Thinsau Pathian (sim tu Rev. Fr. Peter Zin), July 24, 2021

Thinsau Pathian

Thuthangtha sim tu Rev. Fr. Peter Lal Zin Thang

July 24, 2021

Siarding: Ex 24: 3-8/ Ps 50: 1b-2. 5-6. 14-15(14)/ Mt 13: 24-30

“Hrampi cu kan va bawt pei maw?’ ‘Bawt hlah uh, ziangahtile hrampi nan bawt zawng ah rawl kung tla nan bawtcih pang ding. Rawl laak a cut hlan lo rawl kung le hrampi cu ṭhang tlang ko hai seh.”

            RVA Falam Service in Thuthangṭha a ngai tu duhdawtmi zumtu nu le pa, u le nau pawl, nan dam cio maw? Nan umnak cio ah kan Bawipa in lo um pi cio hai hram seh. Tuni thlarau thazang kan laknak ding hrangah tuni ih kan siar dingmi Gospel hmangin kan Pathian cu a thin a sau zet mi Pathian a si nak thu kan ruat tlang ding in ka lo sawm duh. Kan siar ding mi cu Vancung Uknak thawn pehparin Bawi Jesuh in thlaici ṭha le hrampi ci thawn tahṭhimnak a peknak thu a si. Sile a tu ah Gospel siarnak kan nei ta hrih pei.

Matthai 13:24-30 

            Jesuh in tahṭhimnak dang pakhat a sim lala ih, “Vancung Uknak cu hibangtuk hi a si. Mi pakhat in a lo sungah thlaici ṭha a vorh. Zankhat ah mi hmuahhmuah an ihthat sungah a ralpa a ra ih rawl ci lak ahcun hrampi ci a vorhta ih a tlanhlo. Thlai kho cu an hung ṭhangih an vui tikah hrampi khal cu an lang ve. Cule a hnenum pawl a hnenah an ra ih, ‘Bawipa, na lo sungih na vorhmi cu thlaici ṭha an si lo maw? Khuiinso hrampi hi an rat?’ tiah an sut. Anih in, ‘Himi a tuahtu cu kan ralpa a si,’ tiah a sawn. Annih cun, ‘Hrampi cu kan va bawt pei maw?’ tiah an sutsal. Cutikah anih in, ‘Bawt hlah uh, ziangahtile hrampi nan bawt zawng ah rawl kung tla nan bawtcih pang ding. Rawl laak a cut hlan lo rawl kung le hrampi cu ṭhang tlang ko hai seh. Cule rawl latu pawl kha hmaisabik ah hrampi bawt uhla nan tom hnuah ur uh; cuih hnuah rawl cu khawm uhla ka cuam sungah thun uh,’ ka ti hai ding,” tiah a sim. (Bawipa ih Thuthangṭha a si.)

            Hi kan siarmi Gospel thawn pehparin a hmai sabik ih sim ka duh mi cu Pathian ih a vorh mi cu thlaici ṭha lawng hi a si. Pathian ih a tuah mi cu thil ṭha lawng hi a si. Mihrek in an bei dong caan ah maw asilole an thinheng caan tivek ah si maw: Pathian in ziangruangah hi tivek thil ṭha lo a tuah si pei, Pathain a ṭha le cu ziangruangah hi ti vekin leitlun ah harsatnak a thleng ter a um ter tiah an phun zai ṭheu tivek khal kan thei dah cio ko ding. Hampi bangtuk asi mi thil ṭha lo le mi ṭha lo tivek hi Satan hnen in a ra mi a si ti cu Bible sung ah kan hmu thei mi a si. Tuni kan siarmi Gospel a tanglam kan siar bet vivo asile himi tahṭhimnak Bawipa amah in a hrilhfiahnak kan hmu thei. “Thlaici ṭha a vorhtu cu Milai Fapa a si. Lo cu leilungpi hi asi; thlaici ṭha cu vancung Uknak a cotu minung pawl an si ih hrampi cu Miṭha lo pa ih milai pawl an si. Hrampi ci a vorhtu kan ral cu Satan a si,” a ti. Thihnak siseh, harnak siseh, cun ṭhat lo nak hmuahhmuah hi kan ral Satan hnen in a ra mi a si ti kha a hmai sa ah sim ka duh mi a si.

            Cun thlai kho cu an hung ṭhangih an vui tikah hrampi khal cu an lang ve a ti. Cutikah hnen um pawl in, ‘Hrampi cu kan va bawt pei maw?’ tiah an sut. An Bawipa in “Bawt hlah uh, ziangahtile hrampi nan bawt zawng ah rawl kung tla nan bawtcih pang ding. Rawl laak a cut hlan lo rawl kung le hrampi cu ṭhang tlang ko hai seh,” tiah a let hai. Lo cu leilungpi a si a ti vekin hi leilungpi par ah miṭha lo pawl khal cu mi ṭha pawl lak ah ṭhang lian ve ding hi Bawipa in a siang ti kan hmu thei a si. Cun kan hmu thei hrih mi cu Pathian ih thinsaunak a si. “Hrampi nan bawt zawng ah rawl kung tla nan bawtcih pang ding,” a timi te ka vun ruat tikah ka hmuh daan te ka lo hlawm hai ve ding. Ziangtin kahmu tisile sualnak kan tuah tikah misual ah kan cangih cumi sualnak kan tuah ngah tin in hrampi bawt vekin bawt cingcing kan siseh la zo so kan tang naw pei. Asinan Pathian cu a thin a sau ih caan in pek: sualsir i a hnen ah kir sal ding in duh. Kan nih cun kan mah kan sual caan ah cu ngaidam kan duh zet ih midang abikin kan hua mi pawl an sual tikah thi zangzang sehla ti hi kan duh ṭheu. Pathian cu misual pawl thi zangzang ter a duh tu a silo ih sualsir caan ngah ding in caan saupi a pek duh ṭheu. Misual pawl an thi tikah Pathian a lungawi lo ti cu Bible sung ah kan hmu thei mi asi.

            Cun phun dangin kan zoh hrih pei: Bawi Jesuh in ziang a ti tisile Pathian cun miṭha parah siseh, miṭhalo parah siseh a bangran tein ni a tlang ter ih ruah a sur ter a si a ti. Kan Bawipa cun cu tivekin si ve ding ah in duh a si. A har cu a har nasa ko. Asinan Pathian cu a ol ol hril dingin in zirh lo ih a ṭha mi sawn in zirh tu in thlun ter tu a si.

            Cun na tuh vek in na aat ding a ti vekin caan cu a pek nan sual sir duh cuang lo nun rem duh cuang loin a um mi pawl cu: a caan a kim rikah hrampi vek in bawt in meisa thawn ur an si ding a ti. Kan Pathian a thin a sau tuk ruangah mi hrek khat ih thin hen nak ah a cang leh lam. Ziangruangah hivek misual pawl a thi ter ṭheh lo tivek in thintawi nak lam sawn ah kan hmang pang caan khal a um men thei. Pathian ih duhnak le hna ṭuan daan hi thei thiam zuam uh si. Kan mah khal hrampi vek kan si lo nak dingin zuam phah in le midang pawl par ih Pathian thinsau nak khal thei thiam zuam uh si tiah tuni ah ka lo sawm duh. A ngai tu nan zate par ah ka lung a awi. Pathain in thluasuah a lo pek cio hram seh.

Fr. Peter Lal Zin Thang (Hakha Diocese)

Add new comment

1 + 7 =