Thudik, thuhman ruangih lu tan tuartu John the Baptist thu

Tuini thuthangtha kan siar mi Mt 14:1-12 sungah Jesuh Khrih ih thuhla a theih tikih Herod ih thinlung sungih umtudan te kan hmu fiang a si. Jesuh Khrih ih mangbangza a tuah thu pawl a theih tikah Herod cun amah rori ih hngawng tan a rak fial mi Johan Baptista a thosal a si ti’n a ruat ih tihphannak thawn a khat. Ziangruangah Herod ih thinlung sungah tihphannak a lut ti kan ruat hnik pei.

Mk 6:20 sungah cun Herod in Johan Baptista kha miding le mithianghlim a si ruangah a tihzah ih a upat zet tin kan hmu. Asinain, acuih a tihzah le a upat zet mi pa cu a rak that ngah tariai. Cule, ziangruangah a tihzah le a upat zet mmi a rak that fial ngah pang ti kan vun zingzoi bet tikah a duhdawt tuk ruangih a rak thit mi a naupa Filip ih nupi, Herodias ih thinlung thatlonak ruang bik ah ti kan hmu fiang. Culawng silo in, Herod ih palhmi pakhat cu, a suahni lomnak puai ih Herodias fanu Salome ih laam mawite a hmuh ruangih a lungawi tuk caan te ah ziang ruat lem lo men ih ol tein thukamnak a rak tuah mi hi a si.

Khat lei lam zawng ih kan zoh tikah zuu a mawng khal a si thei; ziangruangah tile suahni lomnak puai tuah rero laifang a si. A lungawi tuk caan te ih ziang ruat tuk loih ol ten thu a rak kam vek cun, a duh nalo in, a mileng pawl hmaisong ah Johan Baptista ih lu cu Salome hnen pek dingah thu a rak pek. Asinain, minung hmaisong lo in Pathian tihzahnak thawn a thukam rak phelh ngam ta seh la a thinlung sungah tihphannak hnak in hnangam daihnak a hmu sawn thei mi a si.

Duhdawt mi nu le pa, u le nau pawl, Herod ih nun in ziang in zirh ti a si le:

1. Kan duhdawt zet mi pawl le kanmah thawn a nai bik mi pawl hmanin Satan pa in sual sung in thlen pi theu ti hi asi.

2. Riahsiat tuk caan lawng si lo in lungawi tuk caan khal ah ol ten sungphiatchiat siseh, thukamnak siseh, tuah lo ding.

3. Zuurit caan le zuu mawn caan ah sual sung tlak a ol ti mi in zirh.

4. Thil thalo ti thei nacing ih minung hmaisong ruangih tuah lo dingmi kan tuah le tuah dingmi kan tuahlonak in kan thinlung tihphannak in a khat ter ringring a si.

Add new comment

7 + 8 =