Ziang dang hnakin Milai hi kan sunglawi

Ziang dang hnakin Milai hi kan sunglawi

RVA a ngai tu duhdawtmi nulepa ulenau pawl, kan Bawipa ih pekmi daihnak cu nan zate hnen ah a thar in thleng hram seh tiah hmaisabik ah cibai ka lo buk hai a si.

Tuini November ni 1 hi leitlun huap cun, All Saints Day timi Mithianghlim pawl Puaini a si nan, kan kawlram ah cun November 3 zarhpi ni ih tuah ding in kan kawlram Bishop pawl in a ni in khiah sak. Curuangah, Mithianghlim pawl Puaini thawn pehparmi thuthangtha cu zarhpi ni ah sim a si ding ruangah cuih ni ta khal pelh lo ten rak ngai cio dingin ka run lo sawm a si.

Tuini kan siarmi thuthangtha cu Lk 14:1-6 sung ta a si ih kan Bawipa in Sabbath ni ah mina a dam ter thu a si. Tuini kan siarmi hi Luke in Sabbath ni ah kan Bawipa in mina a dam ter thu thawn pehpar in voi 3 nak a nganmi a si. Hiti vek ih kan Bawipa in Sabbath ni ih mina pawl a dam ter tikah Daanthiam pawl le Farasi pawl an lung a awi theu lo. Ziangruangah tile, annih ih ruahnak ahcun kan Bawipa hi Daan siatsuah le pahbal tu, Sabbath ni baal ter tu a si. Asinain, kan Bawipa cun Sabbath ni thianghlim teih ulh hi ziang tivek a si ti a zirh duh ruangah, mina pawl a dam ter tikah thusuhnak khal a rak nei ta. ‘Kan Daan in Sabbath ni ah mi bom ding maw mi tuahmawh ding so in on? Mi nunnak humhim ding maw siatsuah ding so in on? (Lk 6:6-ll) ti’n le tuini kan siarmi sungah, ‘Kan Daan in Sabbath ni ah mina dam ter ding a on maw on lo so? Nanmah lakah mi pakhat cu a fapa maw a caw si maw Sabbath ni ah tikhur sungah tla pang sehla Sabbath ni a si ruangah suah lo in maw nan um ding? (Lk 14:1-6) ti’n Farasi pawl le Daan thiam pawl hnenah a rak sut. 

Kan Bawipa ih a huat zet mi cu Daan hmang tahrat ih misenpi harsatnak a phunphun pek hi a si. Daan kan neih le Pathian ih Daan in pek hi mipi thatnak hrangah a si. Asinain, Jesuh Khrih san ih Daan thiam pawl le Farasi pawl hi cu biaknak Daan hmangin misenpi anmaih duh zawng hlir in an rak hruai. Jesuh Khrih ih domi hi Daan a si lo, thinlung thalo sawn a si. Nanmah lakah mi pakhat cu a fapa maw a caw si maw Sabbath ni ah tikhur sungah tla pang sehla Sabbath ni a si ruangah suah lo in maw nan um ding? timi thusuhnak tein minung thinlung umtuzia a sawhkhih tuk. 

Farasi pawl le Daan thiam pawl cun, natnak a tuar rero mi pawl dam ding hnak in Daan hi a thupi sawn ah an ret; ziangruangah tile, an thinlung sungah kan milaipi, kan unau, Pathian hmuihmel kengtu an si ve timi ruahnak an nei hrimhrim lo. Mai hlawknak lawng a ruat tu cun, midang hlawknak an ton tikah an thin a nuam lo ih a phunphun in mi siatsuah ding an hawl theu. Cumi lakah daan hmang tahrat ih mi siatsuahnak khal a tel ve. Anmaih hlawknak ding a si ahcun, midang ziangtluk in mangbang vansang in um khal hai sehla, an ziang hman a poi sa dah lo. Cuvek thinlung hi kanmah lak khal ah a um thei theu. A hleice in, ramkhel lam ih cangvai tu pawl le sumpur leilawnnak lam ih nasa zet ih a cangvai tu pawl lak ah kan hmu tam theu. 

Minung kan si cun, kan maih innsungsang, kan tilva, kan innzuat sumhnam, kan thilri tiih kanmah thawn pehpar mi thil parah duhsaknak a nei lo mi kan um lo. Asinain, kan thinlung sungah maih hrang lawng ruahnak a ra luh tikah, a thupi deuh mi le a thupi deuhlo mi thil kan then thiam thei nawn lo theu. Maih tilva hum duh ah siseh, maih thilri hum duh ah siseh, maih milaipi siatsuah tla kan um theu. Tilva le thilri maw milai so a thupi ih a sunglawi deuh timi kan vun thleidang thiam lo theu. Cucu, maih hrang lawng kan ruah mi kan duhhamnak ruangah a si.

Tuini kan Cathianghlim ih in zirh duh mi cu, ziang dang hnak in milai hi kan sunglawi sawn. Curuangah daan thlun ding hnak in milai run ding hi kan Bawipa in a thupi sawn ah a ret. Minung zaten Pathian hmuihmel kengtu kan si ih Jesuh Khrih sungah unau kan si thluh timi ruahnak lungput te nei khawm thei sehla, kan phunhnam bangawklonak in siseh, kan zumnak/ruahnak bangawklonak in siseh, khat le khat lakih kan zawnruahawknak in siatsuah thei lo ding. Cumi ruahnak lungput te kan neih lo tikah, kan kiang kan kap ih mi vangsang pawl an um khal ah kan ziang a poi theu lo. Milai hi ziang dang hnak in kan sunglawi deuh timi in kan Christian nun hi in kaihnget hram seh law. 

 

Add new comment

7 + 10 =