Thuh mi Hlawn thil kan si (sim tu - Rev. Fr. Lucas Tha Ling Sum) July 28, 2021

Thuh mi Hlawn thil kan si

Thuthangtha sim tu - Rev. Fr. Lucas Tha Ling Sum

July 28, 2021

Siarding: Ex 34: 29-35/ Ps 99: 5. 6. 7. 9 (9)/ Mt13: 44-46

            Zumtu u le nau, RVA ihsin kan lo hmuak a si. Nan hnenah Pathian ih remdaihnak thleng hram seh. Thuh Mi Hlawn Thil Kan Si, timi thu thawn thlarau thazang cahnak ka ron lo hlawm duh a si. Baibal kan ngai hmaisa hrih pei. July 28 sun ta a si. Matthai 13:44-46.

Vancung uknak cu lo sungih thuh mi hlawn thil bang tuk a si. Cuih hlawn thil cu mi pakhat khat in a hmuh tik ah tthaten a khuh ta ih lungawi aipuang in inn ah a neih mi hmuahhmuah kha a zuar ih cui lo cu a va lei, tiah Jesuh in a sim. (thuhmi-hlawnthil)

            Vancung uknak cu hi bang tuk hi a si. mi pakhat in lung mankung a hawl. A man a khung taktak mi lungvar a hmuh tikah a neih mi dang hmuahhmuah kha a zuar ih cui lungvar cu a lei, tiah a sim. (Lung mankhung)

            Himi cu Pathian ih ttongkam a si. Khrih Bawi paih hnenah thangtthatnak um seh law.

            Zumtu u le nau, Bawi Jesuh in vancung uknak cu thuh mi- hlawnthil vek a si. Cun vancung uknak cu lung mankhung vek khal a si e, a ti. Cun hitin a sim bet hrih: Cuih thuhmi hlawnthil le lung mankhung ih sunlawinak, tthatnak le man an neih nak a thei tu cun an neih mi thilri hmuahhmuah zuar ta hrat in cuih hlawn thil le lung mankhung cu lungawi ten an lei a si, a ti.

            Hi Bawi Jesuh ih sim mi thahtthimnak pa hnih te hi an tawi nasa. Thatthimnak a sim mi pawl lak ih a tawibik pawl an si. Asinan, a sim duh mi, a ti can an thuk ngaingai. Curuang hi tahtthimnak ih tican hi thuthangttha simtu pawl khal in a phunphun in an let; an sim.

A hrek in thuh mi – hlawnthil le lung mankhung hi Jesuh a si; amah le amah a khih hmuh awk mi a siih hlawnthil le lung mankhung pawl cu milai pawl kan si e, an ti. Cun mi hrek thu thangttha sim tu pawl in, aa a si lo; hlawn thlil le lung mankhung cu Jesuh Khrih a siih, cuih hlawnthil le lung mankhung cu milai pawl kan si sawn e, an ti.

            Ziangkhal a va silen tuitthum ah, khui mi sawn a dik ih khui sawn a dik lo a si, timi ah awloksong in kan caan hmang loin, thuhmi – hlawnthil le lung mankhung pawl a hawl tu cu Jesuh Khrih a si ih, cuih thuh mi – hlawnthil le lung mankhung cu kan mah a si, timi lam in thlarau thazang la dingin ka lo sawm. A tawi zawngih kan sim asilen milai hi man nei mi kan siih Jesuh Khrih in hawl ringring a si, tinak a si.

            Milai ih man kan nei zia thawn pehpar aw in Baibal (Sem ) sungah ziangtin kan hmu a si tilen: Pathian in milai cu a maih hmuihmel kengin a sersiam a si, timi kan hmu. Cun 1 Peter 1:19 ah hitin kan hmu hrih: nan nih cu Jesuh Thisen ih lei mi nan si e, a ti. Zumtu u le nau, Pathian hmai ah nang le kei man kan nei tuk timi fiangten kan hmu a si. Baibal ih in sim mi, thuhmi-hlawnthil le lung mankhung vek kan si. Curuangah Bawi Jesuh in khuavang kut sungih kan hlo ral men ding in siang hrimhrim lo. In pam hmai tuk. Curuangah Pathian a si nan, a thawm huham le a sawnlawinak hmuahhmuah cu tanta ta hrat in, hi leilung ah rungttum in, in hawl a si.        

            Satan lo sungih thuhmi nang le kei cu Bawi Jesuh ih lungawi zet in Kalvary tlangpar ah a thisen in, in lei zo a si. Lungawi in Pathian thangtthat sinsin uh si.

            Nan zaten Pathian in van thlawsuah lei thlawsuah lo pe hram seh. Amen.

Thla kan cam pei:

            Kan biak kan Pathian, nangmaih hmui hmel keng in sersiam ih nunnak thaw le thlarau in pek ruangah kan lung a awi. Santan kut sungih um tu le thuh mi kan si. Asinan na Fapa Jesuh in duhdawtnak thawn a thisen in in tlen ih mi sunglawi ah kan cang zo. Kan sunlawinak le kan man neinak thei ih, nangmah a lo riantu kan si sinsin thei nak dingin van thlawsuah le leithlawsuah in pe hram aw tiah, na fapa Jesuh hmin in kan lo dil a si. Amen.

 

 

 

 

Add new comment

1 + 2 =