Tuah uh Pahra (10)

“Tuah uh (10)” pahra thu ruat khawm tlang uhsi (Rev. Fr. Pius Cung ih Thuthangtha sim mi)

          Thuthangtha hlawm aw tlang thei ding ih dam nak le can tha in pe tu kan Pathian a hmin thangthat si ko seh. Amen. Tui sun ih kan siar mi, James1:19-27 sung ihsin “Tuah uh (10)” pahra thu ruat khawm tlang uhsi.

1. Cing ring ring uh:

          “Hi thu hi cing ringring uh” in ti. Ni tin nun nak ah thu hla tampi kan tong. Kan hmuh ton mi hmuah hmuah cu cin ken thluh cawk an si lo. Asinan thu hla thupi deuh cu “cing ringring aw, hngilh lo ten aw” kan ti aw theu. Pathian thu le zum nak nung hi a thu pi tuk, a sung lawi tuk. Ps 8:4 ah milai hi ziangso asiih na seherh ringring” ti kan hmu. In cing ringring tu Pathian kan neih hi cing ringring uh si.

2. Thu theih nak ah zam rang uh:

          Pathian thu hla hi zir kim, thei kim thluh ti a um lo. Zir bet, hawl bet rero a tul. Kan mit, kan hna, kan thinlung sang kaa ong in Bible siar uhsi, thuthangtha ngai uhsi. Kan theih tam mi in kan nun in cawm ding asi. Lung lut zet le hal zet ih kan hawl, kan ngai nak in thei tam, thei fiang sin ding in in bawm asi.

3. Tong nak ah khul fung uh:

          Mit pahnih le hna pahnih cio kan nei nan, kaa pakhat lawng kan neih hi, kan hmu mi i hrek lawng sim ding, kan theih mi ih hrek lawng tong ding tinak asi. Pathian thangthat nak ih kan hman mi kan kaa cu, midang cam siat nak le tong siakha suah nak ah kan hmang siang ding maw si. Midang soisel nak le phun zai rero nak men ah kan hmang hrih ding mawsi. Hmang siang hrimhrim hlah. Tong sia kan tong mi tla cu zo hman in an co duh loih kan mai parah a ra thleng sal theu. Tih a nung. Capo le hnih suah hman ah midang mual pho nak le ning zah, thinheng nak a suak pang theu. Thu ruat ta ciamciam in kan hmur kaa hmang uhsi.

4. Thin heng nak ah khul fung uh:

          “Kei cu mithin tawi ka si” kan ti aw theu. Kan lei misa tuk. “Sup a tha bik” kan ti theu miah thinheng sup hi numbat pakhat nak siseh. Kan thin a heng ngaiih, a so ih so asi khal le nuamnai  ten thotho sihram seh. Zintlangah “ajz;ajz;armif;? Nuam ten mawng” tin an tar theu. Cang sual, bah sual, pahawk nak le Accident ton a ol te tiah ral rin in pek nak asi. Thinsau te ih thu ruah le tong nak in buai nak tampi lak in in humhim asi.

5. Ziaza tha lo hlon uh:

          Ziaza tha lo neih cu innhnen le khawpi khal in  mi an rem lo. Pathian duh zawng khal asi lo. Pathian ih in duh nak cu kan thlarau, kan ruang pum le kan nun zia kan ziang kim in a si. Pathian kan zum tikhal sualsir lungthleng ih amai duh dan ih nun asi. Ziaza tha lo hlon in nun zia tha hi kan uar, kan duh zet mi si ring ring seh.

6. Pathian hnen ah hlan aw uh:

          Nitin kan nun nak, kan inn sang, kan hnatuan le kan tumtah mi ziang kim Pathian hnen ah hlan uhsi. Rawl cuam nei lo vate pawl nitin cawm tu Pathian, hramlak ih Daidim, Lily par khal Solomon puan hnak ih cei mawi sawn tu Pathian, in duh dawt tu Pathian in, in kilkhawi, in cawisang. Amai hnen hlan awk hi thlaw suah ziangkim co nak asi. Kan hrangih rem a ruah mi parah lungawi le hnangam in kan ziangkim hlan uh si.

7. Thu fek ten pom uh:

          “Nan thin lung sungih khum cia thlarau run suak tu thu kha fek ten pom uh” in ti. Cui thu cu kan zum nak hrampi asi. Pawl dangdang ih cer vivo hi zum nak fek asilo. Suah sawm nak le har nak tampi lak thu nung Jesuh kan zum nak hi fek ten pom ringring uhsi.

8. Nan theih mi kha tuan uh:

          Pathian thuhla a ngai paih tu, a thei duh tu cu kan tam theu nan ziaza ih tlun suak le va tuan tak tak tu cu mi mal kan si theu. Pathian thu theih tam timi cu zir tam le theih tam men asi lo ih thlun tam a tel cih. Mi hrek khat cun, a ling le let zawng in “Ka theih cia hman ka thlun cawk lo, thei bet, zir bet rero a tul lo” tiah kan ti pang theu. A poi zet. Kan theih nak khal thanglian ter sinin, kan tuan nak khal hmual nei vivo hram seh.

9. Farah le nu hmei kilkhawi uh:

          Thu kam hlun san lai, Jesuh Khrih nun lai le tui sun nitiang ih zirh nak bang rep ringring pakhat cu, mifarah le nuhmei kilkhawi uh tihi asi. Farah zonzai bawm cu Jesuh in “Kei mah in bawm in tuam hlawm”in ti. Ps 68:5 khal ah kan Pathian cu nu le pa nei lo le nu hmei pawl ih Pathian asi thu kan hmu. Kan aw kam, kan thlacam nak le kan neihmi hmang in tanpi uhsi. Nu le pa le, nupi pasal an um nawn lo hnu cun nulo palo, nuhmei, pahmei kan si thluh. Tang tlang, tuar tlang in kil khawi aw ton uhsi.

10. Mah le mah kil khawi aw uh:

          “Khawvel sual nak sung ih buahcih ter aw lo ding in mah le mah fingkhawi aw ding in in forhfial asi. Zum nak lam le ziaza ah mah le mah kilkhawi awk ding hi a thu pi tuk. Kan fa le an sual le an sual ti siang loin a kom mi pawl an sual ruangah kan ti theu. Thuam cu a kimvel kan sawhhnget ih a ding. Thingkung cu a hram parah fekten a ding ih a nung kan ti. Zum nak le ziaza ah kiangkap ih tha petu le nun sim tu kan tul zet. Cu mi thlun ah kan mah te hrim hrim khal kilkhawi awk a tul ringring. Khawvel hi a cak ih, sual nak khal a tam. Fim khur le ral ring ten nun zia thiam uhsi. Tuah uh 10, cingkeng ringring thei tu le nun ah tuan suak thei tu si ding in Thlarau thianghlim in kan zaten thluasuah in pe hram seh. Amen.