Thazaang Petu (sim tu Rev. Fr. Joseph Ro Nei Thang) June 11, 2021

Thazaang Petu

Thuthangtha sim tu Rev. Fr. Joseph Ro Nei Thang

June 11, 2021

Siarding: 2Cor 11:18, 21-30; Mt 6:19-23

            RVA Falam Chin Service ah thlarau rawl a zawh ringringtu Bawi Khrih ah duhdawt zetmi nu le pa, u le nau pawl, “Kan biakmi kan Pa Pathian in hnangamnak thluasuah lo pe hram seh” tiah thlaza ka run lo cam sak hai. Tuihni cu 2021, June thla 18, Caankeel Kaar 11 nak, Tlawngkai ni 5 ni asi. Tuihni ih kan siar dingmi pawl cu 2Corint 11:18, 21-30 tiang le Mt 6:19-23 tiang pawl ansi pei. Tuihni kan ruah khawm tlang dingmi cu “Ruahsannak le duhdawtnak” tiah asi pei. 

            Tuihni kan siarmi Bible a voikhatnak ah milai daan in Paul nih amah le amah a porh awknak thu pawl in sim asi. 2Corint 11:23-30 tiang kha siar sal uhsila thlarau tha zaang lak uhsi. Paul in “Kei hi mi-aa ka bang, asinain thungaite in annih hnak cun Khrih riantu ttha ka si sawn. Annih hnakin ka hnattuan a khungsawn; voi tam sawn thawng tlaknak ka tuar; voi tamsawn vuaknak ka tuar, cule voi tampi thih zik tiangin ka tuar. Vuaknak voi 39 sung ihsin Judah miphun pawlin voinga in vuak; Rome miphun pawlin voithum in vuak; cule lungto thawn dennak voikhat ka tuar; tangphawlawng siatnak voithum ka tong, voikhat tla cu nazi 24 sung tifinriat parah kan taang. Voi tampi khual kan tlawnnak ah tilik le suamhmang (damiah) ruangah thinphannak ka tongih ka phunpi Judah pawl hnenin le Gentile mi pawl hnenin ttihnungza ka tong.

            Ttihnungza a phunphun khawpi sungah le hram lakah siseh, tifinriat parah le rualpi deuh ka neihmi hnenin siseh kan tong ringring. Hnattuan khung catlo in a umih voitampi ihnak caan neilo in ka um; rilrawg le tihaal in tla ka um; voitampi beunak neilo, ei ding rawl khopkham neilo le hnipuan neilo in ka um. Cule thildang thu rello in kawhhran zawn ka ruahnak hrimhrim in nitin thilrit bangin i nen. Mi pakhat a ttawnttai asile kei khal ttawnttai in ka thei aw ve; pakhatkhat sualnak sungih abah asile thinharnak thawn ka khat ve. A porh aw ding ka si ahcun ka derdainak a langtertu thil parah ka porh aw ding” tiah asi. 

            Duhdawtmi u le nau pawl, ziang ruangahso Paul nih hi tluk in zonzai harsatnak a tuar? Kan ruah tikah a fiang zetmi thil pakhat cu Paul in Bawipa a duhdawt ruangah le neh hnu san ah ruahsannak a nei ruangah asi. Innsungsang pakhatkhat ah nupi in a pasal kha a duhdawt ngaingai ahcun a pasal hrangah a nitnaa a khaan sak asi. Pasal in a nupi a duhdawt ngaingai ahcun peksannak le anitnaakhaannak pawl a nei ve asi. Paul in a Bawipa a duhdawt ngaingai ruangah a nitna a khaannak asi. A phunphun harsatnak tuarin a Bawipa kha a rianih a Bawipa a duhdawtnak a langter asi. Kannih tla Bawipa kan duhdawt ngaingai ahcun kanmah lam ihsin kan duhnak pawl supin, Bawipa hrangah a nitnanakhaan kan ttul asi, ziangahtile Bawipa ih duhnak le milai ih duhnak pawl cu an kalh aw ring ring ruangah asi. Kan pumsa ih duhnak lawnglawng kan thlun ahcun kan thlarau in a tuar leh ding asi; asinain kan thlarau ih duhnak lawnglawng kan thlun ahcun hi leitlun kan nun sungah sup dingmi le a nitnaakhaannak pawl kan nei ttul asi.

            Duhdawtmi nu le pa, u le nau pawl, ziangruangahso Paul in hi tluk in harsat nak tampi a tuar? Ziangruangah Paul in harsatnak tampi a tuar ti asi ahcun Paul in neh hnu sanih nunnuamnak ah ruahsannak a neih ruangah asi. Neh hnu san ih kan co dingmi nunnuamnak pawl cu hi leitlun ih harsatnak thawn kan tahtthim awk tikah zianghman a reltlaklo asi tiah Paul in in zirh. Rom 8:18, 22, 24-25 ah “A tuih caanih kan tuarmi hi kan hnenih a lang lai dingmi sunlawinak thawn cun tahtthlim tlak ah ka ruat hrimhrimlo. Atuih caan tiang serhsiammi hmuahhmuah cun nauhrin natih hrum-ai bangin an hrum an ai asi ti kan thei. Ziangahtile ruahsannak in rundammi kan si. Kan ruahsanmi kha kan hmu thei asi ahcun ruahsannak asi ngaingailo. Zoso a mit in a hmu theimi cu a ruahsan dah? Sikhalsehla kan hmulo mi kha kan ruahsan asi ahcun thinsau te in kan hngak asi” tiah asi. St Paul in ruahsannak asulam in sim fiangmi cu “Kan ruahsanmi kha kan hmu thei asi ahcun ruahsannak asi ngaingailo” tiah in ti. Curuangah ruahsannak cu kan hmu theilomi thatnak parah retmi rinsannak hi asi.

            Paul in ruahsannak a nei ruangah harsatnak a phunphun tla hi lungawi te-in a tuar asi. Kawl pawlin “htaung hmyin yar sunt” anti ttheu asilo maw? Thawng khat ngah ding kan ruahsan asi ahcun zakhat tete pawl cu dungtun men ding kan si. Kumkhua in kumkhua tiang cem theidah lo mi nun nuamnak kan ruahsan lai ah leitlun kan nun sungih harsatnak tete pawl cu mittthep men ding kan silo maw? Thinsau zetin ruahsannak thawn kan ruahsanmi kha hngak ding kan si asi. Nau pai lai ah siseh, nau nei lai ah siseh, naute ih nu in ziang tlukinso a tuar; asinain naute a neih hnu cun a tuar-natnak hmuahhmuah cu a hlo thluh ih lungawinak thawn a khat asi. Hi leitlun mithli tlaknak ram ah kan um lai ah a nungmi ruahsannak kan nei a ttul asi.

            1Peter 1:3-7 “Kan Bawipa Jesuh Khrih ih Pa le a Pathian cu thangtthat uhsi. In zaangfahnak a tum ruangah Jesuh Khrih cu thihnak in a thoter ih nunnak thar in pe zo. Curuangah a nungmi ruahsannak thawn kan khatih Pathian in a minung pawl hrangih a retmi ro cu co dingah hngakhlap in kan um. Cuih ro cu nan hrangah vancung ah a lo ret sak ih a siat theilo mi, zohmanin ruk theilo mi le a ziam theilomi asi. Ni netabik ih langter dingah a tuih ret cia mi rundamnak cu zumnak thawngin Pathian huham ih kilvenmi nanmahih co dingmi ro asi. Curuangah lungawi uh! Harsatnak a phunphun nan tonmi ruangah caan tawite sung riahsia in um hman uhla lungawi in um thotho uh! Ziangahtile harsatnak nan tuarmi cu nan zumnak adik maw diklo theinak dingah asi. A siat theimi sui hman meisa in hniksak asi ttheu. Cubangtuk in sui hnakin a sunglawi sawnmi nan zumnak cu harsatnak a tuar suak theitu si ding ah hniksaknak a ttul ve asi. Cule Jesuh Khrih a lang Ni ah thangtthatnak le sunlawi nak le upatnak nan co ding asi” tiah thazaang Peter nih in pek asi. Curuangah Paul in ruahsannak thawn harsatnak a phunphun cu a tuar tthentto asi. Cumi cu a nungmi ruahsannak a neih ruangah asi. Ziangahtile a co dingmi ro cu vancung ah Pathian in a ret sak cia zo, zo hmanin a laksak theilo ding, siat tla a siat thei dahlo dingmi ro sunglawi asi. Ruahsannak in rundamnak kan ngah asi tiah Paul nih in zirh asi (Rom 8:24) ah.

            Kannih tla harsatnak kan tuar tintein Paul vekin Bawipa ah ruahsannak ret uhsila Bawipa duhdawtnak thawngin tuar ttheu uhsi. A ngaitu nan zate parah Pa + le Fapa + le Thlarau Thianghlim + in thluasuah lo toih hram seh. Amen.