"Sual nei mi pawl ko dingin a ra mi" (sim tu Rev. Fr. Joseph Ro Nei Thang) July 2, 2021

Sual nei mi pawl ko dingin a ra mi

Thuthangtha sim tu Rev. Fr. Joseph Ro Nei Thang

July 2, 2021

Siarding: Gn 23: 1-4. 19; 24:1-8. 62-67; Ps 106: 1-5(1)/ Mt 9: 9-13

            Pa le Fapa le Thiang Thlarau ih hminin, Amen. Bawipa cu nanmah thawn um sehlaw. RVA Falam Chin service ah thlarau rawl a zawh ringringtu Bawi Khrih ah duhdawt zetmi nu le pa, u le nau pawl, tuihni cu 2021, July 2, kumkhat sungih Caankel kaar 13 nak, Tlawngkai ni 5 ni asi. Tuihni ih kan siar dingmi Pathian ih ttongkam pawl cu Semtirnak 23:1-4, 19 le 24:1-8, 62-67 tiang pawl ansi pei ih Abraham in a fapa Isaac hrangih nupi a tawlrel saknak thuhla le Isaac in Rebecca timi nu a tthitnak thuhla pawl kan hmu asi. Thuthang ttha ahcun Matthew 9:9-13 tiang asi pei ih Bawipa Jesuh in Matthew a kawhnak thu hi asi. Tuihni ih kan ruah khawm tlang dingmi “Sual neimi pawl ko dingin a ra mi” tiah asi pei.

            Tuihni kan siarmi Thuthang ttha hi siar sal uhsi. Mt 9:9-13 ah ‘Cuih hmun ihsin Jesuh cu a suakih a feh rero lai-ah siahkhongtu pakhat Matthew anti mi pa a zung ah a to kha a hmu ih “I thlun aw” tiah ati. Matthew cu a tho ih Jesuh cu a thlun. Jesuh cu Matthew ih inn ah zanriah a ei lai-ah siahkhontu dang tampi le misual tiah hnonmi pawlin Jesuh le a dungthluntu pawl cu rawl an ei pi. Cumi cu Pharisee tthenkhat pawlin an hmu tikah a dungthluntu pawl kha “nan sayapa hi ziangahso hi bangtuk minung pawl thawn rawl an ei tlang” tiah an sut. Cumi cu Jesuh in a thei tikah “A harhdammi in sibawi an ttullo, mina pawl lawngin an ttul asi. Va feh uhla, ttilva thawn thawinak pek hi ka duhmi ansilo; mizaangfahnak thinlung lawng ka duh asi tiah Cathianghlim in a timi hi a tican kha va ruat hnik uh. Miding pawl ko dingah ka ra lo, sual neimi pawl ko dingah ka ra asi sawn” tiah a ti tiah asi.

            Bawi Khrih ah duhdawtmi u le nau pawl, tuih kan siarmi thuthang ttha cu St Matthew puaini ih kan siarmi  thuthang ttha thawn an bang awrep asi. Matthew cu Rome thuneitu pawl hrangih siahkhongtu asi. Matthew timi cu “Bawipa ih laksawng” tiah asullam a um asi. Bawipa Jesuh in “I thlun aw” tiah a ti tikah a hnattuan tansan in Bawipa cu a thlun lohli asi. Matthew in hnattuan ttha a tansan ih kumkhua nunnak hrang hnattuan thar a ngah asi. Matthew in tangka ngahnak ol zawng hnattuan a tansanih a sunglawi zetmi hnattuan mankhung a ngah asi. Matthew in a pumcawmnak hrangih aa-mah-khaan a ummi hnattuan cu a tansan ih ralttha zetin ttuan ttulmi hnattuan har kha a hril sawn asi. Matthew in siahkhong tikih hmanmi ball pen kha a tansanih Jesuh Khrih thlun in a thuthang ttha ngannak ball pen kha a hman suak asi.  

            U le nau pawl, kan Bawipa Jesuh in Matthew kha “I thlun aw” tiah a ko tikah Matthew in a thlun asi tiah Mt 9:9 ah in sim. “I thlun aw” timi cu a dung ihsin thlun menmen silo in “Ka nundan ziaza vekin nung ve aw, I cawng aw” tinak asi. Matthew in Bawipa ih kawhnak aw a thei tikah a thinlung a thleng lohli asi tiah kan ti thei asi. 2Korin 5:17 “Zokhal Khrih thawn a pehzom aw tikah siam thar mi ah a cang asi” tiah Paul nih tla in zirh asi. Matthew tla Bawipa ih zaangfahnak  kawhnak aw neemte kha a thei ih a nunnak a thleng rori asi. Matthew cu Bawipa thawn a pehzom awknak thawngin siam tharmi ah a cangih amah vekin Pharisee le danthiam pawlih hnonmi, sualneitu tiah mipi ih hnonmi siahkhontu pawl thawn zanriah an ei tlang. Bawipa ih thuzirhmi ngai dingah le Bawipa ih zaangfahnak tep ve dingah Matthew in a hawipi pawl a sawm hai. A sawmmi vekin an ra in thlarau rawl le pumpi rawl an tep ngah tlang. Bawipa Jesuh in Matthew lawng silo in a dang siahkhongtu pawl tla a ko hai asi. An thinlung sangka cu an on cio ih rundamtu Bawipa kha an luhter asi.

            Thuphuan 3:20 ah “Ngai hnik! Sangka kiangah ka dingih sangka cu ka king. Zokhal ka aw a thei ih sangka i ontu cu a inn sungah ka lut dingih a hnenah rawl ka ei ding; cule anih khal keimah thawn rawl a ei ve ding” tiah Bawipa nih in sim asi. Bawipa Jesuh in Matthew le a rualpi pawlih thinlung sangka a on sakih Rundamtupa an rung lutter. Bawipa in an ziaza kha a thleng sak hai. Cumi cu vancung thlarau rawl einak ah a cang asi. Bawipa cu kanmah thawn thlarau rawl ei dingah in sawm rero lai asi. Kan thinlung sangka a king rero lai ih kanmah lam ihsin Bawipa luhnak ding hrangah sangka on sak kan ttul asi. “Sangka kiang Bawipa a ding, lut ter aw, lut ter aw, lut ter aw” tiah hla kan sa ttheu asilo maw? Bawipa in amah thawn rawl kan ei khat ding tiah in tiih Bawipa cu ziangmi rawl so kan pek ding? Bawipa ih duhmi rawl cu ziangso asi? Bawipa ih duhmi rawl cu tuihni kan siarmi Bible Mt 9:13 ah Bawipa in “zaangfahnak thinlung ka duh asi” tiah in ti. Bawipa cu “misual pawl ko dingah a ra asi, miding pawl ko ding a ra lo” asi tiah in sim fiang. Bawipa cu a hlomi pawl hawl dingah hi leitlun ah a rung ttum hi asi.

            Matthew ih thinlung hi Bawipa in a thei asi. A hnattuan cu mipi duhlomi hnattuan asi vekin amah rori khalin a duhlo men thei; asinan a chay-anay-ayah in a ttuanmi tla a rak si thei. Curuangah Bawipa in a thinlung sungih thil thu umdaan a zohih zaangfahnak thinlung thawn a ko tikah a thlun lohli asi. Bawipa Jesuh in amah a haitu, amah a beiseitu, a rundam nak kha man nei zetin a cohlangtu kha a ko asi. Amah a beisei lemlo tu pawl a ko lo. Kan nunnak sungah Bawipa kan beisei maw? Bawipa kan ttulsam maw? Bawipa kan hai maw? Bawipa na beiseilo, Bawipa na ttulsam lo, Bawipa ttanpho na ttha lo ahcun Bawipa nih a lo ko lo ding. Curuangah Bawipa cu haal ringring uhsi, Bawipa cu beisei ringring uhsi, Bawipa cu sunlawi ringring, sunsak ringring cio uhsi. Cule Bawipa ih duhmi cu mei-ur thawinak silo in midang parih zaangfahnak thinlung asi. Curuangah Mt 5:7 ah Bawi Jesuh in “Mizaangfah thiamtu pawl cu mithluasuak ansi; ziangahtile Pathian in anmah a zaangfah ve ding” tiah in ti asi. Bawipa Jesuh in mipi ih hnonmi thinlung ttha neimi pawl a zaangfah hai asi.

            Sualnak sal sungah kan um ngah pang caan ah thin thanau hlah uhsi. Bawipa cu haal ringring uhsi. Amah cu sual neimi pawl ko dingin a ra mi asi. “Maw Bawipa, i run zaangfah hram aw, ziangahtile kei cu misual ka si” tiah thlacam phah in Bawipa hnenah pan cio uhsi. 

            A ngaitu nan zate ih parah Pa le Fapa le Thiang Thlarau in van thluasuah le lei thluasuah lo toih hram seh. Amen.