Thlisia tthehah zilthlinem (sim tu - Rev Fr Peter Zin)

“Thlisia ṭhehah Zilthlinem”

Sim tu - Rev. Fr. Peter Zin

September 25, 2020 

Bawi Khrih ah duhdawtmi nu le pa, u le nau pawl, Bawipa ih pek mi hnangam daihnak le thinlung, thlarau harhdamnak pawl cu nan zate hnenah um ringring hram seh. Ninghang, riahsia le beidong in na um maw? Harsatnak na ton mi ruangah leitlunah nun hman duh nawn lo in na um maw? A tu ah beidong zet in a um tu khal kan um men thei ih asilole a mal bikah kan nun sungah vei khat tal cu thinpit zet in, awloksong in kan um caan a um dah cio men ding tin ka zum. Cutivekin thinbangin kan um caan ah ziang kan ruat, kan thin sungah ziang a um? Tuni kan siar ding mi Bible pawl zoh in thazaang kan lak cio dingin ka lo sawm duh. Tuni September 25, 2020 (Tlawngkai ninga) ni ih kan siar dingmi Bible pawl cu Thusimtu 3:1-11 tiang, Saam 144:1-4 tiang, le Gospel cu Luka 9:18-22 tiang pawl an si.

A veikhatnak kan siarmi thusimtu 3 sungah cu ziang hmuahhmuah in caan an nei ih leilungtlun thil tinkim hrangah tikcu remcang a um timi thu kan hmu ih Saam kan siar mi sungah cu Bawipa cu kan beunak lungpi, kan rinsan mi a sinak thu kan hmu. Gospel sungah cu, ‘mipi in zo in ti so timi le nannih in teh zo a si tiah in ruat,’ tiah Bawi Jesuh in a dungthluntu pawl thu a sut nak kan hmu ih cumi ṭheh ah puithiam upa pawl le Daanthiam saya pawl in an hnong dingih an thatnak ding thu le ni  thumnak ah thawhtersal a si nak ding thu pawl a simnak a si.

Leilung tlunih thil a cang mi pawl kan zoh tikah, tuni Bible a veikhatnak ih kan siar mi vek in a mah caan tete a rak um ti hi kan hmu thei. Ziangtin a um ti sile, ‘Suah caan a um ih thih caan a um, phun caan a um ih phawi caan a um; thah caan a um ih damter caan a um, bal caan a um ih sak caan a um; Ṭah caan a um ih hnih caan a um, Riahsiat caan a um ih laam caan a um; lungto hlon caan a um ih khawmsal caan a um; pom awk caan a um ih pom awk hrial caan a um; hawl caan a um ih hlohter caan a um, khawm caan a um ih hlon caan a um, thlek caan a um ih ṭhit caan a um, daite ih um caan a um ih ṭong caan a um; duhdawt caan a um ih huat caan a um, ral awk caan a um ih rem awk caan a um,’ ti a si. Hihi kan theih mi le kan ton ringring mi a si ih a caancaan ah kan hngilh ṭheu mi khal a si lala. Ziangruang ah kan hngilh ṭheu ka ti sile, minung tampi in riahsia ninghang in kan um caan ah kan nun sung hmuahhmuah hiti vek in kan um ringring dingah kan ruat ih a nung hman ka peih nawn lo kan ti ngah pang ṭheu. Thlisia vek a si mi hi harsat, ninghangnak pawl theh in zilthlinem vek a si mi lungawi caan a ra thleng leh ding ti hi kan ruat hngilh ṭheu. Thlisia ṭheh in asilole thlisia dungah zilthilnem a um, a ra ṭheu timi hngilh hlah u si.

Tuni kan siar mi Gospel sung khal ah Bawi Jesuh in, ‘mi fapa hi a tuar nasa dingih upa pawl, puithiam upa pawl le Daanthiam saya pawl in an hnong ding. Amah cu an that ding,’ tiah a dungthluntu pawl a sim a si. Cutin a sim hnu ah a bang ta maw? A bang ta lo a si. Ziang a bet lai? ‘Asinan ni thumnak ah thawhtersal a si ding,’ a ti a si. Cumi thawhsalnak cu lungawinak tumpi a si. Harsatnak, tuarnak le thihnak in a cem ta lo ih lungawinak caan a thleng sal a si. Minung hmuhnak ah cun thihnak hi kan cemnak a si vek bang ih asinan Bawi Jesuh hrangah cu ruahsannak kan nei nawn lo caan hman ah ruahsannak a thar a um ringring ih in pek thei lai a si. A mah Bawi Jesuh rori hman nehnak le sungawinak hlanah, harsatnak a tong hmai sa ta a si. Curangah kan nih Bawi Jesuh a zum tu pawl in a mah kan zum ruangah harsat nak tong lo dingin ruahsannak nei ding kan si lo ih, kan nei dingmi ruahsannak sawn cu harsatnak thlisia ṭheh in lungawinak zilthlinem a ra thleng ding ti mi sawn hi asi. Thlisia khal cu cawl ni nei lo in a hrang cawk lo vekin na ton mi harsatnak khal cu cem ni nei lo in a um ve lo ding asi. Hi ka tongmi thlisia ṭheh in zilthlinem te a ra ding ti hngak in beidong vansang lo in tuar thei le neh thei zuam u si.

Cun harsat ninghang nak thlisia kan ton caanah teh ziang tin kan nung ding, thlisa nih in fen lan ta lo nak dingah khuiah kan beu ding? Tuni kan siar mi Saam hla sungah ziang kan hmu thei ti sile, ‘ka beunak lungpi Bawipa cu thangṭhat uh! Ral do dan le ral nam zia cu, Amah in i zirh. Amah cu i humtu le ṭantu asi; ka beunak le i runtu khal a si; ka himnak ah a mah ka ring,’ a ti vek in harsatnak thlisia a hran lai khal ah beunak lungpi kan nei ṭul ih cumi kan beunak lungpi khal cu kan Bawipa hi asi. Ral do dan le ral nam zia cu a mah in i zirh a ti vek in harsatnak kan ral cu a mah Bawipa ṭong kam ngai in, thlun in kan do ding a si. Curuangah harsatnak thlisia kan ton caan ah in fen hlo lonak dingah lungpi a si mi kan Bawipa hnenah kan pan a ṭul asi.

Duh dawt mi nu le pa, u le nau pawl, leilung tlun ih harsatnak siseh, lungawinak siseh kan ton tik ah tuni Bible kan siar mi vek in kumkhua a hmun lo ding ih a thleng aw rero ding ti kha cing ringring uh si. Kan lam a tluang ih lungawi zet in kan um caan khal ah hihi a hmun lo ding ti theih a ṭul vek in harsatnak kan ton caan khal ah hihi a hmun ringring lo ding ti thei uh si. Curuangah tuni a cuangce in thazaang kan lak tlang dingah ka duh mi cu ‘harsatnak thlisia ṭhehin lungawi hnangamnak zilthlinem te a ra ding’ timi te hi a si. Bawipa in thazaang a tharin in pek cio hram seh.

Fr. Peter Lal Zin Thang (Hakha Diocese)