Tirhthlah Na Si

April 14, 2020 hrangih Thuthangttha, Thlarau rawl

Tirhthlah na si

Thosal zarh, tlawngkai nihnih ni (April 14, 2020)

Siarding: Acts 2:36-41; Ps 33:4-5, 18-20, 22; Jn 20:11-18.

• Tuisun kan siarmi thuthangttha cu Zuknung zoh in zoh sehla cu Mary Magdalene le Jesuh kha lemcang thupibik dinhmun ah an ra lang lohli in kan hmu ding. Amah lawngte tucu lem cang caan siloin a cang ngaingaimi kha kan mitthlam ih lang vurvo ko John in fiang zetin in sim a si.

• Mary Magdalene cu Zarhpini zingpit ah Bawipa ih thlanah a va feh.

• Kan lai nunphung kan zoh a si le mithi thlah kan ti ih thlan kan va hal ttheu. Cuvek dinhmun a si, Mary Magdalene khal cu a duhdawtmi a Bawipa ih thlan hal dingin a rak feh ve.

• Thlan kan halh tikah lungawi sopar le, hni le khek in kan feh lo. Kan riah a sia. Thlan kan hmuh tikah kan thinlung ah lungawinak hnakin ningahnanak a ra um sawn.

• Cuvek thotho in thihnak thu kan ruah tikah lungawi sopar in zokhal kan um thei lo, kan ning a hang, kan riah a sia. Mary Magdalene khal cu lungawizet ih thlan va feh cu a si ve lo, riahsia cia in a feh. Cubet ah thlan a va thlen tikah a Bawipa ih ruak a va hmuh lo tikah a riahsiatzia cu a zual sinsin ding.

•  

• Thlan ah Bawipa ih ruak a um nawnlo ti a hmuh ko nan, "a thosal zo" ti a rak ruaat ban lo. Vangcungmi in an rak sim ko nan, a rak zum lohli ve lo, an thuh hlo si hmang a ti. Cuticun thlan khar a rak ongaw a hmuh le miruak um nawnlo a hmuh cu thildang khal ruat thei nawnlo in a um, a ttap.

• A ttahnak thuhla an sut tikah, Vancungmi ih a sut caan khalah siseh, amah Bawipa ih a sut caan khalah siseh minung ngai zet in "ka Bawipa a um nawn lo" ti ah a sim.

• Amit in Vangcungmi a hmu ko, Bawipa Jesuh khal a hmu ko, asinan vancungmi an si le Bawipa a si ti a rak thei thiam lo.

• Ziang ruangah a mit in a hmu na cing in a theilo a si pei? Mary Magdalene ih thinlung mithlam ah mi ruak umlomi thlan lawng a ra lang, a thinlung ah riahsiatnak lawng in a khat. Cutikah thil dang le thudang ruat thei nawnlo in a riahsiatnak in a khuhneh thluh. Curuangah mit in hmu cingin a rak thei thiam lo.

• Himi zawn ih kan ralrin ding mi ah "Kan riahsiatnak le kan tlaksamnak ih in ciahneh, in khuh thluh a si le Bawipa ih sunlawinak cu kan mit hnuaiah um khal sehla kan hmu thei nawn lo."

•  

• Kan riah a siat tikah kan ttap ttheu. "Ttap" ti hi malte ruat ta uhsi.

• Lazarus a thih thu ah 'Bawipa cu a ttap' (Jn 11:35) ti kan hmu. Amah Bawipa rori in Lazarus a duhdawt ruangah siseh, a farnu Martha le Maria pawl thawn an nelawk thu le a zang anfak thu ruangah siseh, Bawipa cu a ttap. Bawipa in a tuarpi ti alang.

• Naim khua ih nuhmeinu cu a fapa neihsun ih a thihsan tikah a ning hang in a ttap. Cucu Bawipa ih a hmuh tikah a zang a fak tuk ih "ttap nawn hlah" ti tahrat in cui mithi cu nunnak a pek sal (Lk 7:11-15) ti kan hmu.

• Himi pahnih kan zoh a si le "Ttap" ti cu kan mai tuarnak simaw, midang ih tuarnak simaw langtertu a si. Tiduhsan cu "hmuhnak, langnak" a si.

• Curuangah "kan mitthli hi kan mit in huptu si hlah seh."

•  

• Mary Magdalene cun ziang tik caan ah a Bawipa cu a thei sal? Bawipa in "nunaunu" a ti laiah Magdalene in a bawipa a si thu a rak thei lo. A kum kum ih a rak thlun rero mi ih aw le kam, rual le pi sinak men hnak ih a rak naih aw mi pehtlaihnak arak um nan cui aw cu a rak thei thiam cuanglo. (Jn 10: 4) ahcun "Bawipa ih aw cu a tuu pawl in an thei" a ti si, Maria Magdalene cun Bawipa cu a rak thlun ngaingai lo a si pei maw? A rak thlun ngaingai ruangah a thlan tiangah va feh in a Bawipa a va hawl ti cu a fiang.

• Bawipa in "Mary" ti ih a hmin thawi a kawh cun Magdalene khal cun a Bawipa a si ti a thei cih. 

• Minung ih kan hmin hi a rak thupi. Mifim mithiam pawl in "kan nih in kan hmin ti lo bak neih mi ngaingai kan nei lo. Kan neih le kan siah cu kan thih cun midang hnenah a thleng, asinan kan hmin cu a tthat khal le a siat khalle kan thlan tiang, kan leh le hnu tiang in thlun vivo in a taang vivo" ti ah an ti.

• Naute thar kan neih cun hmin kan pe, cui hmin cu a mai bulta a si.

• Thei aw dahlo kan ton awk tikah "hmin kan sut aw." Ziangah ti le cui hmin cun "zo ka si" timi a khih hmuh.

• Curuangah "hmin" timi cu pakhat le pakhat peh tlaih awknak ih kan hman mi kan maia "tabul" kan neihsun a si. Kan theih awknak le kan pehtlaihnak fektertu a si.

• Bawipa cun "Mary" ti ih a kawh ve ten Mary khal cun Bawipa ti a thei cih. Tu ah nang le kei khal Bawipa in kan mai hmin rori in in ko ve. A aw thei in pan aw.

•  

• Mary Magdalen cun a thokah a ning hang in a ttap, a Bawipa a hmuh nawn lo tikah a riah a sia. Asinan cui a bawipa cu a thosalzo ti a hmuh tikah a riahsiatnak le ttahnak hmuah cu a hngilh thluh ih a lung a awi thei sal.

• Jesuh ih thawhsalnun kan theih le kan neih hnu cun kan hnenah "lungawinak" a ra kir sal. Mary Magdalene bangin kan hlim thei thlang.

• Tui hlan sung hmuahhmuah Jesuh ih dung thlun in a caan a rak cem. Tu cu a dung thlun men a sin awn lo. Bawipa in "ka unau pawl va sim aw" tiah a tirh. Dunthluntu ihsin tirhthlah ah a cang. Thosal nun a neitu ih hrang ahcun Jesuh ih hnen ih safe vek ih bek feufeu ding men sin awn loin Jesuh ih thihnak a nehnak thu, a thawhsalnak thu pawl cu phuang dingah fial le thlah a si zo ruangah mahte nun a ngah nawn lo.

• Thosal Jesuh a neitu le a hmutu cu anmai hrang lawng siloin midang khal va sim bet dingah thlah an si - mission an nei. Nang khal cu veih thlahmi na si.

• Mary Magdalene cu Bawipa ih thawhsal thu vancungmi ih a rak sim hmanah a rak zum lo, amai a hmuh a ton tik lawngah a zum.

• Peter in (Acts 10:41) ah "Amah thawn kan ei kan in tlang" a ti tikah mi tampi in Bawipa ih thawhsal thu an zum.

• Nang mai nun ih hmuh theihmi thawhsalnun ruangah mi tampi in zumnak nei in thawhsalnun nei ve hai seh.