A thu hla theih hnak in Amah theih ding a thu pi sawn (sim tu, Rev. Fr. David Mangte)

A thu hla theih hnak in Amah theih ding a thu pi sawn

Sim tu - Rev. Fr. David Mangte (August 24, 2020)

            RVA ihsin thuthangtha a rak ngaitu hmun tin ih ummi duhdawtmi nulepa ulenau pawl nan zate ih nun ah kan Bawipa Jesu Khrih ih zangfahnak, Pa Pathian ih duhdawtnak le Thiang Thlarau ih pawlkomnak cu a thar in thleng hram seh tiah thlaza cam phah in cibai ka run lo buk hai a si.

            Tuini August 24 cu ‘St. Bartholomew, the Apostle’ timi sunloih ni a si vek in Bartholomew hmin nei pawl nan zaten “Happy Feast day” ti’n nan kutnem ka run lo kai hai a si. Dungthluntu 12 lak ih tel ve mi St. Bartholomew sunloih ni ih Gospel kan siar mi cu Jn 1:45-51 sung ta a si ih himi hmangin thazang lak khawm ka duh.

            Tuini ih puai kan tuah mi le tuini ih Gospel kan siarmi ih pehtlaih awknak hi hmasa ah run rel fiang a tul in ka hmu. Ziangah tile, tuini ah St. Bartholomew sunloih puai kan tuah nan tuini ih kan siar mi Gospel sungah Bartholomew tel lo’n Nathanael sawn a tel. Bartholomew le Nathanael hi minung pakhat ih hmin an si taktak maw timi thu ah thubuai a um. Nathanael timi hmin hi Johan ih ngan mi Gospel sung lawngah kan hmu. Cule, Johan ih ngan mi Gospel sungah Bartholomew timi hmin a um lo lala. Mt 10:3 ah siseh, Mk 3:18 ah siseh Dungthluntu 12 pawl ih hmin an tarlang tikah Philip le Bartholomew hi a kop in an tarlang ringring. An then dah lo.  Curuangah Johan in Bartholomew timi hmin hmang lo hman sehla, Philip le Nathanael ih thuhla a ngan mi kan zoh tikah siseh, cun, 21:2 sungah Dungthluntu hrekkhat ih hmin a nganmi ah Nathanael a telh mi kan zoh tikah siseh, Bartholomew in Nathanael timi hmin dang a neih ding zum a um. Culawng siloin Bartholomew timi ih sullam hi Tholmai/Ptolemy ih fapa ti a si ih ‘second name’ timi hmin 2nak lawng a si. Curuangah Bartholomew in ‘first name’ timi hmin dang a neih hrih ding tengteng a si ruangah Bartholomew le Nathanael timi hi minung pakhat ih hmin a si timi ruahnak hi a dik sawn ding ti’n Pawlpi khal in a pom. Himi ruangah tuini St. Bartholomew sunloih ni ah Jn 1:45-51 sung ih Philip le Nathanael thuhla kan run siar nak a si.

            Cule tu ah cun thazang lak ding lam ah rung kat sehla. Kan thuthangtha siar mi sungah Philip in Bawipa Jesuh a ton ngah tik ah Andrew in Peter hnen ih thuthangtha a va sim vek in anih khal um men thei lo’n a rualpa Nathanael hnen ah thuthangtha a va sim ve. ‘Nazareth mi Jesuh hi Moses le Prophet pawl ih a thuhla an rak nganmi, Israel mi pawl ih kan hngahhlap zet mi Messiah a si ngaingai ding ka zum’ a va ti tikah, Nathanael cun a rak hnihsan men. Nazareth khua in Messiah a suak ding timi hi Israel mi pawl ih ruahnak ah a um hrimhrim lo. Cuih hlei ah khi san lai ah cun, khuapi siseh, khuate siseh pakhat le pakhat an rak zuam awk lai tak a si ih Nazareth khua hi zianghman ih rel tlak a si lo thu Nathanael in a thei keokeo. Curuangah Nazareth khua in ziang thiltha so suak dah tiih a rak ti nak khal a si. Philip cun thu el awknak suak ter lo in nangmah ra zoh hnik aw la tiah Jesuh Khrih hnen ah fimkhur zet in a hruai top. 

            A caancaan ah mihrek cun midang thawn thu elawknak in zumnak ih mi hruai kan tum theu. A takak ahcun tongkam ih elawk rero nak in Christian zumnak ah mi a hruai thei taktak lo. Jesuh Khrih ih huham le a sinak mi hnen ih va simfiang ding cun amah Jesuh Khrih thawn tonawk ter top kha hmual a nei bik. Mi hrek khat tla cu mi thawn soi awk duh le thu el awk duh men ah Bible hmang tla kan um theu ih cuvek tikah Bible hmangih thu elawknak in thatnak lam hnak in siatnak lam ah in hruai sawn theu ih a poi ngaingai. A ngaingai ah cun Jesuh Khrih hi kan hrangah zo a si ti kan nun ih kan theihfiang ngah le kan zum ngah a si ahcun midang thawn thu elawk rero tul lo’n zumnak lam ah  kan hruai thei cih mai ding a si. Curuangah Jesuh Khrih ih thuhla tampi theih hnak in amah Jesuh Khrih rori theihfiang ding hi Evangelist pakhat hrangah a thupi bik kan tinak khal a si. Himi vek cekci in Philip khal cun Nathanael parah a rak tuah.

            Cule Nathanael le Jesuh Khrih an tonawknak ih thil cangmi khal ruah ding thupi zet pakhat a si ve. Nathanael in Jesuh Khrih tong dingih a feh tik ah a ton ngah hlan ah Jesuh Khrih in a sinak vek cekci in a rak thei dekdek cia zo. Curuangah “hrokhrawlnak thinlung a nei lo mi Israel mi taktak hi zoh hnik uh!” a rak ti top. Cutikah, Nathanael cu a mang a bang ih ziang tin so i theih tiih a suh tik ah “Philip ih a lo kawh hlan theipi kung thuai ih na to kha ka lo hmu zo” a rak ti. Hitawk zawn ah theipi kung thuai ih to timi in sullam thuk zet a neih thu run rel bet a tul ding. Kan Bible in himi thu ah theipi kung a timi hi mirang cun fig-tree ti a si ih hnemdai zet mi thingkung pa khat a si. Curuangah kannih lam ah cun theipi kung ti hnak in ruanri kung kan ti le a kaih sawn a bang. Israel mi pawl hrangah cun himi thingkung tang ih um timi in daihnak a khih hmuh ringring. Cumi thu cu 1King 4:25 le Micah 4:4 sungah fiang zet in kan hmu thei. Cule himi kung tang ah to tahrat in Pathian thu ruat in caan an rak hmang theu. Nathanael khal cu Pthian ih kam cia mi Messiah ratnak ding thu pawl ruat in a to ding zum a um. Curuangah Jesuh Khrih in a thinlung um mi pawl a rak theih sak tikah a mangbang in “Sayapa Nang cu Pathian Fapa na si; Israel ih Siangpahrang na si” ti’n a aupi top. Cutikah Bawipa in ‘theipi kung thuai ih na to ka lo hmu ka ti ruangah maw i zum. Cuhnak ih thil maksak tampi na hmu lai ding. Van a ong dingih Milai Fapa parah vancungmi pawl an tum le an kai rero nan hmu ding’ a ti. Himi a ti tikah kan Bawipa in Gen 28:12 sungih Jacob ih a mang ih kaililawn a hmuhnak thu hmang in mi hmuahhmuah hrangah Vancung fehnak lamzin a sinak thu a rak simfiang duh mi a si. 

            Thazang lak khawm ding ka duh mi cu, kan Bawipa hi kan ziangkim thei thluh tu, kan sinak vekih in cohlang ringring tu Pathian a si timi hi kan nun ah hmuh fiang ngah ding hi a thupi tuk. A thuhla lawng zingzoi rero ih aupi rero tu men si ding hnakin amah rori theifiang ngah tu le a tong ngahtu si ding zuam cio uh si. Culawng ah Philip le Nathanael vek in midang hnenah kan Bawipa kan tawm thei dingih Amah hnen ah midang khal kan hruai thei ding a si.