In umpi ringirng tu Emmanuel Bawipa (sim tu Rev. Fr. Joseph Ro Nei Thang), December 18, 2020.

In umpi ringirng tu Emmanuel Bawipa

Thuthangtha sim tu Rev. Fr. Joseph Ro Nei Thang

December 18, 2020.

Siarding: Jeremiah 23:5-8; Matthew 1:18-24

          Leitlun khuazakip ihsin Christmas puai a hngakhlaptu Bawi Khrih ah duhdawt zetmi nu le pa, u le nau pawl “Kan Bawipa Jesuh Khrih ih zaangfahnak veel, Pa Pathian ih duhdawtnak le Thlarau Thianghlim ih pumkhat sinak pawl cu nan zate thawn um hram seh” tiah cibai ka run lo buk hai. Emmanuel Bawipa in lo um pi ringring hram seh tiah thla za ka lo cam sak hai. Tuihni cu 2020, December thla ni 18, Tlawngkai ni nga ni asi. A tu ahcun Adventus caan part II ah kan thleng zo ih a cuangce in timtuahnak kan nei ding caan asi. Tuihni ih kan siar dingmi Pathian ih ttongkam pawl cu Jeremiah 23:5-8 tiang le Matthew 1:18-24 tiang pawl tla ansi pei. Tuihni kan ruah khawm dingmi cu “In umpi ringirngtu Emmanuel Bawipa” tiah asi pei. 

          Tuihni kan siarmi Thuthang ttha ah Joseph ih thu kan hmu asi. Naute Jesuh ih thuhla cu Luka in (Lk 1-2) ah a ngan tikah Bawinu Mary ih thuhla tla tampi telh cihin a ngan asi. Matthew in cun Naute Jesuh ih thuhla (Mt 1-2) ah a ngan tikah Joseph ih thuhla tla tam nawn telhin a ngan asi. Bible thukam hlun ih Joseph le Bawinu Mary ih pasal Joseph tiah an um ih Bible thukam hlun ih a hmaisabik asimi Semtirnak ah le Thukamnak tharih a hmaisabik asimi Matthew ah Joseph ih thu cu an um asi. An pahnih ih pa tla cu an bang aw ih Jacob tiah asi veve. Cun an pahnih in mang mantu pawl ansi. Semtirnak sungih Joseph cu zuarnak tuarin harsatnak tampi thawn nunkhua a sa ih a innsangpi hmuahhmuah humhimtu le cawmtu ah a cang asi. Cun Matthew sungih Joseph in tla harsatnak tampi sung ihsin Naute Jesuh kilkhawitu Pa ah a cang. Cuticun Pathian ih ttuanvo pekmi cu fel tein le ding zetin a ttuanih in Runtu Jesuh Khrih cawmtu ah a cang asi.

          Tuihni kan siarmi thuthang ttha sung ah ziangso kan hmu ti kha ttha zetin ruat uhsi. Joseph in Mary cu tthit dingah a ham cia asi. Joseph cu miding fel le mittha asi. Mary kha tthit dingah a ham nain an um khat khat hlanah (let an tthat hlan ah) Mary cu a pum a lawng lo, Thiang Thlarau thawngin nau a pai. Mary in nau a pai nak umtudan cu Joseph in a hmu tikah a khuaruah a har ngaingai ding, a ning a zak ding, a thin a heng ding, a seikdat a kyah ding, a cik pyet ding, a ttahsuak ding, tuih san si sehla zu a in ding/ ri ciamco tiangin a in ding, a buai ding, amah le amah hman a tuah mawh aw ding. Asinain Joseph cu miding, mifel le mittha asi ruangah buaipinak a tuah  lo ih Mary khal ningzak dingah a duhlo ruangah a thup tein a mak tum sawn asi tiah Mt 1:19 ah in sim. Khatin donhar zetin le vansanglam in a um lai ah a mang ah Bawipa ih vancungmi pakhat cu a lang ih “David ih tefasin Joseph, Mary hi na nupi ih tthit dingah ttih hlah. Ziangahtile fa a vunnak cu Thlarau Thianghlim thawngin asi. Amah in Fapa a hring dingih Jesuh tiah na sak pei; ziangahtile a minung pawl kha an sualnak ihsin runsuak dingah asi” tiah ati. Bawipa in a prophet hnenin a simmi cu “falahim pakhat in fa vun dingih fapa a hring ding. A hmin ah Emmanuel tiah kawh asi ding” ti ih a rak sim cia mi kimnak dingah hibangtukin thil a hung cang asi. Emmanuel tican cu ‘PATHIAN KANMAH THAWN A UM’ tinak asi tiah Mt 1:20-23 ah kan hmu thei. Falam Bible ahcun “Pathian kan hnenah a um” tiah an let. Mirang Bible ah “God-is-with-us” tiah asi. God is to us a tilo. Bawipa cu kan hnenah a um ti hnakin Bawipa cu kanmah thawn a um ti hi pumkhat sinak a langter sawn. Bawipa thawn ti hnuhnu cun Bawipa thawn tthen aw thei asi nawnlo tinak asi. Cawhnawi le tisa kan rawimi vek asi. 

          Cu asi ruangah duhdawt zetmi nu le pa, u le nau pawl, nitin kan nunnak ah harsatnak, beidong vansanglamnak, thinlung retheinak, thinlung harsatnak, mithli tlaknak, ningzah le ninghannak, thintha naunak, thin tawinak le thinhengnak, hmuhsuam tuarnak, mithlaidan tuarnak, mi ih sualpuhnak, hrem tuarnak, thah tuarnak tivek pawl kan parah a thlen tikah Bawipa cu kanmah thawn a um asi. Amah cu Emmanuel Bawipa asi; kan beidongnak le kan harsatnak pawl in tuar pitu asi ti kha vung mang sal uhsi. St Joseph cu Pathian ih pekmi mang thawn hnangamnak a ngah asi. Kannih tla Pathian ih hrang hna kan ttuannak:- pabu tindan siseh, nubu tindan siseh, mino tindan siseh kan kai tikah Pathian nih in umpi ruangah ka hna a ngam asi ti theitu rak si hram uhsi. Biakinn lamah loh-aa kan va pek, biaknak thawn pehpar awmi meeting kan va kai tikah thatho zetin pok uhsi. “Lakphakti in do le ka feh ding, NGO pawl vekin nihlawh in pek le lawng biakinn loh-aa-pay ka va feh ding” tivek thinlung nei hram hlah uhsi. Thianghlim Joseph vekin Pathian ih kawhmi AW, Pathian ih tirhfial mi hnattuan pawl cu thatho zetin lungawi zetin ttuan uhsi. Ps 100:2 ah “Bawipa cu lungawi zetin rian uh” tiah in forh asi. Mt 1:24 ah “Joseph cu a hung tthangih Bawipa ih vancungmi ih fialmi vekin Mary cu a tthit asi” tiah in sim asi. St Joseph in “ka paih nawnlo, ka iei zo, ka duhddawtnak a parah a cem zo, ka hua tuk ziangahso khatin a uire, duhdawtnak cu a thlumih huat awknak cu kha in kha, ka ngaithiam hrimhrimlo ding, ka mak ngaingai zo, ti vekin vancungmi cu a sawn sallo. Thungainak tumpi thawn Mary cu a tthit asi. A tthit nain tisa lamah pawl awknak an neilo. Amah le amah tla nun thianghlim tein a um vekin Bawinu Mary tla nung thianghlim tein a kilkhawi ih Bawi Jesuh tla a cawm asi. 

          Cun Joseph cu Jacob ih Fapa asi nain tuihni kan siarmi Mt nganmi thuthang ttha ahcun Jacob ih fapa tilo in “David ih fapa” tiah a ti. Ziangahso? David ih fapa a tinak cu prophet pawlih sim cia mi kha kimternak ah asi. Tuihni kan siarmi prophet Jeremiah 23:5 ah “David ih tefasin sung ihsin a felmi pakhat siangpahrang ih ka hril tikcu a ra thleng ding. Cuih siangpahrang in fimnak thawn hi ram cu a uk dingih a dingmi le a dikmi lawnglawng a tuah ding asi” tiah kan hmu.  

          U le nau pawl, harsatnak kan ton caan, vansanglam in kan um caan, kan bei a dong caan, kan damlo caan, kan lungleng caan, kan thin a har caan, kan thinlung a rethei caan, ruahlopi in thusia kan thei ih kan lung hman a mit zik caan ah “Emmanuel Bawipa cu kanmah thawn a um. Kanmah in umpitu Emmanuel Bawipa kan nei asi” ti kha porh zetin mang ringring uhsi. In umpi ringringtu Emmanuel Bawipa cu rinsan uhsi, pan uhsi, ben uhsi, beu uhsi. Kan parah ziang poh a thlen tikah Bawipa nih in umpi asi tiah siat kan ton caan ah vung mang uhsi. Thluasuah kan dong caan khalah Bawipa nih in umpi ruangah ka hlawh a tling asi tiah lungawithu sim thiam ringring uhsi. 

          In umpi ringringtu Emmanuel Bawipa in nan zateih parah thluasuah lo toih hram seh. Amen.