Thuthup Nun Sim tu - Rev. Fr. David Mangte (September 19)

Thuthup Nun

Sim tu - Rev. Fr. David Mangte (September 19)

RVA ihsin thuthangtha a rak ngaitu duhdawtmi nulepa ulenau pawl nan zaten nan umnak hmun cio ah kan Bawipaih umpinak thawngin hnangam daihnak le thatlonak phunzakip sungih sin luatnak hmu cio hram uh tiah thlaza ka run lo cam sak hrih hai a si. 

Tucun kan laitlang ah kan cinmi thlaici lak in vainim tla cu kan lak theh cio thlang ruangah Pathian hnen ah lungawithu sim phah in fangcang cing ih bial tuah pawl hrangah tidai kan tul hrih vek in ruahti tha kan ngah hrih thei nak ding khal ah thla cam tlang hrih dingah ka run lo sawm hai a si.

Tuini September 19 hrangih a voikhatnak ih kan siar mi Cathianghlim cu 1Kor 15:35-37, 42-49 sungta a si ih Paul in mithi pawl ih thawhsalnak thu a rel tikah thlaici cu a thih ta lo ahcun a kho dah lo timi thu thawn petlaih in a simnak thu kan thei. Kan Bawipa Jesuh Khrih khal in Jn 12:24 sungih amaih thihnak ding le a thawhsal ding thu a rel tik ah thlaici tuh mi thawn a tahthim awk thu kan hmu thei. Curuangah nunnak ngah dingah thih ta tengteng a tul ti cu a fiang. Himi a pom taktak ih a zum taktak tuih hrangah cun thihnak hi tih ding a um thei ding maw si? Thih kan tih theu hi ziangruangah si pei? Nunnak ngah ding cu kan duh cio ko nan thihnak le kan tih fawn si. A ngaingai ih ti ahcun lei par ah tha teih a nung tu cun nunnak ka ngah ding timi an zumawk ruangah thih khal an tih lo. Nang le kei teh thih kan tih lai maw? Kan tih lai a si ahcun kan nun hi thlengawk a tul lai ti cu a fiang. 

Tuini Gospel kan siarmi Lk 8:4-15 sung khal ah kan Bawipa in a hnenih ra pan tu misenpi hnen ah thlaici vorhtu pa ih thlaici thuhla tahthimnak hmangin thu a simnak kan thei. Hi tahthimnak a sim theh ah “theihnak hna a neitu cun thei uh” a ti. Hi theihnak hna timi hi ziang a si pei? Hna ih theih men a si lo ding zum a um. A tongmi cu an thei cio ko nan a duhsan cu zohman in an thei lo. Curuangah a dungthluntu pawl in an suh tikah kan Bawipa in “Pathian Uknak ih thuthup theih theinak cu nan hnen ah pek a si zo; asinain midang hnen ahcun tahthimnak thawn lawngin sim a si ding. curuangah an zoh rero ding nain an hmu thei lo ding, an ngai rero ding nain an theithiam lo ding” ti’n a rak sim. Himi kan Bawipaih tongkam kan zoh tikah Vanlam thuthup thei thei ding cun amaih hrilmi si a tul zia a langfiang. Pathian ih hrilnak le bomnak tel lo cun Vanlam thuthup theih a theih hrimhrim lo. Hi tahthimnak ih tican khal a hrilmi a dungthluntu pawl ih an rak phuan sin ruangah kan theihthiam mi a si; a va ropi em. Thlaici ih tican cu Pathian tongkam a si ti kan thei zo; a tuah kan nun ter ih rah kan rah ter ding lawng hi a tang.

Pathian zangfahnak ruangah amaih hrilmi a palai pawl ih zirhnak le simphuannak thawngin kannih khal in a tongkam cu kan co ngah ve ih a thuthup khal in hlawm. Asinain, mi hrek khat cu lamzin par ih a tla mi thlaici vek in zum duh lo le pom duh lo in kan um hrih lai; a va poi lawm mam so. A thuthup taktak cu amaih hrilmi pawl hnen lawngin ho khaw kan theih thei ding; minung ih hrilmi pawl hnen in vanlam thuthup theih a theih lo. Himi hi kan ralrin that a tul nasa ding. Pathian ih hrilmi le minung ih hrilmi hi kan thleidan thiam ding a thupi zet. Pathian ih hrilmi lak hman ah dungthluntu pawl in Jesuh thawn an umtlang ringring vekin Pathian thawn pawlkomawknak nun nei lo tu hnen ahcun vanlam thuthup theih theinak huham hi a um rei ve lo ding.

Mi hrek khat leh cu Pathian tongkam thawngin a thuthup pawl kan thei ih kan pom nan, hniksaknak kan ton taktak tikah Pathian kan dungtun sal theu. Cuvek pawl cu lungsedaap lakih a tla mi thlaici vek kan si mai. Minung le minung lakih remawklonak (luuhmuhyi pyahtana) men ruangih Pathian dungtun tu pawl khal lung sedaap lakih tlami thlaici kan si thotho ko lo ding maw? 

Mi hrekkhat cu Pathian tongkam ih zirhmi vanlam thuthup a thei nain, cuih thuthup ih zirhmi nun cih thei lo’n leipar ih lennak zuanah si maw; asilole, leitlun tisa nomnak zuan ah si maw; asilole, leitlun thil ruangih beidonnak in si maw kan nunram kan hmang tikah kan nun ah Pathian tongkam rah a nei thei lo ih hlingbuur lakih tlami thlaici vek kan hluan theu. 

Nang le kei hrangih kan Bawipaih in duhsak mi cu Pathian tongkam thawngih kan theih mi vanlam thuthup hi a netnak tiang rah nei thei ko thinlung tha thawn a pom hngettu kan si ding hi a si. Hitawk zawnah thinlung tha a timi hi a thupi zet. Pathian tongkam a khoh that ih rah a rah dingnak leilung a timi cu kan thinlung hi a si. Thinlung siavia lakah Pathian tongkam rah a rah thei lo. 

Tuini ah nang le kei kan thinlung hi lungsedaap maw, hlingbuurpi thawn a khat mi maw, lei ram tha ha a si ti vun cek aw cio uh si. Lungsedaap a va si ah siseh, hlingbuurpi thawn a khat mi a va si ah siseh, leiram tha si ter sal dingah a tlai hrih lo. Jesuh Khrih hnen pan in thlawsuah dawm thawn lungsedaap thinlung cu leiram tha ah can sal in thlacamnak thawngin hlingbuurpi khal sial fai tum uh si. 

Avoi khatnak ih kan siar mi le kan Gospel vun zoh ton hnik seh la thlaici cu a thih ta lawng ah a kho ih rah a rah thei ti a si. Kan Gospel ah le cuih thlaici cu Pathian tongkam in ti lala fawn; cuih tongkam kan thi ter lawk ding tinak a si pei maw ti ruah ding a um. A si lamlam lo; kan thih ter hmaisa dingmi hi Pathian tongkam si lo in, kan maih tisa duhnak sawn a si. Cumi kan that hmasak lai hlan lo Pathian tongkam hi kan sungah a nung thei lo ih rah khal a rah thei lo.