Thihnak ihsin Thawhsalnak Thu

Thihnak ihsin Thawhsalnak Thu

November 23, 2019

LK 20:27-40

Thuthangtha ngai tu nan zaten Pathian in thlawsuah lo pe hram seh!

            Thihnak ihsin thawhsalnak thu mal ten kan ruat tlang pei. Jesuh Khrih leitlung ih a um lai ah mipi hnenah tampi thu a zirh. A thuzirh mi pawl cu mipi in a caan caan ah cun a cohlang thei. Asinan, a caan caan ah cun an co hlang thei lo.

            Veikhat cu Jesuh in minung thihnak ihsin thawhsalnak thu a zirh. Asinan, Sadducee pawl in an cohlang thei lo. Sadducee pawl cu minung hi thihnak ihsin thawhsal a um nawn lo a ti tu pawl an si. 

Curuangah Jesuh ih hnenah an   ra ih hi tin thu an sut, “Sayapa, Moses in hi daan a ngan ta: ‘Mi pakhat cu fate nei loin a nupi a thihsan ahcun a u nau pakhat khat in a cui nupi cu a tthit pei ih fate an neih mi kha an u mithipa ih fate ah ruah a si pei’, tiah a ti. 

            Voikhat ah u nau pasarih an um. U pabik cu nupi a nei nain fate neiloin a thi. Pahnihnak pa in cunu cu a tthit ih fate neihloin a thi ve. A pathumnak pa khal in a tthih ih fate neiloin in a thi ve thotho. An unau pasarih in cu nu cu an tthi nain fate neih loin an thi theh. A ne tabik an cuih nu nau nu khal a thi ve. Cutin a si ih a thi cia mi pawl an thawh sal tik ah cu nu cu zo bik ih nupi so a si ding? An pasarih in an tthi ciar fawn si” tiah an sut.

            Cu tik ah Jesuh in Sadducee pawl cu hi tin a let hai. Tui san mi lai pawl cu an tthi aw. Asinan a ra lai ding mi san ah cun an tthi aw nawn lo ding. Nung dingih a tlak mi pawl cu vancung mi bangtuk an si ding, a ti. Cun thih khal an thi thei nan lo ding  a si, tiah Jesuh in a sim bet hai.

            Zum tu u le nau, a ralai ding mi san ah cun nu le pa tthit awknak le thihnak timi a um nawn lo ding tinak a si. Mitu ih kan ngai zo bangin Pathian ih a thawh ter mi pawl cu vancungmi bang tuk an si dingih thihnak ihsin an thawh sal zo ruangah Pathian ih fa an si, a ti.

            Cutin a si an cun, zo pawl hi Pathian in thihnak ihsin in kai tho pei? Zo pawl hi ka fa nan si tiah in ti pei? 

            Jesuh in himi thu thawn peh par aw in (Johan 15: 5-6) Baibal sungah fiang ten hi tin in sim. Kei cu sabit hri ka si ih nan nih cu a hnge nan si, Ka sungih a um tu cu rah tampi a rah ding. Asinan, ka sungih a um lo tu cu a car mi sabit hnge vek a si. A car mi sabit hnge cu meisa sungah an hlon ih a kang ttheh a si, a ti.

            Zumtu u le nau, mi tampi in a ra lai ding mi san a um a si, timi hi kan hngilh pang ttheu ih Pathian thei loin kan um pang theu. Tui siih thok in mithi thawh sal nak a um a si, a ra lai ding mi san a um a si timi mang ringring uh sih.

            Thlacamnak, Biak inn ih khawmnak le tthatnak a phunphun tuah nak in Jesuh thawn peh zom aw thei ringring dingin zuam sin uh si.

Nan zaten Pathian in thawsuah lo pe hram seh!