Vutcam culh ni (26.2.2020)

Feb 26, tlawngkai nithumni cu Catholic pawlpi hrangah nisunglawi zet pakhat asi. Ziangah ti le Vutcam culh ni asi.

In sersiam tu kan Pathian in a mai hnenah kirsal ding in minung hi phun (2) in in ko.

1/ nak cu  leitlun kan nun laiah amah biak ding, duhdawt ding, zum ding, rinsan ding le a maih duhzawng ih nung ding in nitin in ko, 2/ nak cu kan thih can ah kan thlarau a la ih kan ruangpum lei ah thleng in in ko.

Tuisun "vutcam culh ni" ih kan Bible siar mi Joel 2:12 ih kan hmuhmi Pathian ih in kawhnak aw nem "Ka hnen ra kir uh" timi thei in Bawipaih hnenah kir tlang usih. Bawipaih hnen kan kirsal tik ah a maih cohlan tlakmi kan si theinak dingin thu pasarih (7) ruat tlang usih.

1/ Vutcam culhnak in Sualsirnak a langter;  Pathian hnen kirsal dingah ahmaisabik le a thupibik cu sualsirnak a si. Kan lupar ih vutcam culhnak hi kum tin tuahtheumi  si ruangih tuah men silo in kan sual kan sir ruangih kan tuah mi rori sihram seh. Pawlpi ih in fial ruangah kan tlun ti men lo in kan sual nak ruangih kan riahsiatnak langter tu sihrimhrim seh. Sualnak hrangih riahsiatnak neih le kekkuai thinlung thawi a mah pan hi Bawipa in a duh bik. Pathian hnenah ngaithiam dil ding ni asi. Nineve khawpi sungum mi hmuahhmuah cu rawl ul le vutcam lakah to in an sual an sir tik ah Pathian ih ngaithiam nak an ngah. Tih nungza hremnak ihsin an luat. Sualsir in vutcam culhnak ngah tlang cio hramuh sih,  sual ngaithiamnak Pathian ih in pek ni, harnak le cawhkuan kan luat ni asi.

2/ Vutcam culhnak in ralrinnak in pek; “Leivut ih sersiam na siih, leivut ah na kir sal ding” timi tongfang sal in vutcam culh kan si. Leilung ih kan kir sal ding thu ruat in thlarau le nunzia timtuah in fial. Ralring usih. A thi ding mi kan si cio. Kan thih tikah kan ken thei mi leitlun hlawnthil zianghman a um lo. Vancung ramtiang kan ken thei mi umsun cu leitlun kan nun laiih midang hnenih kan pekmi pawl an rak si sawn. Curuangah lent caan kan ti mi maiduhnak sup aw le midanghrang ih peknak nun nei ding in zuam tlang usih. Kan bawipa Jesuh ih harsatnak pawl ruatsal, mangsal in, tuarpi ve usih. Nuamcen nak tla hrial usih. Kan can, kan thiamnak le kan neihmi pawl siangzet in midang kan hlawm dingih vancung ah rotha kan khawl cio usih.

3/ Vutcam culhnak in Tangdornak a langter; Nidang le candang men ah kan lu parih leivut le vutcam ret cu zohman in kan duh lo. Tuini ah cun lungkim te le lunghmui teih kan tuahmi a siih tang kan dornak a langter. Pathian hmaiah tla tangdor a tul ih, minung hmai ah tla tangdornak kan langter a tul asi. Kan zaten kan rualran theh. Puarthau ngam ding tla kan si lo ih, midang va nautat rero tu ding tla kan silo. Mi cuangce kan um lo. Kanthih can le thlanmual ah kan rualran theh. Pathian thawi rualrem sal kan duh cio vekin minung le minung kar lak khalah rualremnak hi tangdornak in la cio usih. Kan calih vutcam cu nikhat hnu cun a hlo, a mal ding. Asinan, in khihhmuhmi nikhatkhat cu leilung ka cang sal ding ti thei aw ringring in tangdor nun hi cingkeng in kan nunah langthei ringring hram seh.

4/ Vutcam in loram a tha ter; Lo kan vah kumah lo rawl kan patha cuang theu. Thingkung, hrampi kan vah, kan haumi a tam ih, meikan duah tikah kan lo ah vutcam tampi kan ngah. Cumi cun leilung a al terih kan cicinn mi thlaici cu a kung a tha, a vui le a rah a tam ter. Kan lu par ih vutcam kan culh nak in zumhnak le thlarau nunnak ah rahtha, partha tampi  rahsuah thei hramseh. Mi bawm theitu le zawnruat thei tu, ziaza thatha kan nunah partha par sin hram seh. Thlarau ah patha tu, lian sin tu, si in, midang hrang khal ah dawmtha sithei ding zuam ciotlang usih.

5/ Vutcam in siatral nak a humhim;  Vainim le rawlci phun dangdang tla reipi le kutam kan ret duh tikah vutcam kan rawi, kan cawk ih kan ret. Vainim le rawlci pawl cu, nget thei lo ding le siatral lo ding in vutcam in a humhim. Curuangah kan lu par ih vutcam kan culh nak ruangin thlaraunung, rotha kan neih mi cu satan kut ah olten siatral men lo ding in in kil khawi, in humhim a si. Zumnak le biaknak lam ih thazang mal mi pawl hrangah tla hngetter tu, fek ter thei tu, thazaang pe tu si ding in vutcam culhnak cohlang usih. Thlarau ngetsia kanmai par le midang par khalah tla lo ding in, siatnak humhim thei tu vutcam si zuam cio usih.

6/ Vutcam in thil a fai ter; Bel le kheng a dum, a caak mi khi vutcamsaa thawn kan rawt tikah a fai ih a tleu. A thar vek ah a cang. Kan lupar ih vutcam kan culh nak ruang in thlarau thiannak kan ngah. Hna kan tuan can ih kan lupar ih lei vut cun kan taksa a bal ter nain thluasuah pek mi le thlacamnak thawi kan ngah mi kan lupar ih  vutcam cun kan thlarau a thianghlim ter. Kan sualbal pawl in kholh fai ih, thlarau thianhlimnak le nuntharnak kan co asi. Kan thinlung, kan tongkam le kan nunzia khal vutcam in in kholhfai hramseh. Tharsuah nak inpek hram seh. Taksa ah kan cal a dum nan kan thla rau cun tleunak,varnak a co sinsin asi.

7/ Vutcam in rawl a thaw ter;  Vutcamti thawn hmeh le rawl suan mi hi a thaw zet ih vitamin tla a tha zet. Hlanlai deuhah cun kan lairam hmuntampi ah rawlsuannak ah kan rak hmang theu. Tulai khal ah hmunhrek khat ah cun a um rero lai ko. Kawltong in cun          “j[[if:” an ti ih laitongin cun Alti (vutcamti) thawi suanmi hmeh a si. Kei tla cun ka duh zet, ka pham zet sapbai.  Kan lupar ih vutcam kan thuh nak in kan nunnak thaw ter sin hram seh. Jesuh krih cu hremnak le zonzaih phunkim a tuar laiah tisa lamih zoh ah cun a nun a ro, a caar. Zaang a fak. Tuk a sum. Asinan thinglamtah thawngin minung  rundamnak pek in duh ruangah thatho zet in thinglamtah a pu ih lunghmui te in a nunnak a liam asi. Jesuh ih thinglamtah cu pom hnget ve in, kan innsang cio le rual le pi lak ah umnuam ter tu, pawl nuam, kom nuam si thei ringring hram usih. Mitthli tla cing in midang hniter theitu, liam le hma pu cing in midang tuamhlawm theitu si u sih. Leitlun harnak tampi lakah umnuam terthei tu, a thawter thei tu ding cu kan Bawipa Jesuh le nang le kei kan si.

Vutcam culhni ah Bawipa ih ngaithiamnak co tlang cio in, kan mai bulpak nun le kan kiangkap midang hnen khal ah thlarau rahtha, partha ee sin hram seh. Amen.