Thlacamnak inn (sim tu Rev. Fr. Peter Zin), November 20, 2020.

Thlacamnak inn

Thuthangtha sim tu Rev. Fr. Peter Zin

November 20, 2020.

          Ca Thianghlim sungah Pathian in ka Biakinn cu thlacamnak inn tiah kawh a si ding a ti.

          Bawi Khriah ah duhdawtmi nu le pa, u le nau pawl, nan zate hnenah hnangam daihnak um ringring hram seh. Tuni ah thlacamnak inn pawl hi thiangfai ter kan ṭul nak thu mal lai kan ruat tlang ding in ka lo sawm duh. A hmaisa ah tuni November 20, 2020 (Tlawngkai ninga) ni ih kan siar ding mi Gospel kan ngai ta hrih pei. Kan siar ding mi cu Luka 19:45-48 tiang a si. 

45 Jesuh cu Biakinn sungah a feh ih thil zuartu pawl kha a dawi ṭheh. 46 “Ca Thianghlim sungah Pathian in ka Biakinn cu thlacamnak inn tiah kawh a si ding ati. Asinan nannih cun fifir pawl relhnak kua ah nan cangter!” tiah a kawk hail.

47 Nitin tein Jesuh cun Biakinn sungah thu a zirh. Puithiam pawl, Daanthiam pawl le hotu pawl in Jesuh cu thah an duh. 48 Asinan an thah theinak ding lamzin an hawl thei lo, ziangahtile mi hmuahhmuah in a thu simmi cu ṭongfang pakhat hman hrelh lo in ngai an duh.

(Bawipa ih Thuthangṭha a si)

          Bawi Jesuh ih a ṭongkam pawl kan zoh tikah Bible hlun ta cafang pawl a hmang mi a ṭong a sim mi vei tampi kan hmu thei. Tuni ih kan hmu mi “Ca Thianghlim sungah Pathian in ka Biakinn cu thlacamnak inn tiah kawh a si ding ati,” a ti mi khal hi Isaiah 56:7 ta a si ih, “asinan nannih cun fifir pawl relhnak kua ah nan cangter!” tiah a kawk hail mi khal cu Jeremiah 7:11 ah kan hmu thei. Cun himi Bawi Jesuh Jerusalem biakinn pi ah a feh ih mipi pawl in biakinn pi kha a dik lo in an hmang mi a hmu tikah a thin a heng nak thu hi Gospel a zaten kan ti pei ih, Gospel a pali ten sungah kan hmu thei a si. Tuni kan siar mi Luka 19:45-48, Matthai 21:12-13, Marka 11:15-17 le Johan 2:13-21 pawl ah kan hmu thei ih an bang aw lonak cu a hrek khat ah a tawi deuh ih a hrek khat ah a fam kim deuh kan ti pei ih, a sau deuh in an ngan. Gospel a pali in kan zoh a si le Jerusalem biakinn pi hi mipi pawl in ziang tin an hmang ti hi kan hmu thei. Biakinn ah caw le tuu le laileng tikvek an zuar ih paisa thlengnak hmun khal ah an hmang. Curuangah John Gospel sung ih kan hmu vekin hri kha vuaknak fung ai ah a merh  ih, tuu siseh, caw siseh, an zuarmi pawl cu a vuak ih Biakinn sung ihsin a dawi ṭheh; tangka thlengtu pawl ih cabuai pawl khal a linglet ṭheh ih an tangkanawi pawl khal a thehdarh ṭheh a si. Cun laileng a zuartu pawl cu “Hitawk ihsin nan laileng pawl kha tlanpi ṭheh uh! Ka Pa ih inn cu nan dawr tuahnak ah hmang nawn hlah uh!” tiah a kawk hai a si. 

          Biakinn tiah kan ko vek in Biakinn cu Pathian biaknak inn, thlacamnak inn ah hmangin thianghlim teih kan ret ṭul mi a si. Biakinn thianghlim teih ret ding kan ti tikah Pathian hmai ih a thianghlim ding cu a thupi bik mi a si ih minung mit hmuh nak ah a thiangfai ding khal cu a thupi zet ve mi a si. Pathian cu thinlung lawng a zoh a sisi ti men ih biakinn kha bal zet in ret men, mah khal bal zet in biakinn pan ih khawm/ thlacam khal cu thil ṭha lo zet mi a si. Pathian hmai ih thianghlimnak le minung hmuhnak ih thiangfainak a pahnih in a thupi zet ti kha a hmaisa ah sim ka duh ih, tuni ah Pathian hmai ih thianhlimnak a thupitnak sawn kha sim ka duh. Biakinn cu thlacamnak inn ah hmang ding asilole thianghlim ter ding kan titik khalah kut in sakmi Biakinn le Thiang Thlarau ih Biakinn a si mi ka ruangpum a pahnih in kan mang sal cio pei. 

          Himi Biakinn phunhnih kan ti pei ih, kut ih sak mi Biakinn pi le kan ruangpum, thianghlim te ih ret ding asilole thlacamnak inn ih hmang ding kan ti tik ah a thupi deuhmi asilole a hrampi deuh a si mi cu kan ruangpum sawn hi a si. Ziangruangah tile kan mah kan thianghlim asile cu kut ih sak mi Biakinn khal kan thianghlim ter cih zo a si. Phundang in kan sim ding a sile, kan mah kan thianghlim lo a si le kut ih sakmi biakinn khal cu thianghlim te in kan hmang thei lo ding ih thla khal ṭha tein kan cam thei lo ding a si. Curuangah kan ruangpum pi hi a hrampi deuh a si ih a thupi deuh ka ti nak a si. John 2:19 ah Jesuh in, “hi Biakinn hi bal uhla nithum sungah ka saksal thei ding,” ati. Cang 21 ah “Sikhalsehla Jesuh ih a sim duhmi Biakinn cu amah ih taksa ruangpi kha a si,” ati. Kut ih sak mi Jerusalem Biakinn kha a thianfai hnu ah a mah taksa ruangpi khal cu Biakinn a si nak a lang ter a si. 

          Kan ruangpum khal cu Biakinn a si nak thu Bible catlang mal lai kan zoh ta hrih pei. 1 Kor 6: 19 ah, “nan ruangpum cu Thlarau Thianghlim biakinn a si, ti nan thei lo maw? Cuih Thlarau cu nan sungah a um ih Pathian ih pekmi a si. Nannih cu nanmah ih ta nan si lo, Pathain ih ta nan si,” a ti. 1 Kor 3:16-17 khal ah biakinn kan si nak thu kan hmu thei ih hi tawk ah cu ralrinnak in pek nak khal a tel, “nannih cu Pathian biakinn nan si ih a Thlarau nan sungih a um kha nan thei lo maw? Curuangah zokhal hih Pathian biakinn a siatsuahtu cu Pathian in a siatsuah ve ding. Ziangahtile Pathian biakinn cu a thianghlim ih a biakinn cu nanmah hi nan si,’ a ti. 

          Cuti asi ruangah biakinn thianghlim ter ding timi hi duh le tuah, duh lo le tuah lo tiah hril theih a si lo ih Christian kan si hnuhnu ah cu kan ti thei tawk in Pathian ih biakinn pawl kha thianghlim ter ding in zuam ringring kan ṭul a si. Biakinn thianghlim ter ringring ding hi a ol maw kan ti a si le a ol hrimhrim lo kan ti le a sual lo ding. Pathain biakinn a siatsuahtu cu Pathian in a siatsuah ve ding ti a si ruangah kan ṭong mi, kan tuah mi pawl le kan taksa a siat  suah thei mi ei le in pawl thiang in ralring kan ṭul a si. Kei mah thu tiin kan duhduh in kan taksa a siat suah thei mi pawl kan ei, kan in, kan fawp ih Pathian biakinn kan siatsuah a si le Pathain in in siatsuah ve ding a si ti kha Biable in ralrinak in pek a si.  Kut it sak mi biakinn le Thlarau Thianghlim ih biakinn a si mi kan taksa ruangpum thianghlim te ih kan ret thei nak ding in Pathian hnen ah thazang dil in zuam cio u si. Pathian in kan zaten ṭhat lonak phun zakip in in kilkhawi ringring hram seh.

Fr. Peter Lal Zin Thang (Hakha Diocese)