Ziangti'n December kan SWEET ter ding (sim tu Rev. Fr. David Mangte)

Ziangti'n December kan SWEET ter ding

Thuthantha sim tu Rev. Fr. David Mangte

December 1, 2020

          RVA ihsin thuthangtha a rak ngaitu hmuntin ih um mi duhdawt mi nulepa ulenau pawl, nan zate hnen ah kan Bawipa Jesuh Khrih ih zangfahnak, Pa Pathian ih duhdawtnak le ThiangThlarau ih pawlkomnak cu a thar in thleng hram seh tiah cibai ka run lo buk hai a si.

          Tuini cun December 1 kan thleng thlang ih kan thinlung a danglam deuh cio ding zum a um. Kum dang ah tla cu December 1 hmuahnak hi rualpi unau sungkhat pawl thawn nuam zet in caan kan hmang theu ih zaan it lo rori hman in “Sweet December” hmuaktu an rak um phah theu. Tui kum cu kan boruak that lo ruangah December 1 khal kum dang vek in kan hmuak thei cio lo ih thinlung sungah pakhat khat sambau vek ih ruat khal kan tam ding ka zum.

          Tui tum ah “Sweet December” thawnpehpar in malte a thu um daan run rel ka duh. Ziangruangah tile, himi thawn pehpar in ruahnak dangdang a um. Siangbawi hrek khat tla cun Catholic zumtu pawl cun “Sweet December” tuah hrimhrim lo ding tiih a kham tu khal an um. Hmun hrek khat ah le Siangbawi pawl lala ih kaihhruainak in siseh, Sister pawl khal tel in ‘Sweet December’tuahnak le a um lala tikah Catholic zumtu pawl hrangah oloksong za ngaingai a si.

          Catholic biaknak calendar sung ahcun tuini tiangah “Sweet December” timi puai a um hrih lo, nehhnu khal ah ziangtik hman ah a um dah lo ding. Ziangahtile, SD timi hi Catholic biaknak ihsin a ra mi a si lo. Keimah rori khal kan tlawngkai lai ah himi SD thawn pehpar in kan tlawnguk Siangbawi in tuah tlak puai a si lo ti’n in rak kham ruangah ka olok a rak song ve ih curuangah ka rak zingzoi ve dah. Mangbangza ih ka hmuh mi pakhat cu: December 1 ni SD tiih kawhnak le hmuahnak a rak thoknak hi kan maih Myanmar ram in a rak si daih. Kawlram mi um lo nak ah SD in zianghman sullam a nei lo; puai tuah ih hmuah ti khal a um dah lo. Myanmar ram in Karen Christian zumtu hrekkhat pawl ih rak tuah thok mi a si ti a si. A tu ahcun kawlram mi pawl ih tuah mi cawngin hmun dangdang khal ah a tuahtuan rung um zo tla a si thei.

          SD timi hi Myanmar ram sungih sin a rak thok mi a si vek in kan ram sung ahcun hmun tin ah a laar ngaingai. A rak tuah thoktu pawl in ziang vek tumtahnak le ruahnak thawn an rak tuah thok ti cu sim theih a si lo nan, a tuih minung tampi ih SD tuahdaan zoh tikah biaknak lam thawn pehparnak um lemlo’n leitlun nuamnak men fang ih hmang kan tam bik ko. December thla a sunglawi tertu ngaingai cu kan Messiah, Naute Jesuh ih suahnak a si. December thla a sweet tertu ngaingai khal Amah Jesuh Khrih a si. Sihmansehla, tuih dinhmun ah cun kan SD in Pathian hmin a keng nawn lo.

          Curuangah tuih ka tuahkel vekih tuah ding men cun SD hi Christian zumtu dik tak pawl hrang ahcun tuah tlak a si lo lawlaw. Himi thu ah Myanmar Bishop pawl khal in zianghman thusuahnak an nei hrih lo ih curuangah kan Siangbawi pawl in kiangkap ih SD tuahdaan thlir in tuah tlak lo a si tiih an hmuh ruangah tuah in kham a si ahcun, Catholic zumtu pawl cun an thu kan thlun ding si mai. Keimah bulpak ih ruahnak ahcun leitlun nuamnak men ruang ah silo’n in rundamtu Jesuh Khrih ih suahnak thla sung kan thleng thei ruangah tiih Pathian hnen lungawithu  sim in December 1 kan sunloih mi a si phot ahcun SD tuah hi a poinak a um tuk in ka hmu lo.

          Kan nu Pawlpi cun, Messiah ih Suahni a sunglawi bik le tlak zet ih kan tuah theinak ding hrangah timtuahnak caan ti’n Adventu tikcu caan in tuah sak. Hi Adventu tikcu caan tha teih kan hmang ngah a si ahcun kan Christmas khal sullam a nei ngaingai ih a sunglawi hleice. SD nuam zet ih kan tuah ngah le tuah ngah lo mi hnak in Adventu tikcu caan thate’n kan hmang ngah maw hmang ngah lo timi in kan Christmas a sunlawi zia le sullam a neih zia a rel cat sawn a si.

          Tuini ih Gospel kan siarmi Lk 10:21-24 khal in Christmas sunglawi zet ih hmang thei dingih timtuah ding daan thawn pehpar in a tangdor mi le a tlaitluang mi thinlung neih ding a thupi zia in zirh. Rundamnak thuthup cu Farasi le Daanthiam pawl vekih ka fim kathiam tiih a ruataw mi, mi hngal pawl hnen ah phuan a si lo ih, Dungthluntu pawl vekih Rundamtu an tulzia a theitu le nauhak vekih thinlung a tlaitluang tu pawl hnen lawngah phuan a si. Kan Bawipa khal in a Dungthluntu pawl hnen ah rundamnak thuthup an theih le an hmuh ngah ruangah mi van nei ngaingai an si zia a simfiang.

          Tuikum kan Christmas cu kum dang vek in a hlunghlai thei lo ding a bang. Sihmansehla, khat lei lam ih zoh ahcun tui kum ih Christmas cu Bawipa ruangih lungawinak taktak kan hawl ding caantha a si ve. Kum dang ahcun leitlun nomnak lam zawng lawngin Christmas kan hmang tla a si men ding nan, tui kum cu sunglam nomnak taktak kan hawl ding caan tha a si. Rundamnak thuthup cu a lenglam ih hawl ding a si rengreng lo; sunglam ih hawl sawn ding a si.

          englam nun hnak in sunglam nun ih December a sweet tertu si thei cio dingah Bawipa in thluasuahnak in pe cio hram seh. Amen.