Tangdornak Thinlung (Rev. Fr. Lucas Sum)

Tangdornak Thinlung

Simtu - Rev. Fr. Lucas Sum (August 22, 2020 )

Thuthangttha ngai tu nan zaten Pathian in thlawsuah lo pe hram seh.

Tui zarh te ni ih kan siar mi Baibal Mathai 23: 1-12 a si. Bawi Jesuh in Daanthiam pawl le Farasi pawl kha va ralring uh, tiah a dungtlung tu pawl le misenpi pawl a zirh mi thu a si. ziangruangah a si tilen an nih pawl cu mi in a fim, a thiam, in ti hai she, tiih thangtthat le lomnak lawng a hawl tu pawl an si, a ti.  Hmaisa ah Mathai 23: 1-7 tiang kan ngai hmai sa pei.

“Jesuh cu misenpi le a dungthluntu pawl hnen ah thu a sim. Daan thiam pawl le Farasi pawl hi Moses pek mi Daan a sim fiang tu ding mi an si. Curuangah an lo sim mi hmuahmuah cu nan tuah le nan thlun ding mi an si. Sikhalsehla an thil tuah mi cu cawng hlah uh; ziangah tilen an sim mi vek in anmah in an tuah lo a si. Mizaang par ah a rit zet mi thil an suang, asinan an mah cun cui thilrit phurh bawm dingah an kut zim hmanin an dai duh lo. Mi ih hmuh ding lawnglawng ah ziang hmuahhmuah an tuah. An luu le an baan ih an khih awk mi par ih Cathianghlim an ngan mi lukhap le baankhap pawl tla khi zoh hnik uh. Puai tuah nak hmun ah le biakiin ah a tthat biknak hmun I to an duh ruangah tonak kha an ham cia ttheu. Dawr tluan pipi hmun ah mi ih upat pek an duh ih Sayapa, Sayapa, tiih khawh an duh.”

    Zumtu u le nau, mi tu ih kan thei vek in Bawi Jesuh in misenpi pawl le a dungtlun tu pawl hnen ah fiangten ralrin nak a pe a si. Daanthiam pawl le Farasi pawl khi mi thiam le mi zirh tu an si vek in a thu zirh mi cu thlun uh. Asinan, an ziaza cu a cawng pang hlah uh, a ti. Ziangah tilen an sim mi le an zirh mi vek in an tuah lo a si, a ti. Aw kam lawng in silo in ziaza ttha kan si ding hi Jesuh in in duh a si. Himi thu thawn peh par aw in

Matthai 7: 21 sungkhal ah Jesuh in hi tin fiangten in sim: “Bawipa, Bawipa, tiih I ko tu hmuahhmuah in vancung ram an thleng lo ding; vancung ih a um mi ka Pai duhnak a tuah tu lawnglawng in vancung ram an thleng ding a si.” Zumtu u le nau, kan awkam te lawngih tthatnak tuah men lawng in cun vancung ram kan thleng thei lo ding tinak a si cu. Tthatnak tuah le ttuan a ttul  tengteng, tinak a si cu.

    Asinan, tthatnak kan tuah tik ah, tahtthimnak ah a hlu kan pek tikah siseh, lolen mi farah pawl kan bom tikah siseh, cun tthatnak pakhatkhat kan tuah tik ah mitampi cu tluangkan khwawng, mi hnenah kan sim ciamco, I kan uar aw pang theu. Farasi vek kan si pang ttheu. Curuangah Farasi vek si lo dingin Bawi Jesuh in Mathai 23: 12 sungah hi tin in zirh: “Zokhal amah le amah a khaisang aw tu cu tthumh a si dingih mi hnuai ih a dor mi cu khaisan a si ding,” a ti. 

    Zumtu u le nau, nitin kan nun nakah tangdornak thinlung nei dingin Jesuh in in zirh a si. Tangdornak thinlung nei tu zoh tthim tlak mi pahnih in kan zoh hrih pei.

1. Kan Pope Francis a si. Kum 2013 ah Cardinal pawl in me thla in pope an hril ih tui kan Pope Francis ih me tambik a ngah. Cutik ah tttuanvo nei tu Cardinal pawl in Pope Francis cu hi tin an sut: Tui ttum ih me thlaknak thawi kan lo hril mi hi na cohlang ko maw, a ti. Pope Francis in hitin tangdor zet in a sawn: “Kei cu mi sual ka si. Asinan, Bawi Jesuh cu mi zaangfah thiam le mi thinsau a si, ti ka zum. Curuangah ka sual sir phah in Pope ttuan dingih in hril hi ka cohlang a si, tiah a let. Cumi a ttongttheh veten cardinal pawl in Francis cu Pope thar ttuan dingin an nemhnget a si. Thuthangttha ngai tu u le nau, kan Pope Francis hi ziang tluk ih mi tangdor a si, timi fiang ten kan hmuh. 

2. Cun a pahnih nak ih tangdornak nei tu ih sim ka duh mi cu “Bawi Nu Mari” hi a si. Kan sim le kan rel rero theu bangin Baibal cathianghlim sungih kan hmuh mi lak ih tangdornak nei tu bik cu Nu Mari hi a si. Bawi Jesuh ih “mi hnuai ih a dor mi cu khai san an si ding”, a ti bangin Bawi Nu Mari cu mi tangdor mi, a si ih, leitlun a nun sung hmuahhmuah dangdor tei Pathian hna a ttuan ih ruangah Pathian in vancungram ah a khai sang a si. Curuangah Pawlpi khal in Bawi nu Mari cu vancung Siangpahrang  Bawi nu a si, tiah in zirh ih; upat sunloih nak a pek a si. 

Zumtu u le nau, a tawi zawngih kan sim asilen Bawi Jesuh in kan awkam lawng in si loin kan nuncan ziaza thawn tthatnak tuah dingin in zirh a si. Cun tangdornak thinlung nei ding in in zirh bet hrih a si.

    Pathian in nan zaten tangdornak thinlung thawn, tthatnak tuah thei dingin, thlawsuah tampin lo pe hram seh. Amen.