Zo ih Hmel cuang Kan Si? Ziang ih Tacik Khen Kan Si? (sim tu - Rev. Fr. Polycarp Thawngte)

Zoih Hmelcuang Kan Si? Ziangih Tacik Khen Kan Si?

Sim tu - Rev. Fr. Polycarp Thawngte

Zarh kel (29) nak Zarhpi (Mission Sunday) Mt 22:15-21

          Tulai mino lakih laar zet mi tacik khen daan thu von zoh sehla tattoo (Saymhinciawng) timi hi a si ka zum. Ahleice in Aung Lah N-Seng kan rel cun kan thei theh mai ding.  Himi tattoo cu kanmai duhduh kan lang ternak tacik/hminsinnak hi a si. 

          Tuini ka rel duhmi sungah cun hlanlai ih sal pawl tacik an khen daan hi si mak ka ti.  American ram a thanso thoknak hi sal ih an hmanmi midum pawl ih cahnak ti le a sual lemlo ding.  Cuih sal pawl cu a neitu in “ka ta na si” tinak ah an tasa parah aneitui hmin thawn tacik khen an si ti si.  Cuih sal pawl ih tesinfa pawl tiang khal an pu le pa neitu ih sal an vivo ih nauhak upa ti um lo’n anmah neitu pawl ih pekzat te hlawhman ngah dingah hna an tuan.  Midum-1 asi ve mi kan sayama ih in sim daan ah sal ihsi luatnak pek an si laiah hin cui midum tampi cun luat ding an rak tih lam ti a si.  Ziangahtile, annih cu fimthiamnak zir le tlawngkai ti um lo’n lo sungih um le hna tuan an si tikah “sal ihsi kan suah le khuiah kan feh, kan um ding ih ziang hna kan tuan ding” ti an ruat ban lo ti a si. 

          Tulai kan Laitlang politics hi von zoh sehla hi thawn a bangaw mi kan tam lai men ding ka zum.  Laitlang kanmah te ukawk nak ngah taktak sehla kan uk aw thei ziklo, phunhnam, miphun buainak le iksiknak ah kan thangso thei zik lo tivek thinphannak neih cu sal lungput, mahlemah rinsan aw thei lo le Pathian zumlo hna a si lai. Ziangah himi ka rel tile, tlawng kan kai lai ih bishop-1 in “Kawlram sung um cun Kawlram ukawkdaan ih kan uk awk a tul” in ti dahmi ka ruah tikah kan ram politics hin kan fimthiamnak le kan thansonak in kham ruangah Kawhhran/Pawlpi sung khalah kan than so ding zat kan thang so thei lo tin ka hmu. 

          Canon Law/Pawlpi Daan in cutin a ti ti’n kan brek aw ciamco ih Daan t’ihnak ah Daan ih khuan in pek mi hmuahhmuah khal kan tuah ngam nawn lo, kan tuah thiam nawn lo riangri.  Tahthimnak ka von rel sal dingih, nupa um tlang ciami cu “Missa sungah kutsih lo ding” tivek pawl; Pawlpi daan ih a um le umlo khal ka thei lo.  Ka rel duhmi sawn cu Sacrament upat thiam ding kan duhsak awk ruangih kan tuah a si ah cun a tha zet ko nan, Sacrament lakih a thupibik mi Bawipai Thisa hi Missa lengih kutsih khal le pek theih a si ti sawn tu hmuah kan theih hngilh men theu.  Curuangah zumnak lamah zalennak thawn kan than so nak ding lamzin kha Daan thawn kan kham vek sawn a bang theu. 

          Canon Law in kanmah le ram ih zirin Bishop pawl hnenah remtheinak a khuan tampi a pe nan kan Kawlram sungah kan hmang tangkai thei tuk hrihlo cu a si ta ko. Tu lawngah Tribunal tla kan phuan tum rero lai ih thuthluntu/zumtu/Pawlpi sungtel pawl in kan ngah theihmi a khuan pawl tampi kan sunmi a um ding tin ka ruat theu.  Curuangah kanmah rori khalin ziangvek covo kan ngah thei ih ziang tuanvo kan nei ti hi hliakhlai rero ding kan tul tuk; kei tla cu cuvek lamah casiar zuamlo, thu thei theilo zet ka si ih poi ka ti tuk; ziangkhal le bawm aw ton ding kan si.

          Tuini kan Thuthangtha sungah Farasi mi pawl in Rom Siangpahrang hnenah ngunkhuai pek hi kan Daan in a duh maw duh lo,” tiah an suh tikah Zesuh in “Zoih hmuihmel le hmin so a cuang?” tiah a sut. Annih in, “Siangpahrang bawipa ih hmuihmel le hmin!” tiah an ti. Cutikah Jesuh in, “Cuti a sile Siangpahrang ta a si mi cu siangpahrang pek uhla Pathian ta a si mi cu Pathian pek uh,” tiah a let. 

          Himi thawn pehpar in mihrek cun Politics le Religion hi a dangtei um ding a si tivek zawngih rel tla an um men ding, keimai hmuh daan ah cun himi pahnih hi then theih an si lo. Ziangahtile kan nunnak ih a lut ciami thil pahnih an si ih kanmah sawn cu Politics (Siangpahrang) hmelcuang si lo in Khrih (Pathian) ih hmel cuang kan si. Asinan, kan thleidan thiam dingmi cu kan Pawlpi Daan kha Pawlpi sung umlo mi pawl hrang tiangih rel sak ding a tul lo timi sawn a si.  Pathian ih hmelcuang kan sinak hi khuiah kan hmu thei tile, kan dunglam Zarhpi pawlih kan rel rero zo mi Baptism kan ngah tikih kan calah “Rundamtu Jesuh Khrih neitu na si zo” tiih tacik in khen mi a si.  Hih tacik khennak thawn pehpar aw mi Cathianghlim pawl ka ron tar lang duh.

          Ezk 9 : 4, Jerusalem khawlipi pumpuluk ah feh awla hi khawpi sungih fihnungza thil an tuahmi ruangah riahsia le thinnuam lo ih a ummi hmuahhmuah pawl ih cal ah hminsinnak khen aw.

          Rev. 7: 3, Vancungmi cun, “Kan Pathian ih siahhlawh pawl an cal ih hminsinnak tacik khen an si ṭheh hlan ahcun leilung le tifinriat le thingkung pawl siatsuah hrih hlah uh,” tiah a ti.

          Efesa 1:13, Nan hnenah rundamnak a thlentertu Thuthang ṭha a dikmi thuthang cu nan theih tikah nannih khal Pathian minung nan si ve. Khrih nan zum ih Pathian in amah ih ta nan sinak langternak ah hminsinnak cu nan parah a khen; cuih hminsinnak cu pe dingin a lo tiam ciami Thlarau Thianghlim kha a si. Efesa 1:14, Pathian in a minung hnenah a kam ciami kan ngah tengteng ding ti langternak ah cuih Thlarau Thianghlim cu aamahkhan a si ih a minung hnenah cun luatnak tlamtling in a pe ding ti kan theih fiangnak tla a si fawn.

          2 Cor 1: 22, Amah ih bulta kan sinak cu kan parah hminsinnak a ret zo ih kan hrangih ret ciain a ummi hmuahhmuah kan ngah ding ti aamahkhannak ah kan thinlung ah Thlarau Thianghlim in pe zo.

          Curuangah kannih cu kan Politics ah kan zumnak nunpi ding kha kan Mission a si.  Asinan ralrin a tul lala mi cu Politics zawngih Mission tuan ding a si lo ti sawn hi a si.  Tuini hi Mission Sunday a si bangin zumtu kan zate’n Baptism kan ngahnak in Mission tuanvo neitu kan si zo ruangah tu lai kan dinhmun cio ah a tha bik ih kan Mission tuan theinak ding thazaang thar Ziangkim titheitu Pathian in in pe hrang seh! Pa le Fapa le Thiangthlarau hmin in. Amen.