Thianghlim Innsang Puai (sim tu Rev. Fr. Polycarp Thawngte) December 27, 2020

Thianghlim Innsang Puai

Thuthangtha sim tu Rev. Fr. Polycarp Thawngte

December 27, 2020

Siarding: Sirach 3:3-7, 14-17; Col. 3: 12-21, Lk. 2: 22- 40.

SIRACH IH NUNSIMNAK 3:3-7, 14-17

Bawipa in a fa le pawl parah Fa pawl cu a upat ih nupi pawl tla fapa pawl thawn a cawisang asi. Curuang ah zokhal a pa a upattu poh cu a sualnak pawl ngaidam asiih a nu a cawisangtu cu relcawklo thluasuah a co ding. Zokhal a pa a upattu poh cu fate tampi thawn nunnuamnak a ngah dingih a thlacamnak pawl tla Bawipa in a ngai ding asi. A pa a upattu cu a nun a sau dingih a nu a nunnuamtertu cu Bawipa ih thupek a ngai asi.

Ka fapa, na pa a tar tikah bawm aw; a nundam sungah a riahsia ter hlah aw. A lungmolh tikah a parah na duhdawtnak cu langter awla na cahnak le a damnak ruangah amah hi ningzakin um ter hlah aw. A pa a zaangfahtu cu hngilh a si dahlo dingih a sualnak pawl hrangah sual cawhkuannak pawl tla kuan sak asi ding.

²²Moses Daan sungih a um bangtuk in thianter awknak hrangih tuah ṭulmi pawl kha Josef le Mari in an tuah ding tikcu a thleng. Curuangah naute cu Bawipa hnenih hlan dingin Jerusalem ah an fehpi.

²³Bawipa ih daan cabu sungah, “Fatir mipa pohpoh cu Bawipa ih hnenah nan hlan pei,” tiah ngan ciami a um.

²⁴Cuih tlunah Bawipa ih pekmi daan sungih a um vekin thuro khuah khat a si lole laileng note pahnih thawn thawinak pe dingah an fehpi.

²⁵Cule Simeon an ti mipa pakhat cu Jerusalem khua ah a rak um. Amah cu mi ṭha le Pathian a ṭihzahtu a si ih Israel mi hneemnak an ngahnak ding kha a hngak ringringtu a si. Thlarau Thianghlim a hnenah a um ih,

²⁶“Bawipa ih tiammi Messiah na hmuh ngah hlanah cun na thi lo ding,” tiah fiangtein a phuan.

²⁷Thlarau hruainak in Simeon cu Biakinn sungah a feh tikah daan vekin a hrangih tuah dingah Jesuh cu a nu le a pa in Biakinn sungah an ratpi.

²⁸Simeon in naute cu a ṭaangah a cawi ih Pathian a thangṭhat,

²⁹“Bawipa, tuihsun ah hin na thukammi cu na kimter ih, Na salpa cu daitein a nunnak ni na liamter thei thlang a si.

³⁰Na rundamnak cu ka mit rori in ka hmu zo;

³¹Mi hmuahhmuah mit hmuh ih na timtuahmi rundamnak cu!

³²Cuih rundamnak cu Zentail mihnenah na lamzin langtertu tleunak a si ih, Na minung Israel mi pawl hnenah sunlawinak thlengtertu a si,”tiah a ti.

³³Simeon ih ṭongmi cu naute nu le pa in an theih tikah an mang a bang ngaingai.

³⁴Cutikah Simeon cun thlawsuah a pek hai ih a nu Mari hnenah, “Hi naute cu Israel mi lakah mi tampi tluknak dingah le mi tampi tungdingtu dingah Pathian ih hriilmi a si. Amah hi mitampi in an engtaimi le Pathian hnenin a rami hmuhsaknak mak a si ding ih,

³⁵cutiih an relsiat ruangah anmah thinlung sungih thuthup pawl an neihmi langtertu ah a cang ding. Cule nangmah khal a hriammi ralnam ih sun vekin riahsiat ninghannak in na thinlung a lo sun ding a si,” tiah a ti.

³⁶Anna an timi nunau profet pakhat a um ih amah cu nuhmei a si ih Asher hrin Fanuel ih fanu a si. Kum sarih sung lawng pasal a nei ih,

³⁷amah cu kum sawmriat le kum li a si. Nitin Biakinn ah a um ih a sun a zan in Pathian a biak ih rawl-ul in thla a cam ringringtu a si.

³⁸Culaifang ah a ra thleng ve ih Pathian a thangṭhat ngaingai. Cule Pathian in Jerusalem a luatter ding a si ti ih a hngaktu pawl hmuahhmuah hnenah naute thu cu a sim ciamco.

Nazareth Ah Jesuh An Kirpi

³⁹Josef le Mari in Bawipa ih daanih a fialmi vekin tuah ṭulmi pawl an tuah ṭheh hnu ah Galilee ram Nazareth khua an inn ah an tlung.

⁴⁰Naute cu a ṭhang vivo ih a cak ngaingai. Amah cu fimnak in a khat ih Pathian thlawsuahnak a parah a um.