Ti thuknak lam ah vorh aw (sim tu - Rev. Fr. David Mangte) September 1, 2022

Ti thuknak lam ah vorh aw

Thuthangtha sim tu - Rev. Fr. David Kap Cin Mang

September 1, 2022

Siarding: 1 Cor 3: 18-23/ Lk 5: 1-11.

            Nan rak dam cio ko maw? Bawi Khrih hmin in cibai ka run lo buk hai a si. Nan dam cio ko ding timi ruahsannak thawn Bawipai pek mi hnangam daihnak in lo zel cio hram seh tiah nan zate hrangah thlacamnak ka hlan a si.

            Hmaisabikah September thla sung in thleng tertu Pathian hnenah lungawi thu sim phah in tui thla thar hin thatnak le lungawinak thluasuah pawl in thlenpi ding khal in Pathian hnen kana p tlang cio pei.

            Tui tum ah “ti thuknak lam ah vorh aw” timi thulu hmangin hlawmawknak run neih ka duh a si.

            A veikhatnak ih kan siarmi Cathianghlim cu 1Kor 3:18-23 sungta a si ih Gospel ih kan siarmi cu Lk 5:1-11 sungta a si.

            Tuini Gospel kan siarmi sungah kan Bawipa in Peter ih lawng hmangin tili kap ih ummi misenpi pawl thu a zirh timi thu kan thei. Kan Bible tha teih kan siar a sile, tili kap ih hrenmi lawng hi pahnih an si nan, kan Bawipa in Peter ih lawng bikbik a hrilmi a si. Fathers of the Church kan timi Kawhhran hruaitu hmaisabik pawl san lai ahcun Peter ih lawng timi ih sullam a neih zia hi an rak thupit zet. Lawng timi in Kawhhran a sawhkhih ih Peter ih lawng a hrilmi hin Peter ih thuneihnak pawl a sawhkhih thu pawl an rak sim theu. Tu lai san ahcun kawhhran tla tampi kan rung thenthek celcel tikah ‘Peter ih lawng’ timi ih sullam a neih zia tla rel a si tuk lem nawn lo.

            Tui tum ih kan thupit duhmi khal Peter ih lawng hnakin kan Bawipa in Peter hnenih ‘ti thuknak lam ah vorh aw’ a timi sawn a si ding.

Kan Bawipa in Peter hnenih ti thuknak lam ih sur vorh a fial tikah, Peter in “Bawipa zanvar teima zetin kan vorh zo nan zianghman kan awk lo” a rak ti. Asinain, cuti’n el men lanta lo’n Nangmaih vorh ding in ti ahcun kan vorh ko pei cu ti’n thungainak thawn an vorh ngaingai tikah an ruah ban lo in nga tampi an kai ngah ti a si.

            Hi thil cangmi hin thu tampi in zirh a si. Hmaisabik ah thungainak ih thupit zia in zirh. Peter le a rualpi pawl hi ngakai ih pum cawm mi an si. Khuitawk ah nga a um thei ding ti khal anmah le tawk in an thei ko. Sinan, anmaih theihnak men ring lo’n Bawipai tongkam ngai in sur an vorh tikah an theihthiam ban lomi mangbangza thil a thleng mai. Minung ih theihnak le thil ti theinak cun ramri a nei, a tawp thei. Asinain, Bawipai’ huham cahnak cun tawp ni a nei lo, ramri khal a nei lo.

            A pahnihnak ah Bawipai telpinak ih thupit zia tla in zirh. Kan Bawipa amah rori Peter ih lawng sungih a tel ve tikah an lawng pil lo te’n le an sur tlek lo te’n nga tampi an kai ngah. Thil pakhatkhat kan tuah ding tinte’n Bawipa kan sawm hmasak thiam ding a thupi tuk.

            A pathumnak ah, hnatuan tlangnak/ lungrualnak ih thupit zia khal in zirh. Ziangahtile, khai an awh ngahmi nga pawl tha te’n la ngah dingah Peter in a rualpi pawl ih bomnak a tul a si. Cutivek thiamthiam in, thlarau hlo tampi kai ngah thei dingah midang ih bomnak a tul theu. Tahthimnak ah vun sim sehla, mi pakhat ih mission hna tuannak ruangah thlarau tampi sur in a huap ngah ko nan, rundam an si ngaingai thei ding cun, mission pehzulhtu le bawmtu a rak tul theu. A pehzulhtu um lo ruangih runsuak ngah lo mi thlarau tampi an um thu khal kan thei cio ko ding.

            Cule ti thuknak lam ih vorh timi hin kan thlarau nun hrang khalah sawhkhihmi a rak nei ve. Himi thu thawn pehpar in Pope St. John Paul II cun ‘Christian nun kan nei taktak maw taktak lo timi cu ziang tluk in kan thlacamnak a thuk timi in a langter’ ti’n a rak ti dah. A thukmi thlacamnak kan ti tikah, thinlung tak rori ih thlacamnak kan ti duhsan mi a si.

            Himi a thukmi thlacam nun neih lo ahcun Bawipai’ kawhnak aw theih a har ih in hmuitin sakmi hlen ngah ding khal a ol nawn lo. Cuvek can ah beidonnak in in neh theu ih nun paih nawn lo tiang in tuah theu a si.

            Ahleice in, tui kan san hi modernism (san tiluan dawinak), materialism (leitlun thilri lawng rinsannak) le consumerism (thil thar suakmi tin lei duhnak) tivek pawl in in namnuai tuk tikah, a thukmi thlacam nun kan neih lo pang a si ahcun, kan thlarau sunral a ol te a si.

            Kanmaih thlarau sung lo dingah le thlarau hlo pawl kai thei dingah ti thuknak lam kan pan cio pei.