Tangdornak thawn Pathian hnenah

Tangdornak thawn Pathian hnenah
thuthangtha sim tu Rev. Fr. Lucas Tha Ling Sum
March 24, 2021

Zumtu u le nau, nan zaten Pathian in a thar in thlawsuah lo pe hram seh. Tuittum ah “Tangdornak thawn Pathian hnenah” timi thu thawi ten hlawm aw tlang uh si. Hmaisa ah Baibal kan ngai ta hrih pei.
Johan 8:31-42: Curuangah Jesuh in amah a zumtu pawl hnenah, ‘Ka thu zirhmi nan tlun ah cun keimaih dung thlun tu ngaingai nan si ding; thutak cu nan thei dingih cui thutak cun a lo luat ter ding, tiah a ti.
Annih in, kannih cu Abraham ih tefasin kan siih zo ih sal hman kan si dah lo. ‘Miluat nan si ding, na ti tikah hin ziang so na ti duh san?, tiah an ti.
Jesuh in an hnenah , thudik ka lo sim; zokhal sisehla sual a tuahtu cu sual ih sal a si. Sal cu innsang sungah kumkhua in a um thei lo; asinan fapa cu innsang sungah kumkhua in a um a si. Fapa in a lo luatter a si ahcun miluat gaingai nan si ding. Abraham ih tefasin nan si cu ka thei. Asinan, keimah a thah in tum thotho, ziangah tile ka thu zirh mi nan pom thei lo. Ka pa ih I hmuh mi thu ka lo sim; sikhalsehla nannih cun nan pa ih a lo sim mi kha nan tuah, tiah a ti.
Annih in, Pathian amah lawng hi kan Pa cu a siih kannih hi a fa taktak kan si, tiah an ti. Jesuh in an hnenah Pathian hi nan pa si taktak sehla keimah hi in duh ding, ziangah tile Pathian hnen ihsin ka ra ih atu hinah ka um. Keimaih thu in ka ra lo, amah in I thlah mi ka si.”
Zumtu u le nau, mitu ih Baibal kan siar mi sung ihsin (1) nak ah sual timi cu ziang a si? Cun (2) sual tuahnak ihsin ziang vek ah kan cang thei? timi ruat tlang hrih uh si. Atawizawng ih kan sim a si len sual timi cu “tuah aw maw; thil ttha sokhaw” in ti nan tuah duh lo ih kan um asilen sual a si. Thutthimnak ah na nu le na pa upat aw, thil ttha sokhaw, tiah in sim rero nan nu le pa upat duh lo le an thu ngaingai duh lo ih kan um a silen sual a si. Cun “tuah aw hlah, a ttha lo sokhaw” tiin in dawn rero nan cuih thil ttha lo cu kan tuah thotho a si ahcun sual a si. Thutthimnak ah mi dang va iksik hlah in ti rero nan kan thinlung sung in mi dang kan iksik rero a si ahcun sual a si.
Cun 2 nak ah, zumtu u le nau, sualnak kan tuah asilen ziang ti vek ah kan cang thei? Tuisun ih kan Cathianghlim siar mi in sualnak a tuah tu cu sualnak ih sal ah a cang a si, in ti. Ttongdang ih kan sim asilen sual kan tuah a si ah cun Satan ih sal ah kan cang a si, tinak a si. Khuavang ih fa ah kan cang tinak khal a si. Khuavang ih fa kan si ah cun vanram kan co thei nawn lo ding a si.
Curuangah Pathian in Satan sal kutsung ihsin kan luat thei nak dingin, vanram kan co thei nak dingin, a fapa Jesuh cu kan hnenah a ron thlah. Cuti asilen cuih fapa Jesuh cu ziang tin kan co thei ding? Lolen, Satan sal kutsung ihsin ziangtin kan luat thei pei?
A tthabik cu kan sualsir hi a si. Sualsir kan titik ah a phunphun in kan sual kan sir thei. Asinan, a cang thei a si ah cun, a tthabik cu amah Bawi Jesuh rori ih in tuah sak mi siangbawi hnen ih sualthlah hi a si. Sual thlahnak sacrament san hi kan thlarauh hrangah a thu pi tuk.
Zumtu u le nau, ahleice in tui Vau caan sungah hin tangdornak le sualsirnak thawn Pathian hnenah pan ciau uh si. Pathian in nan zaten thawhsuah lo pe hram seh. Amen.