Thuthangtha sim dingah (sim tu Rev. Fr. Peter Zin), April 10, 2021.

Thuthangtha sim dingah

Thuthangtha sim tu Rev. Fr. Peter Zin

April 10, 2021 (Thosal zarh zarhte ni)

Siarding: Tirh. 4: 13-21; Saam 118; Mk. 16: 9-15.

“Leilung khuazakip ah va feh uhla mi hmuahhmuah hnenah Thuthangṭha va sim uh.”

          Thuthangṭha a ngaitu Bawi Khrih ah duhdawtmi nu le pa, u le nau pawl, nan um nak cio ah Bawipa in lo um pi ringring hram seh la hnangam daihnak a lo pe hia hram seh. Tuni Thosal zarh Zarhte ah kan siar dingmi Bible pawl le tu hrawng ih kan siar mi Bible, Bawi Jesuh ih thihnak neh in a thosalnak thu pawl zoh in thlarau thazaang kan lak tlang dingin ka lo sawm duh. Tuni ih kan siar ding mi Bible pawl kan zoh hmaisa ta hrih pei. Veikhat siarnak ah Dungthluntu 4:13-21 tiang a si ih dungthluntu Peter le John in Bawi Jesuh ih hmin hmang in mina an dam ter ih thuthangṭha an sim ciamco tikah a zumtu khal an tam vivo ih cu tikah Jew miphun upa pawl, hruaitu pawl in Bawi Jesuh hmin hmang in thusim nawn lo dingin an kham hai. Cutikah Peter le John in “Nanmah ih thu thlun maw Pathian ih thu thlun so Pathian hmaiah a dik sawn, nanmah tein ṭhen hnik uh. Kanmah rori in kan hmuhmi le kan theihmi cu sim lo in kan um thei lo,” tiah an el nak thu a si.

          Gospel sung ah khal Bawi Jesuh a mah rori in leilung khuazakip ah feh in thuthangṭha sim ding in a cah nak thu kan hmu a si. Kan siar dingmi Gospel cu Marka 16:9-15 tiang a si ih Thosal ni in tuni tiang kan siar rero mi pawl a tawi zong in a tel ti theih asi. Kan ngai ta hrih pei.     

Marka 16:9-15 

Nipi ni ah thihnak ihsin Jesuh a thawh hnuah a hmaisabik ah Mari Magdalene hnenah a lang; Mari Magdalene cu a sung ihsin khawvang pasarih a dawisuahmi nunau kha a si. Mari Magdalene cu a feh ih a rualpi pawl a va sim. Cupawl cu Jesuh a thih ruangah mithi ngai in an ṭap rero. “Jesuh a nungsal zo, ka hmu a si!” tiah a sim tikah an zum lo. Cuih hnuah Jesuh cu dungthluntu pahnih khuate lamih an feh lai ah phun dangin an hnenah a lang. An kir ih midang pawl tla an sim, asinain annih khalin an zum lo. Netabik ah Jesuh cu dungthluntu hleikhat rawl an ei lai ah an hnenah a lang. Zumnak an neih lo ruangah le amah a nungin a hmutu pawl an zum lo ih thinlung ruh an neih ruangah a kawk hai. Cule an hnenah, “Leilung khuazakip ah va feh uhla mi hmuahhmuah hnenah Thuthangṭha va sim uh.” tiah a ti.

          A tu kan siar mi Gospel sungah Bawi Jesuh a thosal hnu ah hmaisabik a hmu tu Mary Magadene a si a tiih cun a rualpi le pawl, cu hnu lawngah dungthluntu pawl in an hmu ngah lai ti a si. Hi nunau pawl hi Thosal Thuthangṭha hmaisabik ih simtu ah an cang ta.  Hi tawk ah kan hmu thei mi pakhat cu Bawi Jesuh ton ding ah le a thuthangṭha sim ding ah leitlun minung hmuhnak lam ih fimnak le sinak pawl hi a thupibik a si lo ti hi hmuh theih a si. Tuni Bible veikhatnak ih kan siar mi sung khal ah mangbangza in mina an dam ter ih ral ṭha zet in thuthangṭha a sim rero tu Peter te hi fimnak le thiamnak a nei lomi mi menmen in ziangtin hi tluk rori in thil an tuah thei tiin khonsil upa pawl in khuaruah har in an um ti a si. Mary Magdalene le a rual le pawl in a thosal mi Bawi Jesuh a hmaisabik a hmutu le thuthangṭha a sim tu an si ngah nak hi an fimnak le an thiamnak ruangah si loin Bawi Jesuh an duhdawtnak ruangah a si. Peter le John khal cu mangbangza an tuahmi le ralṭha zet in Jesuh Khrih hmin in thuthangṭha an sim thei nak hi an fimnak le an thiamnak ruangah si loin Bawi Jesuh an hmu ngah taktak, an zum taktak ih an duhdawt ruangah an sim thei nak sawn a si. Curuangah Bawi Jesuh tette va khan ding le Bawi Jesuh thuthangṭha va sim ding ah hin fimnak le thiamnak hi a ṭha hnem zet nan a thupi bik a si lo ih a thupibik mi sawn cu a mah va ton ngah, va zum le va duhdawt ding hi a pakhatnak ah a thupi bik mi a si ti kan thei thei a si ti hi a pakhat nak ah ka sim duh.

          Cun a pa hnihnak ah Bawi Jesuh va tong ngah, a mah va zum ding le duhdawt ding khal ah a mah ih hmuh nak a ṭul ti khal cu kan hmu thei a si. Mary Magdalene in a hmai sabik a hmu tik ah a thei thiam lo, thlan kil tu ah a rak ruat. Bawi Jesuh in Mary tiah a ko hnu lawng ah Mary Magdalene in Bawipa a si ti a thei thiam lai. Emmaus khua ih a veh tu dungthluntu pahnih khal in Bawi Jesuh thawn an biak aw rero nan an thei thiam ve lo. Bawi Jesuh in netabik zaanriah an ei nak ih a tuah mi vek in sangphelnak a tuah hnu lawngah Bawipa a si ti an thei lai. Dungthluntu pawl hnen ah inn sungah a lang tik khal ah an thei thiam lo ih mithla kan hmu tiah an ruat. Bawipa in kei mah ka si a ti lawngah a mah a si ngaingai ti kha an thei fiang lai a si. Cu lo khal a dangdang ah a um lai. Bawipa a mah in a thei ter lo, an mit a vang ter lo a si le cu a dungthluntu pawl in hman in an thei thiam thei lo a si. Curuangah Bawipa amah kan thei theinak dingah cu a mah ih langternak a ṭul a si ti khal kan  thei thei a si. Minung mit men le minung ruahnak men in thlarau thawn pehpar mi thu pawl hi thei baan theih a si lo. Matthai Gospel sungah kan hmu mi ah, Bawi Jesuh thawhtersal a si nak hi nunau pawl lawng in an thei si lo in thlan kil tu ralkap pawl khal in an thei ve a si. Cumi nunau pawl cu Bawi Jesuh a thosalnak a hmaisabik tette khan tu an rak si lai ah ralkap pawl cu Puithian upa pawl le Judah hotu pawl hnen ah an sim ih cu tikah an nih khal in nawhthuh paisa an pek in thudik simlo ding in paisa thawn an ka an phit sak a si. Hi ralkap pawl in Bawi Jesuh ih thawhsalnak cu an hmu an thei ve nan minung mit le minung ruahnak lawng in a nungmi an si ruangah thuthangṭha simtu ah an cang thei ve lo a si. Curuangah minung mit ih hmu le ruahnak in a tawk lo kan ti ṭheu nak a si. A tu kan mah san khal ah Bible cu a ziang biaknak ti um lo in kan siar cio ih asinan kan hmuh daan a dang cio ti cu kan thei ṭheh ko ding. Minung mit men in siar hi thudik taktak hmu ngah dingah a tawk lo a si. 

          Duhdawtmi nu le pa, u le nau pawl, kan Bawipa Jesuh Khrih in “Leilung khuazakip ah va feh uhla mi hmuahhmuah hnenah Thuthangṭha va sim uh,” a ti a si. Hi kan Bawipa ih sim mi thlun in thuthangṭha sim ding ah cu a tu ih kan ruat tlang vekin leitlun lam ih mifim le mithiam siding hi a pakhatnak a si lo ih a mah zum ding, duhdawt ding le a mah ton ngah hmai sa ding ih a thupi sawn a si. A mah kan tong ngah thei ding khal ah cu a mah thotho ih langternak a ṭul a si. Cun a mah ih langternak kan titik khal ah Bawipa in a nih cu in thei seh a nih cu in thei hlah seh tiin a tuah mi si lo ih a thupi mi cu thinlung ṭha, zumduhnak nei ding hi kan mah minung lam in a ṭul ve a si. Zumduhnak thinlung a nei lo tu pawl cu an mit in an hmu asilole an thei hman ah Jew miphun upa pawl le ralkap pawl vek in an zum duh cuang lo ding a si. Kan zaten Bawipa in amah thuthangṭha simtu, a mah tette a khan tu kan si cio thei nak dingin kan thlarau mit in vang ter sak sehla  in hmang cio hram seh.

Fr. Peter Lal Zin Thang (Hakha Diocese)