak sualnak a tuahtu ansiih thah ding asi tiah anti asi. Pathian ih thukham cu elh thei ci silo in thlun ding hrimhrim asi, ziang hman khami ruangah khimi ruang ah tiah a kyaungpyiah a ngahlo asi tiah fek zetin an pom an zirh asi. Bible ih sullam tla an ruat nawnlo. Zaangfahnak le duhdawtnak tla an ruat ban nawnlo ansi.

            Duhdawtmi u le nau pawl, Pathian thukham, Kohhran ih thukham, rampi ih daan le Kohhran ih zirhmi pawl hi a cang thei tawkin thlun ding kan si asi. Kan thlun tikah a thupi bikmi cu duhdawtnak asi. Duhdawtnak cu thukham asilole daan ih tlun ah a um. Curuangah Rome 13:10 ah “Duhdawtnak cu daan famkim nak asi” tiah in ti asi. Duhdawtnak kan nei poh ahcun daan cu famkim tein kan thlun cia ti duhnak asi. Duhdawtnak ah zaangfahnak, zawnruahnak, tangdornak, thungainak, rian awknak, thinlung tthatnak, thinsaunak, thinlung supnak, mah le mah uk theinak, mi bawm duhnak timi pawl hi an tel thluh asi. 

            Curuangah u le nau pawl, daan umlomi duhdawtnak cu siatsuahnak asiih duhdawtnak umlomi daan cu hrangnak asi. Hrangnak timi cu ciannak asi. Ciannak timi cu lal duhnak le mah lawng si tawp duhnak pawl ansiih Farasi pawlih ziaza ansi asi. Duhdawtnak kan nei nain daan kan neilo lala tla thil poi pakhat asi. Fa le nau pawl kan duhdawt tuk ruangah daan kan ret saklo, siikaan kan tuah saklo asi ahcun kan fa le nau pawl kan siatsuah rero asi. Fala tlangval pawl an ngai awk nain siikaan an neilo ahcun mualphonak lakfa tiang hmanah tiah asi. Duhdawh tuk ruangah nunsimlo, kawklo asi ahcun a famkim theilo ih siahsuahnak a thleng thei asi. Farasi pawlin Pathian ih thukham le daan pawl famkim tein kan thlun ko nain mizaangfahnak le duhdawtnak an nei lo tikah anmah lawng ansi bik, anmah hrang lawng ih diriamnak, anmah lawng an si tawp ansi. Curuang ah Farasi pawl cu duhdawtnak umlomi daan thluntu pawl ansi ih Bawipa Jesuh ih mithmuh ahcun sitawp in silem lo pawl ansi. 

            Duhdawtmi u le nau pawl, nang le kei teh Farasi pawl vekin si tawpin si lem lo in kan si rero maw? Pathian ih thu le a daan kan thlunnak ah duhdawtnak telh ringring ttheu uhsi. Duhdawtnak neilo pipi in daan thluntu kan si ahcun Farasi thinlung neitu kan si dingih mah le mah cu si tawp in kan um ding; midang pawl cu zianghman santlailo misual ah kan hmu thluh men dingih a poi zetmi ah a cang ding asi.

            A ngaitu nan zate parah Pathian in thluasuah lo toih hram seh. Amen.

Add new comment

9 + 7 =