An Tuahmi vekin Tuah Man a pe ding

Zumtu Khrihfa mize kan si ding hi Pathian nih a duh lo

Rom 2: 1 – 11.

¹Curuangah ka rual, zokhal na sile mi dang na soisel tikah misual na si ve hi pheh theinak na nei lo. Ziangah tile midang thu a ṭhentu cu thilsual tuahtu vek thotho in misual an si ruangah mi thu na ṭhennak in nangmah lala misual na cang awter a si.

 ²Hi bangtuk thil ṭha lo a tuahtu pawl parah Pathian in an thu a ṭhen tikah thil dik a tuah, ti kan thei.

³Curuangah ka rual, midang in thil ṭha lo an tuah ih an thu na relnak in nangmah cu anmah lala vek na si. Pathian ih thurelnak ka luat ding tiah na ruat aw maw si?

 ⁴Culole Pathian zaangfahnak le mi a zawi theizia le a thinsaunak pawl a nasa ngaingaimi hi zianghman ah na siar lo a si maw? Pathian zaangfahnak cu na sual sir dingih a lo hruaitu ah a si, ti cu fiangte in na thei.

⁵Asinain nang cu na thinlung a hak ih a khoh remrem; curuangah Pathian in a thinhengnak le a dikmi thuṭhennak Ni ah na ton dingmi hremnak cu tam sinsin dingin nangmah tein na khawl a si.

⁶Ziangtin tile Pathian in zozo khal an tuahmi vekin tuahman a pe ding.

⁷Mi ṭhenkhat in thil ṭha an tuah ringring ih sunlawinak, hminṭhatnak le kumkhua nunnak an hawl. Cupawl cu Pathian in kumkhua nunnak a pe ding.

⁸Mi ṭhenkhat cu mahih zawn lawng an ruat ih a ṭha lomi thlun duh ah a ṭhami kha an hnong. Cupawl parah Pathian in a thinhengnak cu meiling bangin a burh ding.

⁹A ṭha lomi a tuahtu hmuahhmuah in harsatnak le aihramnak an tuar ding; a hmaisa a tuartu ah Judah mi an si ding ih a neta ah Zentail mi an si ve ding.

¹⁰Asinain thil ṭha a tuahtu hmuahhmuah hnenah Pathian in sunlawinak, hminṭhatnak le daihnak a pe ding; a hmaisa a cotu cu Judah mi an si ding ih a neta ah Zentail mi an si ding.

¹¹Ziangah tile Pathian cun zozo khal bangrep in mi thu a ṭhen a si. Zohman a thleidang lo.

Luka 11: 42 - 46

⁴²Farasi pawl, nan hmakhua a va pit so! Hanghnah hangrah sungin kuṭinan le remhmui le aithing le a dangdang tla cu ṭhenhra ṭhenkhat nan pek ko nain dingnak le Pathian duhdawt ding cu nan daithlan. A dang khal daithlang cuang loin hi pawl cu nan tuah dingmi an si.

⁴³Farasi pawl, nan hmakhua a va pit so! Sinakok ah tokham ret sak ciami parih to cu nan duh tuk lawmmam ih sumdawrnak tluan ih upatnak an lo pek tla cu nan sunsak bik.

⁴⁴Nan hmakhua a va pit so! Nannih cu hminsinnak a nei lomi thlaan, mi in an theih thiam lo ruangah an pal ṭheu mi thlaan bangtuk nan si,” tiah a ti.

⁴⁵Cutikah Daanthiam saya pakhat in, “Sayapa, hiti ih na ṭong tikah kannih khal in hmuhsuam ve a si!” tiah a ti.

⁴⁶Jesuh in, “Daanthiam saya pawl, nannih hrang tla-ah nan hmakhua a pit a si! An phurh thei lo ding thilrit khi mi ih zaang parah nan suang ih nanmah cun phurh bawm dingah nan kut zimte hman nan suah zuam lo.