Thlacam Daan le Thlacam Caan

Mifim Pathum Puai hnu Ninga Ni (January 10, 2020)

Siarding: 1 John 5:5-13. Lk 5:12-16      

    RVA a ngai tu Bawi Khrih ah duhdawtmi u le nau pawl, nan zate hnen ah thinlung, thlarau le taksa damcahnak pawl Pathian in lo pe hai hram seh.

Tuni January 10, 2020 (Tlawngkai ninga) ni ih kan siar ding mi cathianghlim pawl cu 1 John 5:5-13 tiang le Lk 5:12-16 tiang a si ih, himi pawl sung ihsin kan siar mi Gospel thawn pehpar in “thlacan daan le thalcam caan” timi thulu thawn ruahnak asilole thazang ka lo pe duh. A tu thuthangṭha (Jesuh Khrih ih ṭongkam) ka siar ding ih kan ngai tlang ta hrih pei ti ah ka lo sawm.

Lk 5:12-16

12. Voikhat ah Jesuh cu phaarnat a tuartu pa pakhat ih umnak khua ah a thleng. Cupa cun Jesuh a hmuh tikah a hmaiah a bok ih, “Bawipa, na duh ahcun i thiangter thei a si,” tiah a dil.

13. Jesuh in a kut in a tham hnuah, “Ka lo thiangter duh, thiang thlang aw,” tiah a ti. Hmakhatteah a natnak cu a dam.

14. Jesuh in, “Zohman vaa sim hlah, a sinain va feh awla puithiam in lo zohseh; cule na dam ti kha mi hmuahhmuah ih an lo hmuhnak dingah Moses daan vekin thawinak va pe aw,” tiah a ti. 

15. Asinain Jesuh thuhla cu hmun kipah a thang sinsin, mi in an pan sinsin ih a thu simmi an ngai; cule an natnak khal a damter.

16. Cuih hnuah misenpi hnen ihsin feh tahratin hlimphirnak hmunah amah lawng thla a cam.  

(Jesuh Khrih ih thuthangṭha a si.)

        Duhdawtzetmi zumtu u le nau pawl, a tu ih kan siar, kan ngai mi thuthangṭha sungah Bawi Jesuh le phaarnat a nei mi pa an ton aw nak thu kan hmu. Himi an ton aw nak ah phaarnat a nei mi pa ih thlacamnak te hi a ṭhatha tuk, duh a nung tuk ih cawn a ṭul tuk timi te hi a cuangce in sim ka duh. Ziangtin si thla a cam: Jesuh hmai ah a bok ih “Bawipa, na duh ahcun i thiangter thei a si.” Hitawk ih ka uar bik mi ṭongfang te cu “Bawipa na duh ahcun” timi te hi a si. Ziangruangah ti sile Bawipa ih thlacamnak in zirh mi sungah siseh, Jesmani hmuan sung ih a thlacamnak ah siseh, milai duhnak pakhatnak ah ret lo in Pathian ih duhnak sawn pakhatnak ih ret ding ah in zirh asi. Thla kan cam tik ah milai ih duhnak vek si lo in Pathain ih duhnak vek in cang seh  timi thinlung kan nei ding hi a thupi zet mi a si. Cuti vekih thinlung kan nei theinak dingah cu Pathian par ah zumnak, rinsannak taktak 100% rori kan nei ṭul asi. Pathian ih duhnak, Pathian ih ruahnak cu kanmah ih ruahnak hnak in a ṭha sawn ringring timi te hi kan cing ringring cio pei tihi a pakhatnak ah ka lo forh, ka lo sawm duh mi a si. 

        A pahnihnak ih ka sim duh mi cu “cuih hnuah misenpi hnen ihsin feh tahratin hlimphirnak hmunah amah lawng thla a cam” timi Bible catlang thawn pehpar in thlacamnak caan pek a thu pi zia hi ka sim duh a si. Bawi Jesuh hi kan thei vek in thuthangṭha simnak le mina damternak, khuasia dawinak ti vek in hnaṭuan a buai ze ṭheu. Himi a tuah mi hmuahhmuah khal cu Pathian hna ṭuan lawng te a si. Sihmansehla daai te in thlacamnak caan a dang ten a ret ṭheu, thlacamnak a tuah ṭheu ti hi Gospel pawl sungah, a cuangce in Luka nganmi Gospel sungah vei tampi kan hmu thei. Curaungah farah bawmnak ka tuah ṭheu, thilṭha ka tuah ṭheu, Pathian hna ka ṭuan ringring ih khawm caan, thlacam caan a dang ten tuah a ṭul lo ka ti thei lo a si. Thlacamnak caan a dang ten pek hi thilṭha kan tuah theinak ding hrangah thazaang a hrampi sawn hi a si. Bawi Jesuh a mah rori in a hnaṭuan tam zet lak ah thlacam caan a lak ih in zirh vek in kan nih khal leitlun kan nun sungah leitlun pumcawmnak hrang siseh, mihrang hnaṭha ṭuannak in siseh, kan hnaṭuan a tam zet ko ding nan thlacam caan hi a thupi zet mi a si ruangah thlacam caan pe thei tu kan si cio thei ding in zuam cio uh sih ti kha ka lo sawm duh mi a si. Nan zate parah Pathian in thazaang thar a lo pe haihram seh. Amen. 

Fr. Peter Lal Zin Thang (Hakha Diocese)