Tangdornak Thawn Thlacamnak

Tluangkhawntu ih Thlacamnak le Tthatnak a tuahmi pawl cu dung a tunihMisual, Mitthalo pa ih Tangdornak le Sualsirnak thawn thlacamnak cu Bawipa in a sang.

 

KUMKHAT SUNG ZARHPI VOI 30 NAK (Year C)

Ecclesiasticus (Sirach) 35:15-17, 20-22

Ps 34:1-2, 16-17, 18+22

Asawn/ Mifarah pawlih kawhnak aw cu Pathian in a thei asi.

2Timothy 4:6-8, 16-18

Luka 18:9-14

 

Bawi Khrih duhdawt zetmi u le nau pawl, kan Bawipa Jesus Christus ih zaangfahnak, Pa Pathian ih duhdawtnak le Thlarau Thianghlim ih pawlkomnak pawl cu nan zate hnenah um hram seh” tiah cibai ka run lo buk hai. Tuihni cu kumkhat sung Zarhpi a voi 30 nak asi. 

Kan ruah khawm dingmi cu “tangdornak thawn thlacamnak” thu asi.

Tuihni kan siarmi Bible a voikhatnak ah Sirach in “Pathian in ngakttah pawlih zaangfah dilnak cu dung a tun dahlo ih nuhmei pawlih harsat an tuarmi ai-hramnak tla a ngai ringring asi. Thinlung zate thawn Pathian a riantu cu Pathian in a cohlang ih an thlacamnak tla cu mero pawlin amah Pathian hnenah an thlenpi ding. Mi tangdor pawlih thlacamnak cu mero pawl pem ko in a sunih Bawipa khalin khulfung lo tein a let ding asi” tiah Sirach 35:20-22 ah kan hmu. 

Gospel sung ihsin Jesuh Khrih in “tluangkhawntu ih thlacamnak le tthatnak a tuahmi pawl cu dung a tunih misual, mitthalo pa ih tangdornak le sualsirnak thawn thlacamnak cu Bawipa in a sang asi” ti thu kan thei asi.

Bawi Khrih ah duhdawtmi nu le pa, u le nau pawl, kan thlacamnak thu kan ruat sal pei uh. Ziangahso kan thlacamnak pawl cu Pathian nih in sawn dah lo? Ziangahso kan dilmi pawl kan ngah dah lo? Kan thlacammi vekin kan ngahlo? ti thu pawl ruat ding kan si asi?

Ziangahso kan thlacam mi pawl kan ngah lo? Kan ngahlonak a thu cu a tampi a um ding. Pathian duhdan vekin kan dillo ruangah siseh, sualsirnak le tangdornak thawn kan dillo ruangah siseh, Pathian ih thukham pawl kan thlunlo ih sualnak thawn thla kan cam ruangah siseh, kanmahih sunlawinak hrangah thla kan cam ruangah siseh, thinlung taktak thawn kan dillo ruangah siseh, zumnak taktak thawn kan dillo ruangah siseh, thla kan cam lai ah kan thinlung a vakvai rero ih Pathian kan biaknak kha thinlung sungah a umlo ruangah siseh, khawmnak ah tikcu kimten kan tello ruangah siseh, cat-banglo in thla kan cam lo ruangah siseh, kan thlacamnak pawl kha tlamtling tein kan ngah lo nak asi. Tuihni ah nang le kei in teh Pathian hnenah ziangtin dinhmun thawn so thla kan cam ti kha ttha tein ruat khawm uhsi, chek fel uhsi.

Tuihni ih kan siarmi Bible sung ihsin cun tluangkhawnnak tello in tangdor thinniamnak thawn le sualsirnak thinlung thawn thlacam kan ttul asi tiah Jesuh Khrih nih in zirh asi. Kan dung Zarhpi ni ahcun catbanglo in thlacam ding thu in zirh asi. Kan thinlung cu Sirach ih nganmi vekin “ngakttah pawl vekin siseh, nuhmei pawl vekin siseh, tangdor thinniamnak” kan nei a ttul asi. Ngakttah pawl le nuhmei pawl cu an tabawah rengreng in thin tha nau cia mi pawl an si; “kannih cu nu le pa neilo kan si ih, kannih cu innsangpa neilo mi harsa kan siih” tiah tha nau ringringtu an si; benhmun neilo, rinsan ding umlo, thintha nau ringringtu pawl ansi; midang pawlih zenhmi, nautatmi le hmuhsuammi tla a cancan ah an tong bet lai. An hnattuan mi pawl an hlawhtling ih an picang, an pitling zo hmanah mihrekkhat cun lungawipi lo in “khoinah ta an kyanphan asi pei? An hnattuanmi cu thil diklo asiih an kyipua mi asi ko lo maw?” tiah an sim siat ttheu lai asi. Kha mi caan ah an ninghang ih “leitlun ah ruahsan ding, rinsan ding pawl kan nei nawnlo; Pathian lawng kan rinsan asi” tiah Pathian kha PA dinhmun ah an cohlang tikah thluasuah a um ih thlacamnak ah tla hmual a um asi. Ngakttah asiko nain, nuhmei asi ko nain puarthaunak an nei thotho ih tluangkhawnnak pawl an nundan in siseh, an ttongka in siseh an langter ih mi an siatsuah ter ahcun zianghman tla tthatnak a um cuang hleilo asi. 

Tuihni kan sakmi Psalm hla sung ah tla “Bawipa cu thinlung a kehkuaimi pawlih kiangah a um. Thin pit vansanglam mi pawl cu a run ding asi. Amah hnenah beunak a hawltu pawl cu a humhim ding. A siahhlawh pawlih nunnak cu a run suak ding” tiah Ps 34:18-22 ah kan hmu thei asi.

Pathian in tangdornak thawn thla a cammi “Abraham ih thlacamnak, a sal pa ih thlacamnak, Sara ih mithli tlaknak le aihramnak in thlacamnak, Hagar ih thlacamnak, Isaac ih thlacamnak, Jacob ih thlacamnak, Joseph ih thlacamnak, Moses ih thlacamnak, prophet pawlih thlacamnak, a felmi siangpahrang pawlih tangdornak thawn thlacamnak hmuahhmuah Pathain in a saang asi.

Kan thlacamnak a tlamtling lo caan ah a cancan ahcun Pathian tu sawn kha siat kan cam ttheu hi thil diklo zet asi. Tangdor thinniamtu asi ahcun Bawinu Maria le Bawi Jesuh vekin “Nangmah duhnak vekin si ko seh” tiah kan ti thei ding asi. A cancan ah Pathian kha zay kan sit bet ttheu lai asi, cumi tla thil dik asilo. Thla kan cam ih “Bawipa, ka thlacam mi in let asile fel tein ka nung thlang ding, tun in thluasuah asile tthen hra tthen khat ka lo pek thlang ding, ka thlacamnak in ngai asile mifarah pawl ka bawm thlang ding” tiah kan ti ttheu. Kan thlacamnak in let ruangah maw fel kan tum, miharsa pawl kan bawm tum, tthen hra tthen khat kan pek tum? A ngaingai ahcun kan thlacamnak vekin kan ngah lo khalle “fel tein nung ding, tthen hra tthen khat hmaan ten pek ringring ding, mifarah pawl bawm ringring ding” kan si asilo maw?

Kan thlacamnak pawl kha Pathian nih in saang theinak dingah ngakttah pawl vekin siseh, nuhmei pawl vekin siseh tangdor thinniamnak nei uhsi. Ps 51:17 “Maw Pathian, tangdor in thinlung a kehkuaimi cu na hnong lo ding” tiah Siangpahrang David in tangdornak le thinlung kehkuainak thawn thlacam in zirh asi. Sansiarnak uk hnihnak 7:14 “Ka hmin in kawhmi ka minung pawlin ka hnenah lungsir in thla an camih ka mithmai an hawlih an thil tthalo tuahnak ihsin an kirsal asi ahcun van ihsin an thlacamnak ka thei ding, an sualnak ka ngaithiam dingih an ram cu ka damter ding asi” tiah fiang zetin kan hmu thei. Tangdornak le sualsirnak cu an peh-tlai aw ringring asi. U le nau pawl, kan ram a dam sal theinak dingin thla kan cam tikah tangdornak le sualsirnak pawl cu an thupi hnasa. Mah ram hrang, mah khua hrangah teh thla na cam dah maw? Mahih innsungsang hrangah siseh, mahih umnak parish hrang siseh, mahih diocese hrangah thlacam na cam dah maw?  Thla na cam sak ding a sile nangmah le nangmah tim tuah aw; tangdornak nei awla sualnak ihsin him tein um awla thianghlim tein um aw. Cutin cu vancung ihsin Pathian in na thlacamnak a ngai ding, nan sualnak pawl a lo ngaidam dingih nan ram, nan khua cu an dam ding; cu hlei ah nan inn-sungsang, nan umnak parish le diocese ah damnak a um ding, tthansonak tla a um ding asi. 

A siartu, nan zaten tangdor thinniamnak thawn le sualsirnak thinlung thawn thlacam ringring theitu kan si theinak dingah Pathian in thazaang thluasuah lo pek hram seh. Cutin thla kan camnak pawl tla in rak saang ringring hram seh.

Amen. 

 

Add new comment

1 + 0 =