Tihnimnak Petu Johan ih Thihnak Thu

Tihnimnak Petu Johan ih Thihnak Thu

Feb 3, 2023
Marka 6:14-29 (Tihnimnak Petu Johan Thihnak)

        Zumtu u le nau, nan zaten Pathian in a thar in thlawsuah lo pe hram seh. Tuittum Febuary thla ni 3 sunih kan siar mi Baibal cu Mark 6:14-29 a si ih ‘Tihnimnak petu Johan ih Thihnak thu” a si.Tihnimnak petu Johan hi Baibal ih in sim vek in miding, mifel le Pathian in hman zet mi, Bawi Jesuh ih lamzin sial tu a si. Curuangah a thuthangttha sim mi ngai ih a dungthlun tu tampi an um. Herod siangpahrang pa hman in tihnimnak petu Johan ziangtluk in a upat a si timi thawn pehpar aw in hitin Marka in a ngan: “Herod in Johan cu a ttih ngaingai. Ziangah tile Johan cu mittha le mi thianghlim a si ti a thei. Curuangah a hum ttheu.
         Johan ih thusim mi a ngai tinten a thin a nuam dah lo, asinan a thusim mi ngai cu a duh thotho” (Mk 6:20). Curuangah Johan hi Bawi Jesuh thawn mitampi in an tah tthim ttheu. Bawi Jesuh cu miding le mitha asinan, misual pawl ruangah thahnak a tong. Cuvek thotho in tihnimnak petu Johan khal cu miding le mitha asinan, misual le mitha lo ruangah thahnak a tong. Johan hi ziangtin thahnak a tong timi, malten a tawizawng in
von zoh bet hrih uhsi. Herod siangpahrang pa in a naupa Philip in nupi Herodias a tthit.

           Ttongdang ih kan sim asilen Herod siangpahrang pa in miih nupi a daw ih, a fir sak, a lon sak, tinak a si. Pathian Thukham Pahra sung ih a pakuanak, mi nupi mi fa te tla khi dawtnak thinlung na nei lo pei, timi a thlun thei lo tinak a si. Curuangah Johan cun Herod cu siangpahrang asinan tthih lo le hmaisong lo in hitin a sim: Na naupa Philip in nupi Herodias na tthit hi a dik lo a si, a ti. Asinan Herod siangpahrang pa cu a thin a heng ngam lo. Daite in a um. Asinan, a nupi Herodias cu a thin a heng tuk. Johan cu a hua, a mit a kem zet, ziangtin ka that thei pei ti a ruat. Herod le Herodias ih fanu cu a pa Herod ih suah ni lomnak puai ah mipi hmai ih ttha zet le mawi zet ih alam thei ruangah a pa Herod cu a lung a kim tuk. Curuangah na duh pohpoh i dil aw, ka lo pe ding a si, tiah a fanu te cu thu a kam. A fanu cun ziang mi dil ding a theih lo ruangah a nu Herodias cu a va sut. A nu cun, ee, van tthat, hleuh hli, a ti ih, Johan in lu ka duh, tiah na pa Herod dil aw tiah, hmakhat ten a fial. Cuticun an fanu Salome cun Johan ih lu cu a dil. A pa Herod cu a thin a nuam lo zet nan a thukam mi pelh ter a duh lo ruangah a hnen um ral kap pakhat cun thawngin ih um Johan ih lu tan aw la pakan in ka fanu pe aw tiah a fial. Cun a fanucun Johan ih lu cu a nu Herodias a pek sin, a si tiah kan Baibal in in sim.
             Zumtu u le nau, Herodias in a fanu ih thu suh mi cu “awl ai tuk le zamrang tuk” ih a sim hngalk ruangah Herodias in ziang hmuahhmuah, tthimnak ah a pasal Herod ih suah ni lomnak puai kan tuah dingih Johan thah
theinak caan ttha a um ko ding tivek pawl hi a thup ten tumtah nak a nei cia a si ding, tiah Baibal ca thiam pawl in zumnak an nei. Ziangkhal a va silen, Herod siangpahrang pa in Johan thah cu a ttha lo a si ti a thei; a nupi Herodias khal in Johan ih lu dil aw tiih a fanu a fial mi hi thil ttha lo a si ti a thei: cun an fanu te khal in Johah in lu dil ngelcel cu a ttha lo a si ti a thei ve ko. Asinan, vansiatnak ah an pathum in cui thil ttha lo cu an hrial thei lo a si. An sungkurun in khuavang tukforh nak an do neh thei lo, tinak a si. Zumtu u le nau, thil ttha lo khuavang tuk forh`nak do neh thei dingin Pathian in nan zaten zumnak le
thlarau thazang cahnak lo pe hram seh. Amen.