"St. Thomas Puai ni" (sim tu Rev. Fr. Peter Zin) July 3, 2021

St. Thomas Puai ni

Thuthangtha sim tu Rev. Fr. Peter Lal Zin Thang

July 3, 2021

Siarding: Eph 2: 19-22/ Ps 117: 1bc. 2 (Mk 16:15)/ Jn 20: 24-29.

            Jesuh in, “I hmuh ruangah na zum a si maw? Keimah i hmu lo nain a zumtu cu mi thluasuak an si,” tiah a ti.

            RVA Falam Service in Thuthangṭha a ngai tu Bawi Khrih ah duhdawtmi nu le pa, u le nau pawl, Bawipa kan Pathian in ṭhat lo nak phunzakip lak sung ihsin a lo humhim sehla thin daihnak a lo pek cio hai hram seh. Tuni July thla ni 3 ni hi Bawi Jesuh ih dungthluntu St Thomas ih puaini a si. St Thomas hi kan thei vek in Bawi Jesuh thihnak ih sin a thawh sal hnu ah ka mit in ka hmu ih ka kut in ka tham lo le cu ka zum thei lo a ti dah ruangah zumnak nei mal mi dungthluntu tiah theih a si ṭheu. St Thomas khal siseh dungthluntu dang pawl khal siseh sambaunak an nei cio ih an mah ih sambaunak le an mah ih theih lonak pawl ruangah kan mah hrangah theihnak le ṭhathnemnak khal tampi a rak um ve lala. Tuni ih kan siar mi Bible pawl le St Thomas ruangah kan theih ngah mi thil man khung pawl ruat tlang uh si. 

            Tuni kan siar dingmi Bible pawl cu veikhat siarnak ah Efesa 2:19-22 tiang a si. Cumi sungah kannih cu Bawi Jesuh le a dungthluntu tirhthlah pawl thawn kan pehzom nak thawng in ramdangmi mi khual kan si nawn lo ih Pathian innsang ih sungtel kan si nak in sim. Tirhthlah pawl thawn pehzom mi kan si ding hi a thupit nak kan hmu thei a si. Saam kan siar dingmi cu Saam no. 117 a siih a sawnnak hrangah Marka 16:15 ta lak a si. Cumicu “Leilung khuazakip ah va feh uhla mi hmuahhmuah hnenah Thuthangṭha va sim uh,’ tiih Bawi Jesuh in a dungthluntu hleikhat hnenah a cah mi ṭongkam a si. A dungthluntu hleikhat ti nak cu Judas Iskariot a tel lo ti nak a si. Kan siar dingmi Gospel cu Johan 20: 24-29 tiang asi i kan ngai tlang ta hrih pei.

Johan 20: 24-29

            Dungthluntu hleihnih lakah pakhat a simi (Faphir an timi) Thomas cu Jesuh a lang lai ah an hnenah a um lo. Curuangah dungthluntu dang pawl in, “Bawipa kan hmu sokhaw!” tiah an sim. Thomas in an hnenah, “A kut thir in an khennak hma si ka hmuh ih ka kut in cuih hma si le a hnak kha ka tham ngah hlanah cun ka zum lo ding,” tiah a ti. Zarhkhat hnuah dungthluntu pawl cu inn khaan sungah an um ih Thomas khal a um ve. Sangka an khar ṭheh nain Jesuh cu a ra lang ih an lakah a dingin, “Nan hnenah daihnak um ko seh!” tiah a ti. Cule Thomas hnen ahcun, “Hinah na kutzung rak re hnik awla ka kut hi zoh hnik aw; na kut rak dawh awla ka hnak hi tham aw. Zum lo in um nawn hlah; zum thlang aw!” tiah a ti. Thomas in, “Ka Bawipa le ka Pathian!” tiah a ti. Jesuh in, “I hmuh ruangah na zum a si maw? Keimah i hmu lo nain a zumtu cu mi thluasuak an si,” tiah a ti.

(Bawipa ih Thuthangṭha a si.)

            Thomas le dungthluntu dang pawl khal an zumnak malnak in siseh an thu theih fiang lonak in siseh sambaunak tete an rak nei cio ti hi kan Bible sungah kan hmu thei. A thok ih kan sim zo vek in himi an mah ih tlamtlin lonak tete ruangah kan hrang ah ṭhathnemnak tam pi a rak um. A taktak cun dungthluntu pawl ih an thei lo mi tete hi kan nih in khal kan thei ve cuang lo mi pawl an si ih an mah ih thei lo nak ruangah le an thusuhnak ruangah Bawipa in a sim hai ih kan nih khal in kan thei ngah ve nak a si. Ziang thawn a bang ti si le tlawng khan sungah saya pakhat in ca a zih ih a tlawngta pawl lak ih sin a hrek khat in a zirh mi an thei thiam lo. A sut khal an ngam fawn lo. Cu lai ah tlawngta pakhat in sayapa na sim mi ka thei thiam lo tiah a ti. Cutikah an sayapa khal in a sim fiang sal ih an zaten an thei fiang sal. A sut ngam lo tu pawl khal cu an rual pa ih thu suh nak ruangah an thei fiang ve sal. Cuvek a si, kan nih khal in dungthluntu pawl ih thei fiang lo nak le thusuhnak ruang ah tam pi kan rak thei ngah ve.  Dungthluntu pawl parah lungawi a um zet. 

            Tuni ih kan siar mi Gospel sungin Thomas ih zumlonak, Thomas ih thanaunak ruangah kan nunnak hrangih a thupi zet mi kan Bawipa ih ṭongkam kan thei ngah a si. Cumi ṭongkam te cu, “I hmuh ruangah na zum a si maw? Keimah i hmu lo nain a zumtu cu mi thluasuak an si,” timi a si. Himi ṭongkam hi a tu kanmah san hrimhrim ah tla cu a thupi tuk. Kan nih in Bawi Jesuh a mah rori kha kan hmu dah lo; asinan ‘Keimah i hmu lo nain a zumtu cu mi thluasuak an si,’ a timi ṭongkam in kan zumnak a khoh hnget ter zet. Thomas ih zumlonak in kan zumnak a fek thei dingin in bawm zet a si. 

            Veikhat lai ah Thomas in Bawi Jesuh hnenah, “Bawipa, khui ah na feh ding ti kan thei lo; curuangah ziangtinso na fehnak lamzin cu kan theih ding?” tiah a rak sut dah. Cutik khalah kan nunnak hrang ih a thupi zet mi ṭongkam pakhat kan thei ngah. Cumicu Bawi Jesuh in, “Keimah cu lamzin le thutak le nunnak ka si. Keimah hnenin siar lo zohman ka Pa hnenah an thleng thei lo,” tiah a timi ṭongkam sunglawi hi a si. Thomas ih thusuhnak in kan Bawipa cu kan feh nak ding le kan thlun dingmi lamzin, kan theih ṭul mi le kan pom ṭul mi thutak a si ih kan nunnak a si timi kan thei fiang ngah a si.

             Kan Bawipa a mah rori kan hmu dah lo hman sehla a mah in “Keimah i hmu lo nain a zumtu cu mi thluasuak an si,” a ti vek in a mah hmu dah lo na cing in a zum tu kan si ruangah a cuangce in thluasuah mi kan si. Bible le Pawlpi ih zirh nak vek in kan Bawipa a thlun ringring tu si thei ding in zuam cio uh si. Kan zate parah Bawipa in zumnak thluasuah in pek sinsin in kan zumnak ṭhang sinsin hram seh.

Fr. Peter Lal Zin Thang (Hakha Diocese)