Thlarau hrangah (sim tu - Rev. Fr. Lucas Tha Ling Sum) February 17, 2022

Thlarau hrangah

Thuthangtha sim tu - Rev. Fr. Lucas Tha Ling Sum

Feb 17, 2022

Marka 8:27-33

 

Tuittum ah “Thlarau” Hrangah timi thu ruat khawm uh si. Hmaisa ah Baibal kan ngai te hrih pei.

Marka 8:27-33.

“Jesuh le a dungthluntu pawl cu Sisariah Filipi kiang khawte pawl tlawng dingah an feh. Lamzin ah dungthluntu pawl cu, “Min in, zo in ti so, in sim hnik uh?’ tiah a sut.

            Annih in, “Mi hrekkhat in tihnimnak petu Johan a si, an lo ti; Mi hrek in Elijah a si, an lo ti; Midang in profet pakhat khat a si, an lo ti, tiah an ti.

            Jesuh in, “Nannih in teh, zo in ti so?, tiah a sut. Piter in, nang cu Messiah na si, tiah a ti.

            Cutikah Jesuh in, cui thu cu zohman va sim hlah uh, tiah a tiam.

            Cule Jesuh in a dungtluntu pawl a zirh ih,” Mi Fapa cu tuarnak nasazet a tong dingih upa pawl, puithiam upa pawl le Daan thiam pawl in an hnong ding. An that ding nan, nithum hnuah a nung sal ding, tiah a ti. Cui thu an hnenah fiang zet in a sim. Curuangah Piter in Jesuh cu dang deuh ah a pialpi ih a mawh thluk. Sikhalsehla Jesuh cu a her ih a dungthluntu pawl, zoh phah in Piter cu, Satan, ka hnen ihsin tlan aw! Na ruahdaan hi Pathian hnen ihsin ra mi a si lo, milai hnen ihsin ra mi a si, tiah a kawk.”

            Himi cu Pathian ih ttongkam a si. Bawi Jesuh Khrih hnenah thangtthatnak um seh law.

            Zumtu u le nau, Bawi Jesuh ih thu zirh mi pawl kan zoh tikah, amah le amah zo a si, timi thupi ah hmangin thu tampi a zirh a si, timi kan hmuh. Asinan, mitampi in Jesuh cu zo a si, leitlun ih a rat sannak hi ziang bik a si, timi an thei fiang lo. Mipi cu vun sim hrih hlah uh si. A dungthluntu 12 pawl hman in fiangten an thei lo a si, timi tuittum ah kan hmu. Bawi Jesuh in a dungtluntu pawl hnenah, mi in zo in ti so? i sim hnik uh, ti ih a suh tik ah a dungtluntu pawl in, Mi hrekkhat in tihnimnak petu Johan a si, an lo ti; Mi hrek Elijah a si an lo ti; Midang in profet pakhat khat a si, an lo ti, tiah an ti. Cutikah Jesuh in silen nan nih in the, zo in ti so, tiih a dungtluntu pawl a suh tik ah, an lak ih upabik Piter in, nang cu Messiah na si, a ti. Bawi Jesuh a lungkim tuk. Curuangah Bawi Jesuh in hi thu hi mi va sim hlah uh, tiah dungthluntu pawl a tiam, a si tin kan hmu.

            Zumtu u le nau, Piter in Bawi Jesuh ih thu suh mi a leh thei ruangah Bawi Jesuh hi zo a si, timi a thei fiang a bang. Asinan, Piter hin Bawi Jesuh hi zo a si? Bawi Jesuh ih hnattuan cu ziang a si, timi famkim ten a thei lo. Ziangah tilen Bawi Jesuh in, “Mi Fapa cu tuarnak nasazet a tong dingih upa pawl, puithiam upa pawl le Daan thiam pawl in an hnong ding. An that ding nan nithum hnuah a nung sal ding a si, tiih thu a zirh tik ah Piter cun Bawi Jesuh cu a mawh thluk a si, tiah kan Baibal in in sim.

            Cutikah Bawi Jesuh in Piter cu, Satan, ka hnen ihsin tlan aw! Na ruahdaan hi Pathian hnen ihsin ra mi a si lo, milai hnen ihsin ra mi a si, tiah a kawk a si.

            Zumtu u le nau, Piter cun Bawi Jesuh cu Messiah a si ih ruangah mi ih hnon mi le mi ih thah nak a tuar ding cu a cohlang thei lo a si. Curuangah Bawi Jesuh in Piter cu Satan, ka hnen ihsin tlan aw, tiih a kawk nak a si. Kan nih khal a caan caan ah cun Piter vek kan si pang ttheu. Bawi Jesuh hrangih harsatnak a tuar duh lo tu, kan si ah cun, Bawi Jesuh ih kawk mi Piter vek kan si, tinak a si.

            Curuangah Bawi Jesuh ih kawk mi Piter vek silo dingin zuam ciou uh sih. Pathian hrangah siseh, kan thlarua hrangah siseh, zonzaih nak le harsaknak a phunphun ttih lo in tuar thei ding in zuam sin  uh si. Pathian in nan zaten thlaw suah lo pe hram seh. Amen.

 

Add new comment

9 + 5 =