Thlarau Thianghlim thawn (Sim tu - Rev. Fr. Lucas Tha Ling Sum) May 12, 2021

Thlarau Thianghlim thawn

Thuthangtha sim tu - Rev. Fr. Lucas Tha Ling Sum

May 12, 2021

Siarding: Tirh. 17: 15, 22- 18: 1; Saam 148: 1-2, 11-14; Jn 16: 12-15.

          Zumtu u le nau, Falam RVA ihsin Pathian in thlawsuah lo pe hram seh, tiah thla za ka lo cam sak. Tuittum ah “Thudik ih Hruai Tu Thlarau” timi thu ruat tlang uh si. Hmaisa ah Baibal kan siar ta pei. 

Jn 16:12-15:

          “Nan hnenah sim ding tampi ka nei. Asinan a tu ah cun nan thei cawk lo ding. Sikhalsehla Thlarau a run tikah cun Pathian thudik lang tertu a si ruangah thukdik hmuahhmuah ah a lo hruai ding. Amai thuthu in zianghman a ttong lo ding, asinan a theihmi kha a sim dingih a ra thleng leh ding mi thu tla kha a sim ding. Amah in sunlawinak i pe ding. Ziangah tile ka sim cia mi kha a lak dingih nan hnenah a sim ding. Ka Pa ih neih mi hmuahhmuah cu ka ta a si. Curuangah Thlarau in, ka pek mi cu, a la dingih nan hnenah a sim ding, tiah ka lo tinak a si.”

          Duhdawtmi zumtu u le nau, kan thei ciau bang in, Bawi Jesuh in hi leitlun ih a um lai ah vancung uknak thu le hla tampi khua zakip ah vak in a zirh a si. A dungthlun tu hlei hnih pawl in siseh, Pharisee pawl in siseh, Sadducee pawl in siseh, puithiam le daan thiam upa pawl in siseh, mipi pawl in siseh, cuih a thu zirh mi pawl zaten an thei thiam thluh cawk lo.

          Curuangah Bawi Jesuh in a caancaan ah cun kawk phah lawmphah in thu a zirh hai a si. Tthimnak ah, Peter in Jesuh ih thu zirh mi a theih thiam lo ruangah Jesuh in Peter cu hitin a kawk: “Satan pa, ka hnen ihsin tlan aw! Ka fehnak lamzin khamtu na si. Ziangah tile hi banguk na ruahnak hi Pathian hnen ihsin a ra mi a si lo, milai hnen in a ra mi a si,” tiah a ti (Mt 16: 23). Asinan, khat lamah cun, Jesuh ih Peter a lomnak thu khal kan hmu. Jesuh in a dungthlun tu pawl hnenah hitin thu a sut: “Nan nih in teh kei hi zo a si in ti?” Cutikah Pater in “nang cu a nung mi Pathian Fapa Messiah na si,” tin a sawn. Cutikah Jesuh in “Johan fapa Simon, mi vannei a si. Ziangah tile, hi thudik  na sim mi cu minung hnen ihsin na ngah mi a si lo, vancung I a um ka Pa in a lo theih ter mi a si,” a ti (cf. Mt 16: 15-17). Mipi pawl cu sim duh hrih hlah uh si. Dungthlun tu hleihnih lak ih a upabik le hotubik rori hman in Bawi Jesuh ih thu zirh mi pawl, a zaten a thei fiang thluh thei lo timi a fiang. 

          Curuangah mituih Baibal Cathianghlim Bawi Jesuh in “nan hnenah sim ding tampi ka nei. Asinan a tu ah cun nan thei cawk lo ding. Sikhalsehla Thlarau a run tikah cun Pathian thudik lang tertu a si ruangah thukdik hmuahhmuah ah a lo hruai ding,” a tinak a si. Zirh tu, hruitu, le kilkhawi tu Thlarau thianghlim kan ttul tinak a si. Cuti asilen Jesuh ih kam mi, thudik ih in hruah tu ding Thlarua Thianghlim cu khui tawk ah um? Cuih Thlarua Thianghlim cu thudik ah lam in hruai maw?

          Zumtu u le nau, Bawi Jesuh in hitin a dungthluntu pawl hnenah thu a kam: “San a cem hlan tiang nan hnenah ka um ringring ding a si,” (Mathai 28: 20) a ti. Dungthluntu 12 thawi pehzomh awknak a nei tu Khawhhrah sungih kan um ruangah kan zaten Thianghlarau in; in um pi ringring a si; thudik le thuhman ah cat lo in lam in hruai ringring a si. Lungaw in Thumkom Pathian thangtthat in lawm ringring uh si.

          Thuthangttha ngai tu nan zaten Thlarau Thianghlim in, lam lo hruai in, lo um pi caamcin hram seh! Amen.