Thazaang peknak le Ralrin peknak

Thazaang peknak le Ralrin peknak

Sim tu - Rev. Fr. Pius Cung (August 26, 2020)

2 Thes 3: 6-10.
            Duhdawtmi u le nau pawl, Bawipa ih pekmi hnangam daihnak nan parah thleng hram seh. Thuthangtha hlawm aw tlang thei dingih damnak le cantha in petu kan Pathian a hmin thangthat siko seh, Amen.

            Minung in hna pakhatkhat kan tuan tikah thazaang pekawk a tul ih, ralrin pekawk khal a tul theu. A pahnih in kan hmang tlang theu. Thuthimnak ah, fanau tlawngta ka neih le ca zuamaw, camibuabuai ong rori ding in tiin tha kan pe ih, midang thawn nan to aw lo pei, na cauk le ballpen pawlthla hlo ter hlah, tiin ralrin nak kan pek. Thingrit lungrit kan cawi khal ah 1,2,3 sal in thazaang kan suah tlang tik ah kan cak. Nankut rialngah loten, nan ke ralring uh a lo nenngah pang kei tin in ralrinnak kan pe aw theu. Biaknak lam le zumnak lam khalah "Thazaang pekawknak le Ralrin pekawknak" hi kan tul zet. Tuisun ih kan siarmi 2 The 3: 6-10 sung in, "Thazaang peknak le Ralrin peknak" timi thu hlawmawk tlang ka duh.

Thazangpeknak pa (3)

1. kan tuahmi vek in tuah uh; Nuncan ziaza ih thusim cu tongkam ih thusim hnak in hmual a nei sawn tiah mifim pawl in an ti. Aw kaa men ih hi tin tuan uh ti mai hnak in ka tuahvekin tuah uh tithei cu mitawk rori an si. Paul in, ‘kan’ a ti tikah a rualpi Silas le Timote a telhcih nak a si. 2The 3:7, kan tuahmi vek in tuah ding cu nan thei fiang a si, Paul in a ti. 3:9 khalah, ‘nanmah ih cawn ding in kan tuan’ tiin a nolh sal. Paul ih a simrero mi hi Ziang tuah le ziang tuan bik sipei? Thesalon hnenih a cakuat hmaisa veikhatnak sungah tampi le fiang zet in kan hmu thei. 1The 1:5 ah ‘Thuthangtha nan hnenah kan thlen pi a ti. Thuthangtha thantu, phuangtu, si hi Paul hnen in cawng u si. 1:6, ah ‘kan nundan le kan Bawipa ih nundan nan cawngih harsatnak tampi nan tong nain Jesuh krihih thu cu Thlarau Thianghlim hnen ih sin lungawinak thawn nan pom a si, a ti. Harnak lakah Jesuh zumding le Thlarau ih lungawi ding hi Paul nih tha in pek. 1The 2:7 ah siseh, :11 siseh Nu in faale a cawm vek in Pa in faale pawl a kil khawi bang in thinnemnak thawn kan lo kil khawi a ti. Duhdawtnak thawn le seherh aw te ih kilkhawi awk ding, tuamhlawm awk ding in tha in pek..

2. sunzan in hna kan tuan; Paul hi Thuthangtha sim le Cathiang ngan nak ah taima zet zuamzet, zohthim thlak a sivek in kuthiam hna tuannak khal ah mi law le tairial zet a rak si. 2 Thes 3:8 ah sunzan in hna kan tuan a ti. Midang ih bawmnak le a hlupeknak men ring lo in pumcawm awknak tlak in sunzan hnatuantu a si. Curuangah hnatuannak hi sunlawih u si. Hna tumpi siseh hna tehrek men va siseh man an nei ih an sunglawi thluh. Pathian in in cawm ding ti mai ih mize le awlthawl men si cu Krifa mi zia a si lo. Kan thlarau hrangah cun tuini ah a thi theimi ka si ti theiaw in nitin ralrinnak le timtuahnak neih a tha ih, tisa hrangah cun kumzakhat ka nung lai ding ti ruat in napi in hna tuan rero ding kan si. Pathian tla ni 6 hna a tuan si. Jesuh thla lettama a si ve. Dungthluntu pawlkhal ngakai ih pum cawm aw an rak si kha. Milaw le taima si dingin Paul hnen in zir u si. Paul ih nun cawng i si.

3. phurrit sawngtu si u si; Pathian hnenih sin kan co mi talent thilthiamnak hi pakhat le pakhat kan bang aw lo. Tampi ngah le mal te ngah kan um ding. Asinan kan bangawknak pakhat te cu talent phunkim co thluhtu mi pakhat hman kan um lo ih talent pakhat hman co lolawlaw khat pakhat hman kan um lo. Cuti ih phundang cio ih kan co nak cu pakhat le pakhat bawmaw ton ding kan a si tinak asi. Rawl ei tlang le kaa a thawih, phurrit phurhtlang a si le a zaang. 2 Thes 3:8 ah, zohrang hmanah thilrit silo dingin hna kan tuan tiah Paul in a ti. Biaknak hnatuan tu pawl siseh, cozah zungsanglam ih hnatuan tu bawi siseh, midang ih phurrit kan sawn mi hnakin midang sawnin kan mah tu hi phurrit vek ih in phurh rero can a tam sawn theu. A poi zet. Bawi sinak le Annaa thuneihnak hi mi bawmhnak ah ah hmang u si. Mi ih ttih ding, hmaisong huphurh ding ih sinak lang ter ciamco hi Paul cun a tum lo lawlaw. Santhar fanau hrek khat pawlkhal Nu le Pa ih zaangcan sawngtu si sawn lo in innsang hrangah phurrit ah kan cang sawn pang theu. Nule pa ih nun sim khal le nan mah hnak in ka thei sawn, ka thiam sawn tiin, ziang siar lo in hnaset kan tun men kan tam vivo. Kan fanu kan fapa a thin hengpang ding, a nuam lo pangding tiih nu le pa riangri ih fa le mithmai zohih, ttihphah huphurh phah ih an um tla khi cu ninghang za le ningzakza a si. Midang hrangih phurrit si lo ding hi thiltha zet a si ih, thilrit va sawng theitu kan si sisin ah cun lungawi u si, thluasuah tumpi a si.

Ralrin peknak pa 3,

1. Thuzirh mi thlun lo tu pawl hrialuh; 2 Thes 3:6 ah Paul tongmi a si. Paul nih himi cakuat a ngan laiah amah le a rualpi pawl ih zirhmi vek si lo in phundangpi ih Pathian thu zirhtu an rak um. Jesuh Krih a rat sal ding a naituk zo, san a cem cing ding leitlun tisa hrangih hnatuan a tul nawn lo, tiih zirhtu pawl an um. Cupawl kha kan thuzirhmi thlun lo tu pawl tiah Paul in a ti. Hrial uh, hnong uh, An thuzirhmi ngaihlah uh, tiah krifa pawl ralrinnak a pek. Kan mai san khal ah Thiangthlarau in i sim, timai ih thuhla thar tuahtu le zumnak tibuai tu an um rero theu. Mai pomdan thupi zet ih retai hlan thuanthu le pupa zirhmi, zummi ziangsiar lo tampi umsan a si. Piangthar luanih piangsual si a ol te. Kawlpawl in laimi pawlthawi taihkhan, naih awk, an duh lo theu. Miphun in thleidang, in nautat ruangah a si lo. Khawmcanah lectric guitar thawn, drum le khuang thawn ringzet in kan au bet. Tlunkhan le hnuaikhan a tlir hnin thluh. An tuarthei lo, in mitkem. Mahte ralrin le thiam lo, midangih ralrin peknak khal ziangsiar lo tu krifa kan tam hrih. Thungai lo nak le tangdor lo nak in thenthek awknak tampi a suak ter. Ralrin thiam u si.

2.  mizaangzel pawl kha hrialuh; Jesuh ratnak a nai zo, leitisa hrang hnatuan a tul nawn lo titu pawl kha Paul cun mizaangzel pawl tin a ko. Thlarau lamih tui zet, hlawptlo zet nai thisa hrangih hnatuan zethel pawl cu hrialuh, taanuh, komhlah uh a ti mi pawl an si. 2 The3:10 ah ‘Hna a tuanduh lo tu pawl cu rawl khal ei hlahseh’ a ti. Mize menmen hnak in thlarau lamih tharaw ter ciamco, nungcingih vanram kaiding tlukih ruat aw pawl a kawknak a si. Innsang damlo le faanau rilrawn pumpuar hman thei loih khawmzawh le biaknakpuai tel rero tla hi Paul ih kawk mi pawl an tel so khaw. Paul ih hrialuh a timi le tuan lo cun ei hlah seh timi ah kan tel pangkei. Hrialmi hnon mi ah tel lo in pawlmi, kommi sisawn u si, komtu pawltu si thei le thluasuah tum sinsin.

3. Man pek lo cun lak lo ding. 2The 3:8 ah, Manpek lo in ka lak mi zianghman a um lo tiah Paul in a ti. Man lo ih ngahmi hi a pungzai lo ih, zatlaknak hman a suah sawn theu. Mi theih lo in sumpai maw thilri maw kan lak tikah, fir cu kan ti duh loih, cianphan tiah hminmawi te kan pek. Ka miat, ka hlawk tiah kan ruat nan a lak ih ngahmi le dik lo zawng ih co mi a si. Sual asi. Hna tuan man pek lo khal fir mi thazaang le nihlawh fir thotho a si. Hlawhzat man ngah lo ruangih mithlikha cu hlawhman pe lo tu, a lak ih hnatuan fialtu nunnak ah a thleng sal. Cuzat ka ngah lawngah Pathian hna ka tuan ding tivek, ngah ding zat zoh fekfek ih Biaknak hna tuan tla hi Paul ih dodal mi a si.

            Thazaang pe aw ton in le ralrin pe aw phah in Paul le a rualpi pawl ih nun cawng u si. Thiangthlarau in thazaang thar le hnemnak, fimnak in pe sin hramseh, Amen.