Vancung Uknak le Mi Riantu sinak 

Thuthangtha sim tu Rev. Fr. Lucas Tha Ling Sum 

March 3, 2021.

Siarding: Mt 20:17-28 

          Zumtu u le nau, Falam RVA ihsin cibai ka lo buk hai. Nan umnak cio ah Pathian ih zangfahnak thawn nan dam ding ka zum. Tuittuam ah “vancung uknak le mi riantu sinak” timi thu thawi ten ka ron lo hlawm duh.

          Hmaisa ah Baibal catlang kan siar ta hrih pei. Tlawngkai nithum, March tla ni 3 sunih kan siar dingmi Baibal cu Mathai 20: 17-28 asinan cang 17 – 28 sung ta a thawi zawng in ka run siar ding. 

          Mt 20: 20-28; Cule Zebedi nupi cu Jesuh hnenah a fapa pahnih thawn an ra ih Jesuh hmaiah cun a kun ih zangfah a dil. “Ziang so na duh?” tiah Jesuh in a sut. Anih in “Siangpahrang na si tikah hi ka fapa pahnih hi na vorhlam le na kehlam ih an to theinak dingah thu i kam aw,” tiah a ti.

          Jesuh in “nan dil mi hi ziang kan dil ti nan thei lo. Ka in ding mi tuarnak khuat hai hi nan in thei ding maw?” tiah a sut. A fapa pahnih cun “Kan in thei ding,” an ti. 

          Jesuh cun ka in ding mi khuat hai cu nan in thei ve ngai men ding. Asinan ka vorhlam le kan kehlam ih to tu ding hril theinak thu ka nei lo. Hi tonak tla cu ka Pa in a timtuah sak cia mi pawl hrangah a si,” tiah a ti.

          Cui thu cu dungtluntu dang pahra in an theih tikah cu te unau hnih parah an thin a heng ngaingai. Curuangah Jesuh in an zaten a ko khawm in “Nan thei vekin leitlung tlunih uktu pawl cu an uk mi pawl parah an lal zet ih hotu pawl khal in thu an nei ngaingai. 

          Asinan nannih lakah cun cu bangbuk cu a si lo ding. Nanmah lakah pakhat khat in mi dang hnak in tum a duh ah cun midang pawl ih hnen-um a ttuan a ttul. Nanmah lakah pakhat khat in hmai sabik si a duh a si le nan sal a si hmaisa a ttul. Mi Fapa hi cu bangtuk in a si. Mi Fapa hi, rian mi si dingah a ra lo, mi riantu si dingah le mi tampi tlen dingah a nunnak pe dingin a ra a si, tiah a ti. 

          Zum tu u le nau, mi tu ih kan ngai mi sungih Bawi Jesuh ih a dung thlun tu hlei hnih pawl thu a zirh mi hi kan hrangah a thupi tuk. Leitlun kan nunnak ah hin mi tampi cu mi upa le bawi si ding kan duh zet. Curungah upa le bawi ttuan thei ding in a phunphun in kan zuam, hna kan ttuan. A ttha zet; asinan vek hnih vei khat cu a upa le bawi ttuan duh ruangah thil dik lo mi tuah hman hi poi ti lo in kan um pang ttheu. Bawi Jesuh cun hitin fiang ten in zirh: “Nanmah lakah pakhat khat in mi dang hnak in tum a duh ah cun midang pawl ih hnen-um a ttuan a ttul” in ti. Phundangih kan sim asilen upa le bawi ttuan kan duh a si ah cun mi dang hrangih hna kan ttuan a ttul hmai sa a si, tinak a si.

          Cun hitin Bawi Jesuh in in zir bet: “Nanmah lakah pakhat khat in hmai sabik si a duh a si le nan sal a si hmaisa a ttul” in ti. Milai kan si vek in mi tthabik, mi felbik, mi famkim bik, si kan duh ciau. Cuih kan duh mi vek cang thei dingin ziangtin kan tuah pei? Sal vek in um uh; sal vek in nung uh; sal vek in mi rian uh; tiah Bawi Jesuh in in sim.

          Cun amaih nun vek in nung dingin in sim. Hitin in sim: “Mi Fapa hi cu bangtuk in a si. Mi Fapa hi ren mi si dingah a ra lo, mi riantu si dingah le mi tampi tlen dingah a nunnak pe dingin a ra a si, tiah a ti.”

          Zumtu u le nau, vangcung uknak co thei dingin siseh, mi ih upat mi le zoh tthim tlak si thei dingin siseh, Pathian hnen ah thlarau thazang cahnak dil in kan nunnak le kan fimthiamnak thawn mi rian thei sinsin dingin zuam cio uh si. Bawi Jesuh cu a nunnak zaten ui loin mi a rian. Kan nih khal Jesuh vek in mi rian ciau uh si. 

          Pathian in nan zaten thlawsuah lo pe hram seh!