Tlangpar kan kai pei

Tlangpar Kan Kai Pei

Sim tu - Rev. Fr. Polycarp Thawngte

          Zarhpi ni a pehpeh in Baptism thu ka lo relpi ih hrekkhat cu a ning tla nan ning men dingih tui Zarhpi cu Cathianghlim kan siar mi sungin kan ruat tlang ding.  Rawl thawbik le cabitti thawbik umnak hmun feh nan paih maw?  Kan feh le kan ei thei ding kha a si mai, a duhlo kan um ding ka zum lo.  Nan bang zet men ding nan, acuih rawlthawbik le cabitti thawbik umnak hmun, tlangpar kai ka lo sawm duh.  Cuihtlang cu khuiah maw a um; a nai le cu ka feh paih nan a hla tuk le ke thawi feh tul a si ah cun ka kai paih lo ti tu khal kan um ding.  Rilrawng na cingin rawl umnak hmun kan pan lole rilrawng in kan thi ding; rawl in khaihtu ding pawl Covid ruangah Quarantine an lut theh an ti.  Kanmah rori feh in cuih rawlthaw le cabitti thaw cu ei tlang, in tlang in thazaang thar kan la tlang pei uh.  

          Tuini ih Cathianghlim vei-1nk kan siarmi (Is 25: 6-10a) sung ah, Hitawk Zion Tlang parah hin Cungnungbik Bawipa in leilungtlun ramkip le miphunkip hrangah rawl ei puai a tuah ding. Cui rawl ei puai ahcun rawl thawbik le sabit thawbik an pe ding.  7Hi tlangpar ah hin ramtin le miphun tinih riahsiatnak cu mero bangin a kiangter ding. 8Cungnungbik Bawipa in thihnak cu kumkhua in a hloral ter ding. Mi hmuahhmuah ih mitthli a hnul dingih leilungtlun khuazakip ah a minung pawlih an tuar mi mualpho ningzahnak cu a lak hlosak ding. 

          Hih Cathianghlim cu tulai kan boruak thawn a kaih aw zetmi le kan hngahhlap zetmi a si tin ka ruat. Ziangtik ni ah, khuitawk hmun ah a fam kim ding; Bawipai Zion tlang cu khui ah a um? Himi kimnak ding, Zion thlen nak ding lamzin-1, kan dungte ah Pope Bawipa in in hmuhmi cu “Fratelli Tutti” timi, minung hmuahhmuah in unau za kan si zia hngilh lo ding ralrin peknak encycliclal cakuat kha a si.  Asinan, unauza kan sinak a hnget tertu rawlkho hil tlangnak ih thupit zia hi tuini ah rel tlang ka duh.  Kannih Laimi hrang hrimhrim ah cun rawl-ei sawmawk hi kan sunsak zet mi le kan tuanvo pakhat asi kan ti le a sual lo ding.  Curuangah tuisun ih kan Cathianghlim siarmi hi kan thinlung sangka in ong theitu dingbik 1 asi in ka hmu.  Kan thinlung sangka kan on theilo pang ahcun Thuthangtha kan siarmi (Mt 22:1-14) sungih Mopuai rawl-ei sawmmi si cing ih a feh paihlo tu thawn kan bang aw pang pei maw ti hi phan a um a si.

          Bawipa in Vancunguknak tahthim nak a pek tikah rawldonak puai thawn tahthimnak a pek mi cu kan hrangah a sunglawi hlei ce ih kan zumnak thu in zirh fiang bik tu khal a si.  Tulai boruak ruangah Bawipai Mopuai rawldonak, Tuufa ih zanriah hil tlang theilo kan si mi hi thil poimawh pakhat a si.  Kan hrangih poimawh lo ih kan hmuh ah cun mitui kan sim mi puaisawm mi ziang rel lo tu pawl kan si ding.  Cu ruangah himi Tuufa ih rawldonak puai sunglawi a umnak hmun cu Bawipai Zion tlang a si ta mai.  Tulai tikcu ah feh har zet a si men ding, a bang tla kan bang zet men ding; asinan, kan thlarau nunnak hrangih rawlthawbik le sabitti thawbik a si vekin a feh theinak, a cang theinak hmun ih um pawl hin, cang theilo le feh theilo lawlaw pawl hrangah kan ei kan in sak cem ding ka duh.  Cucu unauza kan sinak kan theih hngilh lo nak a si.  Thlacam sak awk ding tal cu kan mang cio pei uh. 

          Cun hi rawl-donak puai tuah theihlo le, tel theih lonak hmun pawlah hin kan neihsun le kanmah te kan innsang cio ih kan rawl thawbik a simi Rosary Thlacamnak, Bawinui rawl-donak puai hil khawm tlang thiam ding khal ka forh aw duh bet.  Tui thla cu a hleice ih Rosary thlacamnak thla a si bangin kan innsang cio ah himi thlacamnak hmangtlang in a rang thei tawk ih Bawipai rawl-donak puai kan zawh, kan hil tlang thei cionak dingin khat le khat bawm aw ton uh si.  Cun, Rosary thlacamnak timi ah Bawipai pekmi rawl asi mi a Tongkam a tel ti hi hngilh siang hlah uh si.  Vancung um kan Pa le Ave Maria ti lawng kha sal zualzo men lo in Mangbangza thuthuk pawl a cang thei le Cathianghlim thawn ruat tlang in Rosary thlacamnak kan hman thiam ding tla a cu tuk zo asi.  Cuti asilo ahcun kan unau dang pawl in Bawinu Maria nan biak in ti le kanmah sawn mawh phurtu kan si ding. 

          Bawipai Zion tlang, rawlthaw bik le sabitti thawbik umnak hmun hi Biaktheng thianghlim a si ko nan, kan ei kan in nak taktak cu kanmai thinlung a si; curuangah cuih Biaktheng kan pan theilonak tikcu caan ah kan thinlung sungah Zion tlang sersuah a tul; kan thinlung Zion-tlang ah rawlthawbik le sabitti thawbik kan ei theinak dingin angaitu le a simtu kan zate parah zumnak thluasuah a thar in thleng hram seh! Pa le Fapa le Thiangthlarau hmin in.  Amen.