Ziang Pathian Na Biak?

Mifim Pathum Puai hnu Nihnih ni (January 7, 2020)        

Siarding: 1Jn 4:7-10; Mk 6:34-44 

          Tuini kan siarmi Cathianghlim pawl kan zoh tikah mani kan siarmi Cathianghlim thawn a peh ih siar le ngai ding ka duhsak aw nasa. Ziangah tile mani kan siarmi tuini ah a famkim ih a fiang pumpi rori'n ka hmu. Curuangah mal lai tal cu kan siarsal le kan ngai sal ding ka duh hrimhrim a si. Ttha ten kan ngai cio sal hnik pei.

          Mani ih vei-1 nak ih kan siarmi 1Jn 3:24-4:6 sungah: 'Pathian thupekmi a thluntu pohpoh cu Pathian sungah a um ih Pathian khal a sungah a um ve. Cule Pathian ih in pekmi Thlarau ruangah Pathian cu kan sungah a um ti kan thei. Asinan thlarau ka nei a titu poh va zum hlah uh. An neihmi thlarau cu Pathian hnen ihsin a rami a si maw si lo hniksak hmaisa uh....Pathian a theitu poh in kan thu an ngai; Pathian ta a si lomi cun kan thu an ngai lo. Cuticun thlarau dik le dik lo kan thleidan thiamnak a si' ti pawl tampi in sim. Cumi ih a peh tuini kan siarmi 1Jn 4:7-10 sungah cun 'pakhat le pakhat duhdaw aw uh si, ziangahtile duhdawtnak cu Pathian hnen ihsin a rami a si. Mi duhdaw tu lawng hi Pathian thei tu a si, ziangahtile Pathian cu duhdawtnak a si' in ti. Curuangah duhdawtnak kan nei thei lo a si ah cun kan thlarau neih mi hi Pathian thlarau kan ti thei lo ding. Khatlam ah phundang deuhin von rel le kan biakmi pathian hi Duhdawtnak Pathian si lo in huatnak-pathian a si men ding; lole thintan-pathian, duhham pathian, mah hrang lawng ruat, mahlawng nomcen-pathian, puaiei-pathian tivekin puai-thlarau neitu, nomcen-thlarau, duhham-thlarau, itsik-thlarau ti'n thlarau phunphun a rak um thei. Falam ih hlasak thiam BJ ih hla sungih 'nan biakmi le nan pathian cu tangka; zuu, zuu na tinak ah na hmur hmuah a zum thluh; abaak, abaak na tinak ah na kaa hmuah kaak thluh' in ti bangin nitin kan nunnak ah kan pathian hi ziang pathian ha a si ih ziang thlarau neitu ha kan si tihi mah leh mah ruahawk sal ringring kan ttul tin ka hmu aw.

          Mani ih kan Thuthangttha Mt 4:12-17 sungah Jesuh ih thusim hramthawhnak a si mi "Nan sual sir uh, ziangahtile vancung Uknak a nai zo" ti a si. Cuih vancung Uknak timi cu duhdawtnak silole Pathian ih zaangfah-lainatnak hi a si ti kha tuini kan siarmi Thuthangttha Mk 6:34-44 sungah Bawipa in minung thawngnga kha sang hlom-nga le nga pum-hnih thawn khop neekneek ko a do nak thu in in sim fiang leh a si. Vancung Uknak timi hi van arsi le thlapi tlun lam ih um tla'n kan ruat pang kei; Bawipai' Thlacamnak ih kan cam ttheu bangin 'na Uknak thleng seh law' kan ti tikah hi lei parah Vancung Uknak hi rong thleng seh kan ti mi a si lo maw; duhdawtnak leennak hmun cu vancung Uknak a si. Duhdawt kan ti tikah a phunphun in a um thei ruangah zaangfah lainatnak, agape duhdawtnak timi kha kan ruah dingmi a si. Cuih duhdawtnak dik taktak cu peknak hi a si. Duhdawtnak tel lo in peknak a um thei ko nan peknak tel lo mi duhdawtnak ti cu a um thei lo tin khal tongfim a rak um ve. Curuangah Thuthangttha kan ngaina ngaingai a si ah cun Bawipai phuanmi Thuthangttha hmaisa bik bangin sual sir ding hi a si. Duhdawtnak kan neih ngah thei lo nak, kan duhdawtnak a dik lo nak, a famkim lo nak pawl ruat sal ta hrih uh si. Ziang te tal pek ding kan nei ve lo maw? Inn saktu pawl in san tlai lo tiih an hnon mi lungto cu a tthahnem bik tu lung ah a cang zo tiah Saam hla ngantu khal in in ti ve si lo sawm? Ziang tlak lo tiih kan ruah mi hi Pathian hmai ah a sunglawi tuk tihi kan Thuthangttha in sim fiang. Neih le neih lo kha ruat hmaisa lo in pek ding ruat hmaisa thiam seh la a neih kan tum sawn ding zia hi nitin kan nunah kan hmuhton mi a si ko ding. 

          Kan Laimi tamsawn cu azin(anu) tampi neihhnu lawngih sumdawn le hnattuan thawh tla kan tum ttheu. Ka neihsun in ziang ka tuah thei ding, ka neihsun hi ziangtin ka tthang ter ding tihi kan ruat lem lo ttheu tla a bang. Kan khawl kan khawl ih cumi sungah midang in kan tumtah mi in rak tuah khelh man thluh ttheu in ka hmu. Bawipa in a dungtlun tu pawl an neih lo zia a thei ko nan a cuih minung thawngnga lenglo mipi cu 'nanmah in rawl do uh, nanmah in ei ding pe uh' a ti ta riai. A dungthlun tu pawl cun "tangka zahnih man rawl va lei tahrat in hi mipi pawl hi rawl daar uh, ti in duh maw si?" tiah an sut ngaingai cu teh. Cucun Bawipa kha a sup aw thei nawn lo, a um thiam nawn lo ih 'hi lawmmam ih mi-aa rual teh aw' (cucu keimaih ruahnak men) "sang ziangzat saw nan neih, va zoh hnik uh e" a ti hnu lawngah an neih mi cu an va zoh. An neihmi, ti tham lo ti ih an ruahmi sang hlom-5 le nga pum-2 cu Bawipa in a lak ih van lam hoih in Pathian hnenah lungawi thu sim in a ap sak. Kan neih sun te parah Pathian hnen lungawi thu sim ih amah ap sal thiam ding sawn hi kan hmabak bik mi a si. Pathian hnen kan thlen hnuhnu cun amah in a ttul daan vek in a hmang mai ding. Bawipa in cuih sang hlom-5 cu a phel ih nga pum-2 thawn mipi hnenah a dungthluntu pawl a zem ter. An zaten khop zet ih an ei hnu ah an hlahmi cu dungthluntu pawl in an sar ih bawm hleihnih an ngah ti a si. A va sunglawi ve aw! A hleifuan tiangih thluasuah petu Bawipa in kan neih sun par in in thluasuah duhnak kha theihthiam kan cu thlang lo maw? Duhdawtnak Pathian in a neihsun a Fapa in pek zo bangin Pathian duhdawtu kan si ve ah cun Bawipa le a mipi hrangah kan neihsun pe ve dingin tuini rori ah Bawipa amah rori'n in sawm a si. Kan biakmi pathian hi Duhdawtnak Pathian a si ve lo maw? Ziangahso ttihphan nak thlarau kan neih hrih ding? 

          Duhdawtnak Pathian in kan zate parah raltthatnak thlarau thawn hnangam daihnak in pe hram seh. Amen.