Vancunngmi Pawl (simtu - Rev. Fr. Dominic Hnin)

Vancungmi pawl

Caantluang zarh kulhluanruk nak, tlawngkai nihnih ni (September 29, 2020)

Siarding: Rev. 12:7-12; Ps. 138:1-5; Jn 1:47-51

• Tuisun kan siarmi Thuthangttha Jn 1:47-51 ahcun Jesuh le Nathanael ii biakawknak thu kan hmu. Jesuh le Nathanael cu voikhat an tonawknak a si. Jesuh in Nathanael a hmuh tikah "Israel mi diktak, thin lungah hrokhrawlnak um lo mi" a rak ti. "Israel" ti ih kawh hmaisabik a simi cu Jacob a si (Gen 32: 29). Asinan Jacob cu mi hrokhrawl (bum hmang) a rak si (Gen. 27:35-36). Sungmuril tiang a hmu thluhtu Pathian a si ruangah Nathanael ih sinak diktak khal cu a rak hmu thluh.

• Jesuh in Nathanael cu "theipi kung hnuai ii a to lai ah" ihsin a rak hmu zo. "Theipi kung hnuai ii to" ti hi duhsan a nei ve. Cucu "rem daihnak" a khih hmuh.

• (Zec 3:10) "cui ni a thlen tik ahcun na sabit hmuan le na theipi hmuan sung ih um tlang huahho dingin na inn-hnen pawl na sawm fingfing pei" a ti.

• (Micah 4:4) khalah "an sabit hmuan le an theipi kung lak ahcun zohman in an thin a phangter nawn lo ding" ti a si. Cucu Messiah ih pekmi hnangamnak a khih hmuh.

• Thuanthu lam ih kan zoh a sile "theipi kung hnuai ih to" ti cu Cathianghlim hliakhlaitu pawl ih umtu daan a si. Daan thiam hrekkhat pawl le hruaitu tampi in Jesuh cu an hnong ih an engtai laiah Nathanael cun Jesuh hmuh duh ah a ra pan. Nathanael cu "Bible thiam pakhat a rak si" ti a si vek in a rak hawl rero mi Messiah cu tu-ah Jesuh ah a hmu. Nathanael cu Cathianghlim sung ihsin Pathian ih duhdan hawl rero tu a si ruangah le Pathian in Israel pawl hrangih a tuahmi pawl parih thinlung re tu a si ruangah a sungah "hrokhrawlnak" a rak um lo. Hivekpawl ruangah Nathanael cun Jesuh cu "Pathian Fapa" ti in a rak ti lohli ngam.

• Cui a zumnak cu Jesuh in nemhnget sakin "hi hnak ih maksak na hmu lai ding" a ti. Cui thil maksak ah "vancungmi ttum le kai" na hmu ding a ti. Vancungmi "ttum le kai" ti cu ziang a duh san? Lei le van karlak ih pehtlaihnak a khih hmuh. Cumi pehtlaihnak hnattuan ah hmun thupizet pakhat a luahtu cu "vancungmi" an si.

•  

• "Vancungmi" cu Pathian in kannih minung pawl thawn pehtlaihnak dingih a hmanmi palai an si, Pathian ih "thuphurtu" an si.

• Pathian in "a lo hruaitu dingah nan hmai ah vanungmi pakhat ka thlah ding. Amah cu nan upat pei ih a simmi thu cu ngai in nan thlun pei. Amah cu nan ralsan lo pei, ziangah tile ka hmin in hna a ttuan a si.  (Ex 23:20-21) tiah in ti. Tiduhsan cu "Pathian in amai tthatnak ruangah kan hrangah khua a khang ih cuticun vancungmi pawl a rak sersiam ih cui a sersiammi vancungmi pawl cu kan upat ih an thu kan ngai ding a duh" tinak a si.

• A simbetmi cu "a thu nan ngai ih ka simmi hmuahhmuah nan tuah a si le nan ral pawl cu ka do dingih a lo raltu pawl cu ka ral ve ding (Ex. 23:22) a ti. Himi vancungmi pawl hmangin Pathian in in kilveng tinak a si.

•  

• "Israel ralkap burpi hmai ih a feh ttheutu Pathian ih vancungmi cu a tthawn ih dunglam in a khor hai (Ex 14: 19-20)." ti in kan hmu. Vancungmi ih lam in hruai nak thu le in kilvengnak thu a si.

• (Gen 21:9-21) Abraham in Hagar le Ishmael tei nufa cu a dawisuak tikah an nufa in Beersheba ramtthing lakah mangbang vansang in an um. Cumi lai ah vancungmi in Hagar tei nufa hrangih Pathian ih khuakhan cu a rawn sim thei. Hi thu kan zoh tikah canvungmi pawl cu Pathian in kan hrang ih khua a khannak pawl in simtheitu an si.

• Ps 91:11-12 sungah cun "Na fehnak hmunkip ih a lo humtu dingah le a lo kilvengtu dingah Pathian in a vancungmi pawl a ret ding. An kut in an lo cawi dingih na ke cu lungto ah na khawng lo ding." a ti. Pathian ih kilvengnak le ttihnungza lak ihsin in humhimnak a langter.

•  

• Vancungmi kan ti khalah an hnattuan hi a bang aw thluh lo. Pathian ih a fial daan ih zir in a phun a dang vivo.

• Tuisun ih kan sunloihmi vancungmi pawl cu Michael, Gabriel le Raphael tiah hmin pek an si. Annih pawl cu Archangels - tiah kan ko ttheu. Ziangah ti le annih cu Pathian in hnattuan hleice - special mission - a fial ruangah a si.

• Michael cu ralbawi dinhmun in kan hmu ttheu ding. In humhimnak langternak a si. Tuisun kan siarmi Bible, Thuphuan 12:7-12, sungah vancungmi Michael le Satan ih do awknak thu kan hmu. Santan cun Pathian ih hmunhma kha luah a duh ruangah a Ro co tu ding a fapa kha dehthat a tum. Cumi cu vancungmi Michael le a homi pawl in vancungram cu an kil him. Vancung ih doawknak ah Pathian hmin humhimtu a si ih vancung ihsin Lucifer a dawisuaktu bik a si. Lk 10:18 ahcun " Satan cu vangcung in nimthlakau bangin a tla" ti a si. Daniel cauk (Dn 10:13, 21) ahcun Michael cu Israel ram kilvengtu ti in kan hmu.

• Michael ih cahnak hi amai hmin thawn an ngan khum lo. Asinan Satan cu "lu pasarih le ki pahra a nei ih a lu parah siangpahrang lukhuh pa khat fingfing an khum (Rv. 12:3) ti a si. Cui "lu, lukhum le ki" pawl cun Satan ih huham le cahnak a khih hmuh. Cumi hman nehtu a si tikah Michael ih huham le cahnak pawl cu rel dang a ttul nawn lo.

•  

• Hnaihnoknak in pe ttheutu Satan cu kan Bible cun "Khuahlan rulpi" ti ah a hmang. Ziang ah tile Eve a rak bum ruangah (Gen 3:1-6). Cui rulpi cu "sual puhtu" ti khal in (Rv. 12:10) a hmang. Sualpuhtu cu vancung ihsin hlon a si zo ih leilung ah a rawng tla. Leilung khalah Jesuh ih dungthluntu pawl, Christian pawl, cu sual a puh ringring lai. ralring aw. Cui sualpuhtu cu a neh na duh a si le a nehtu Michael kha sawm aw.

• Gabriel cu Tipilnak petu John ih suah ding thu ah Zachariah hnenah langnak a rak nei ih thu a rak than bangin Pathian in minung sinak la in naute in a suak ding ti thu Mary hnen ih thu thantu a si. Pathian ih khawkhannak cu minung hnenah a phuang suak.

• Raphael cun Tobit ih hnenah damnak a pek vek in Tobit ih fapa Tobias cu Media ram ih a fehpi tu a si.

• Cuticun kanmah minung hrangah kan rundamnak ding ah siseh, kan harhdamnak dingah siseh, kan pumsa kan thlarau hrangah bawmnak tampi in pe.

•  

• Michael bangin thudik thutak a dinpitu, Gabriel bangin thuthangttha a sim than tu, Raphael bangin midang ih thlarau damlonak a damtertu si zuam aw.