Tuannak Thawn Timtuah Ciau Uhsi (sim tu Rev. Fr. Lucas Tha Ling Sum) December 2, 2021

Tuannak Thawn Timtuah Ciau Uhsi

Thuthangtha sim tu Rev. Fr. Lucas Tha Ling Sum

December 2, 2021

Siarding: Is. 26: 1-6/ Ps. 118; Mt. 7: 21, 24-27.

            Duhdawtmi u le nau, nan zaten Adventu thlawsuah co hram uh, tiah RVA-Falam ihsin thlaza kan lo cam sak a si. Ttuannak thawn Naute Jesuh hmuak dingin timtuah ciau uh si, timi ka ron lo hlawm duh. Baibal Cathianghlim ngai ta hrih uh si. Mt 7: 21, 24-27.

“Bawipa, Bawipa, tiih I ko tu hmuahhmuah in vancung ram, an thleng thluh lo ding; vancung ih a um mi ka pai duhnak a tuah tu lawnglawng an thleng ding a si.

            Curuangah hi ka ttong mi a thei ih a thluntu cu lungpi parih inn saktu mifim pa bangtuk a si. Ruah napi in a sur, ti a lian ih thlipi in a nuai ciamco nain, lungpi parih sak mi inn a si ruangah a sawn lo.

            Sikhalsehla hi ka ttong mi a thei nan, a thlun lo tu cu vunnel parih inn saktu mi-aa bang tuk a si. Ruah napi in a sur, ti a lian ih thlipi in a nuai tikah a sawn mai; a tlu ih a kiak thluh a si, tiah a ti.”

Himi cu Pathian ih ttongkam a si. Bawi Jesuh Khrih hnenah thangtthatnak um seh law.

 

            Zumtu u le nau, tu cu Adventu a zarhkhatnak kan lut thlang a si. Hmun tin ramtin ah Christmas ah Naute Jesuh cu ziangtin, a tthabik in kan hmuak thei ding a si, tiah a phunphun in tim kan tuah.  Tthimnak ah, thlacamnak in siseh, khawmnak in siseh, sual thlahnak le Bawi Jesuh ih thi le sa einak in siseh, cun a hlu peknak in siseh ti in phun tampi in timtuahnak kan nei ciau. A ttha tuk. Tuittum kan cathianghlim siarmi sung ihsin Bawi Jesuh in ziang tin timtuah ding in in forh fial a si, timi zoh hnik uh si.

            “Bawipa, Bawipa, tiih I ko tu hmuahhmuah in vancung ram an thleng thluh lo ding; vancung ih a um mi ka pai duhnak a tuah tu lawng an thleng ding a si” tiah Bawi Jesuh in ralrinnak I pe a si. Ttongdang ih kan sim a silen, Christmas caan a nai zo; a tthabik ih Naute Jesuh hmuak thei dingin zuam ciau uh si; ralring ciau uh si, tiih awkam lawngih tlang au rero men lawng in cun, Messiah runtu pa ton a ngah lo ding a si, ti tawn a bang aw a si. Bawi Jesuh cun hitin tah tthim nak thawn in sim bet hrih: “ka ttong mi a thei nain a thlun lo tu cu vunnel parih inn saktu mi-aa bang tuk a si. Ruah napi a sur, ti a lian ih thlipi in a nuai tikah a sawn mai; a tlu ih a kiak thluh a si” a ti.  Cuti a silen ziang tin tim kan tuah pei?

            Bawi Jesuh cun hitin in sim: “vancung ih a um mi ka pai duhnak a tuah tu lawng [in vancung ram] an thleng ding a si” a ti. Tiduh san cu awkam lawng si lo in tuahnak thawi tim kan tuah lawngah Naute Jesuh cu kan hmuak ngah ding; kan tong ngah ding, tinak a si. Cuti a silen ziang mi kan tuah ding?

            Cun a tthabik mi le hmual a neibik mi tuahnak si thei dingih a thupi bik mi cu “duhdawtnak thawi thilttha tuah” khi a si. Thilttha tuah hman sehla, kan lungput a dik lo, cun a si lolen duhdawtnak a tel lo a si ahcun thilttha kan tuahmi a famkim thei lo.

            Curuangah Naute Jesuh-ih laksawng co thei dingin duhdawtnak thawn hi Adventu caan sunglawi ah hin mi dang hrangih thilttha tuah thei dingin zuam sinsin uh si.

            A ra suak dingmi Messiah runtu pa in nan zaten thlawsuah lo pe hram seh. Amen.

Add new comment

3 + 2 =