Vanlam Sialkiringcin (Rev. Fr. David Mangte), Zarhkel Zarh (2) nak, January 17, 2021.

Vanlam Sialkiringcin

Thuthangtha sim tu Rev. Fr. David Mangte,

Zarhkel Zarh (2) nak, January 17, 2021.

Siarding: 1Samuel 3:3-10, 19; Ps 40:2, 4, 7-10; 1Cor 6:13-15, 17-20; Jn 1:35-42

          Kan Bawipa Jesuh Khrih ih zangfahnak, Pa Pathian ih duhdawtnak le Thiang Thlarau ih pawlkomnak cu RVA ihsin thuthangtha a rak ngaitu nan zate hnen ah um hram seh tiah hmaisabik ah cibai ka run lo buk hai a si.

          Tuni cu kan Liturgical Year sungih Ordinary Time kan timi menmen Caan ih zarhpi voi hnihnak a si. Tuini kan siarmi Cathianghlim pawl cu 1Samuel 3:3-10, 19; Ps 40:2, 4, 7-10; 1Cor 6:13-15, 17-20; Jn 1:35-42 sungta an si.

          Kan dung zarhpi ni ah kan Bawipa leipar ih rundamnak hnatuan a thok hlan te ah Jordan tiva ah Johan Baptista hnen ihsin baptisma a laknak puai kan tuah. 

          Tuini Cathianghlim kan siarmi pawl thawngin Pawlpi in kanmah le kanmah vun cek aw sal in kanmaih tuanvo cio thei dingah in duh sak a si. Kannih khal tuanvo pakhat hrangah Pathian ih kawhnak kan ngah cio. Jesuh Khrih ih dungthluntu kan sinak ih sunlawizia thei in le midang khal Khrih ih ta sinak ih hlawknak hei tawm ve dingah kawh mi kan si. Hihi tuini kan siarmi Cathianghlim pawl ih in zirh duhmi a muril taktak cu a si.

          A voikhatnak ih kan siarmi 1Samuel 3 sungah Pathian in Samuel a kawhnak thu kan thei. Pathian in Samuel ih hmin sal in a kawh tikah hin Samuel hi a kum 12 hrawng a si. Hnawi fawh a colh vete’n Pathian hnen ih hlan mi a si ko nan kum 12 a kim ih a tha le sia a thleidan thiam hnu lawngah Pathian in ziang tuah dingah a ko timi sim dingah a hmin sal in a ko. Cuti ih a kawh hman ah Pathian ih aw a si ti a rak thei lohli lo; Puithiam Eli sawn in a rak theih sak ih “Bawipa na sim duh mi sim aw, na aw ka thei” rak ti aw a ti hnu lawngah Pathian in ziang tuah dingah a ko timi a rak theifiang ngah. Himi te hin Pathian ih tuah ding in duh sak mi theifiang dingah midang ih bomnak kan tul phah caan a um timi a langter a si.

          Curuangah Siangbawi tlawng le Sister tlawng ti vek ahcun Spiritual Director timi thlarau lam ih lamzin in hmuh sak tu ding, Pathian in kan hrangih a hmuitin mi theifiang ngah dingah in bawmtu ding pawl kan nei theu. Hiti vek ih lamzin hmuhtu ding cu kan thih tiangih kan tul theu dingmi khal a si. A hleice in, ziang tuah ding ti thei lo ih oloksong ih kan um caan vek ah thlarau lam zawngih lam hmuh sak tu ding hi kan tul theu. Cuvek ih kan tul caan te ih kan pan dingah rinsan mi pakhatkhat cu kan neih a tul phah ringring tinak khal a si.

          Gospel ih kan siarmi sungah John in Johan Baptista ih dungthluntu pahnih te ih Bawipa Jesuh an hmuhton hmaisabik nak thuhla a tarlang daan kan hmu fiang. Hi Johan Baptista ih dungthluntu pahnih lak ih pakhat cu Simon Peter ih nau Andrew a si ti’n a ngan nan a dang pakhat cu zo a si ti a tarlang lo; ziangah tile amah John a si ti fiang cia a si. 

          John in hi thuhla a ngan nak san hi Bawipa Jesuh a hmuton hmaisabik daan sim duh men ah si lo in Bawipa Jesuh ih dungthluntu sinak ih hmuhton mi a vuirah sawn kha midang hnen ih theih ter a duh mi sawn a si. Andrew thawn Bawipa Jesuh an va pan ih a umnak ah zan khat te an va umpi nak thawngih an hmuhton mi hi sim le rel lo in a um thei hrimhrim lo. Khai zan te khi a thih tiang a hngilh thei hrimhrim lo. Curuangah hi thuhla a ngan tikah kum 50/60 hrawng rei zo mi a si nan a tikcu caan te hman khi fiang keokeo in a thei lai. 

          Cuih zan khat te Jesuh Khrih thawn caan an hman ngah hi sunglawi an ti tuk lawmmam. Ziangah tile nunnak taktak le tleunak taktak a simi an theihfiang ngah ruangah a si. A mawi zawngih kan sim a sile Sialkiringcin an sar ngah ruangah a si mai. Cuih sialkiringcin cu midang hnen khal ah tawm an duh ve. 

          Christian zumtu kan si hi ziang tluk in mi van nei kan si timi tuini ah a thar in vun ruat sal hnik uhsi. Jesuh Khrih thluntu kan sinak ih hlawknak kha midang hnenah tawm ve rero ding hi kan tuanvo a si. Sihman sehla, kanmah lala in cuih hlawknak kan theihfiang lo a si ahcun ziangtinso midang kan va tawm ve thei ding. Cuih hlawknak tep ngah ding cun Jesuh Khrih hnen pan ih amah thawn caan kan hman ve a tul. Jesuh Khrih in Andrew le John cu amah theifiang ih zumnak lamzin par ih hruai suak a duh tikah a sawmnak awkam cu “Ra uh la ra zoh hnik uh!” timi te hi a si. 

          Andrew khal in a upa Simon Peter kha anmaih sar ngah mi Sialkiringcin sar ve ding a duh tikah “Ra aw la ra zoh hnik aw!” timi tongkam thawn a sawm thotho. Curuangah John in himi thuhla a ngan tikah Jesuh Khrih thawngih ngah theih mi Vanlam Sialkiringcin tong ve ding cun mahte’n rori a umnak hmun pan ih hawl a tul a tinak san khal a si. 

          Zumtu tampi in Jesuh Khrih ih thuhla cu kan thei cio ko nan, amah kan thei ngah taktak maw timi cu amah Jesuh Khrih thawn caan hmangin pawlkom awknak nun kan nei maw nei lo timi sawn ah a thum aw a si. Khrih ih pekmi Sialkiringcin a hmu ngah fiang taktak tu cun midang hnen ih va tawm ve lo in an um thei hrimhrim lo. 

          Tuini a voi hnihnak ih kan siar mi Paul ih cakuat sungah Vanlam Sialkiringcin himdam te ih kilkhawi thei ringring dingah a tulmi nunsimnak kan thei. Cumi cu mankhung zet in Jesuh thisen thawn leimi kan si timi thei aw in kan man neih zia theih awk ding le kan taksa ruangpi khal Bawipai sunlawinak hrangih hman ding timi a si. 

          Duhdawtmi nulepa ulenau pawl, Jesuh Khrih ih thuhla thei men tu maw ka si, a silo le, amah thei taktak tu ha ka si timi tuini ah kan vun cek aw cio pei uh. Jesuh Khrih ih thuhla men si lo in amah rori kan theih ngah lawngah Vanlam Sialkiringcin khal kan sar ngah ding a si. 

          Cuih Sialkiringcin sar ngah hrih lo kan si pang a si le a sar ngah tu si dingah kan Bawipa thei sinsin dingin a hnen pan ih amah thawn caan hman tlang tum uh si. A sar ngah zo tu kan si khal le him te ih kan kilkhawi thei ringring nak dingah kan taksa ruangpi hi Bawipai sunlawinak dingah hmang thei sinsin tu si zuam cio uh si.

          A zate ih a thiamtu Pa le Fapa le Thiang Thlarau Pathian ih thluasuahnak cu kan zate parah thleng in hmun camcin seh law. Amen. 

 

Add new comment

10 + 7 =