Zalennak Lamzin (Sim tu - Rev. Fr. Dominic Hnin)

Zalennak Lamzin

Thuthangtha sim tu - Rev. Fr. Dominic Thawm Hlei Hnin

Caantluang zarh kulhluanriat nak, tlawngkai nihnih ni (October 13, 2020)

Siarding: Gal. 5:1-6; Ps. 119:41, 43-45, 47-48; Lk 11:37-41

• Tuisun kan siarmi Bible sung ihsin hmaisabik ih kan siarmi Galati mipi pawl hnen ih Paul ih cakuat sung ta kan ruat thlang ding.

• Paul in Galatians pawl hnen ih ca a kuatnak ah saltannak siloin zalennak lam ih ttang ding in a forhfial. Cui zalennak cu Daan ih pekmi zalennak siloin zumnak ihsin a ra mi zalennak a si. Zalennak timi cu Khrih in kan hrang ih a rak tuahmi le a rak ttuanmi pawl hmuahhmuah funkhawm thluhtu a si.

• Daan ihsin dingnak a rak hawltu pawl cun daan vek ih an nun, daan thlun ih an nun, daan sungih ummi pawl an tuah vek in zumnak a neimi pawl khal in cui zumnak lamzin ah fekzet le dingzet ih kan fehnak thawngin, cui zumnak lamzin kan thlunnak thawng in zalennak ah fek tein kan um a ttul.

•  

• Paul in Galatian pawl cu hril ding a pe: Khrih le zalennak maw nan hril ding, Daanthlun le sal cannak" ti a si.

• A thu ahcun zo hman in "sal" si cu kan duhlo cio ih "sal" si cu kan hril lo ding. Asinan kan ralrin man hlan ah cui "sal sinak" sung ah kan tla ttheu. Kan kaa cun "sal" sinak thawn a hla nan kan nun cu "sal sinak" sung in a suak thei lo ttheu.

• Himi "sal cannak" timi langter ding ah Paul cun ''serh tannak" timi a hmang.

• Curuangah Serh tan timi hi kan zoh ta hnik pei.

• Serh tan ding cu Pathian in Abraham thawn an rak tuahmi thukam pakhat a si. "NAngmah le na tesinfa pawl in ka thukam fekternak dingah mipa hmuahhmuah in serh nan tan thluh pei (Gen 17:10)" a ti. Curuangah Abraham ih tesinfa pawl cu, sal siseh mi zalen siseh, an serh tansak an si. Isaac khal cu a suah ihsin niriat ah a serh an rak tansak (Gen 21:4).

• "Serh tanlomi mipa cu ka thukham a thlunlo ruangah  a miphun sung ihsin hlon a si ding" a ti (Gen 17:14). Cucu Pathian thawn an pehzom aw nawnlo, an tthenaw tinak a si.

• Moses kha a fa le pawl ih serh an rak tanlo ruangah thihnak thawn hro a rak si. Anupi Zipporah in an fa le pawl ih a rak tannak thawng in Moses khal cu a rak him EX 4:24-26).

• Serhtan hi Lantak ruaipi ih tel theinak dingah a ttulmi thil pakhat a rak si (Ex. 12:44-48).

•  

• Amah kan Bawipa cu a suahhnu niriat ah a serh tan asi (Lk 2:21). 

• Asinan tu ahcun Jesuh ih hrangah khami taksa lawng "serh tan" sinak kha thupi ah a ngai lo. A thupi sawn cu "thinlung" serh tan kha a si sawn. (Rom 3:30) ahcun "Pathian cu pakhat a si ih Judah mi pawl cu an zumnak thawnin Pathian thawn remawknak a um dingih Gentail mi pawl khal an zumnak ruangah amah tawn a rem awkter hai ding." a si. Curuangah taksa serh tan siseh, tanlo siseh zumnak an neih ahcun Pathian in a cohlang.

•  

• (Rom 4:1-12) kan zoh a sile Zumnak lam ih kan pa a simi Abraham khal cu serh tan le tanlo ruangah siloin a zumnak ruangah miding sinak a rak co.

• Serh tannak cu minung kut ih tuahmi (Eph 2:11) a si ih Christian kan sinak, Khrih ih dungthlun kan sinak cu Baptism kan ngahnak thawng in amah Bawipa in in tuahsak.

• Khrih Jesuh thawn kan pehzom awk ahcun serhtan siseh, tanlo siseh a danglam nawn lo. A thupi mi cu duhdawtnak thawn hna a ttuantu zumnak lawng a si (Gal 5:6)" a ti.

• Rom 2:25-26 "Daan nan thlun a si ahcun nan serhtannak hi man a nei, sikhalsehla Daan nan buar a si ahcun serh tandahlo thawn nan bangrep thotho asi. Serh tanlo Gentile mi in Daan sung ummi thukham a thlun ahcun an sertanlonak kha serhtannak ah Pathian in a ruahsak lo ding maw?" a ti.

• 1Cor 7:19 "mi pakhat serh tanmi a si le silo kha a thupi lo; a thupi mi cu Pathian thukham thlun kha a si." a ti. Gal 6:15 "mi pakhat serh tanmi a si le silo kha a thupi lo; a thupi mi cu siamtharmi sinak kha a si." a ti.

• (Gal 5:2) "Serh nan tanter awk a si ahcun (ti duhsan cu - Daan thlun ih nan nung a si ahcun) Khrih cu nan hrangah zianghman tthathnemnak a nei hrimhrim lo" ti a si fawn, cun kan siarmi Saam hla ah cun "na daan pawl cu ka thlun ringring ding, kumkhua cat nawn lo in ka thlun ding" (Ps 119:44) a ti lala fawn. Daan thlun le thlunlo thu hi hnai cu a hnok ko.

•  

• Thinlung serhtan timi cu Yahweh Pathian ih thungai a si (Lv. 26:41; Dt 10:16; Jere 4:4) ih Hna serh tanlo timi cu Pathian thu ngailo (Jer 6:10) tinak a si.

• Himi ah kan Lai Bible le Mirang Bible ih lamdannak malte a um. Mirang cun "uncircumcised heart (Lev. 26:41)" a ti ih "serh tanlomi thinlung" ti ding a sinan kan lai Bible cun a lanhlo men; "Circumcise your heart" (Deut 10:16) cu "nan thinglung serh tan uh" ti ding khi "nan thinlung thleng uh" a ti men ih, " "uncircumcised ear (Jere 6:10)" timi khal cu "an hna phit in" ti in a let tikah Bible ih fehdan hi  lak lawh thluh ttheu. Ralrin a ttul. Mirang bible cun "serh tanlomi thinlung, serh tanlomi hna" ti in a hmang kan hmu.

• Kan taksa serh tan si hnak in, kan thinlung, kan hna, kan hmurkaa pawl serh tan si ding a thu pi. Cumi cu Pathian thu ngainak a si.

•  

• Bawipa in Pharisee pawl kha "nan khukheng pawl cu a lenglam fai tak in nan kholh nan a sung lam cu nan kholh lo, duhhamnak le tthatlonak in nan khat ter (Lk 11:39)" a ti.

• "Khukheng a leng lam lawng kholh" ti cu "daan phawpi thlun" men khi a khih hmuh ii "khukheng sung lam kholh fai ding" ti cu "Daan ih sung muril thlun - zumnak nun a si mi zalennak nun" a si.

• Curuangah na taksa serh tan ttul lo in na thinlung, na hna le na hmurka serh kha tan sawn in zalennak nun nei tum aw