Zumnak hlo ter lo ten (sim tu Rev. Fr. Lucas Sum) April 28, 2021

Zumnak Hlo Ter Lo Ten

Thuthangtha sim tu Rev. Fr. Lucas Tha Ling Sum

April 28, 2021

Siarding: Tirh. 12: 24- 13: 5; Saam 67; Johan 12:44-50

          Zumtu u le nau, nan hnenah Pathian um hram seh. Tui ttum ah “Zumnak Hlo Ter Lo Ten” timi thu kan hlawm aw hrih pei. Hmaisa ah Baibal siar ta hrih uh si. 

Johan 12:44-50

          “Jesuh cun aw ring zetin, ‘Zokhal keimah I zum tu cu keimah I zum lawng a silo, I thlah tu khal a zum a si. Zokhal keimah I hmu tu cu I thlah tu khal a hmu a si. Zokhal keimah I zumtu cu khawthim sungih a um lonak dingah hi leilung tlun ah hin tleunak in ka ra zo. Zokhal ka thu sim mi a thei ih a thlun lotu cu kei cun a thu ka tthen lo ding. Leilung thutthen dingah ka ra lo, ruundam tu le ka thu simmi a pom lotu cu a thu tthentu pakhat a nei. Ka ttong mi hi ni netabik ni ah a thu tthentu ah a cang ding. Himi hi thudik a si: ziangah tile keimai thuneihnak huham ih ka simmi a silo, I thlahtu ka pa in ka ttong dingmi le ka sim dingmi kha thu I peknak in ka sim a si. Cule a thu pekmi cu kumkhua nunnak a si ti ka thei. Curuangah ka simmi hi ka pa in sim dingin I fial mi a si,’ tiah a ti.”

          Zumtu u le nau, Bawi Jesuh leilung tlun ih a um lai ih a thusim mi le a thu zirh mi pawl a tawi zawngih kan zoh a silen khat lam ah cun a cohlang tu tampi an um. Curuangah kan cathianghlim ih in sim vek in milai thawng tampi in Jesuh cu a fehnak ih kip ah a dung in a thlun a si, a ti. 

          Asinan a thusim mi a cohlang thei lo tu khal tampi an um ve. Curuangah thinglamtah parih thahnak tiang a tuarnak a si. Tatthimnak pahnih in kan zoh pei. A pakhat nakah Jesuh ih thusim mi mitampi ih an cohlang thei lo mi cu, Jn 6 ah hi tin kan hmu: “Kei mah hi vancung ihsin a rung ttum mi sang ka si. Mi fapa taksa nan ei loih a thisen tla nan in lo ahcun nan sungah nunnak nan nei lo ding. Zokhal ka taksa a ei ih ka thisen a in tu cu kumkhua nunnak a neiih ni netabik ah nunnak ah ka thoter ding,’ a si timi a si. Hi a thu zirh mi hi an pom thei lo ih ruangah mipi in Jesuh cu an tlan san a si. Cun a pahnihnak tahtthimnak ih kan zoh ding mi cu mi tu ih kan siar mi a si. Mitu ih kan Baibal siar mi kha a tawi zawngih kan sim a silen Bawi Jesuh in a maih thu in zianghman pakhat hman hi leitlun ah a tuah lo thu mipi hnen ih a sim mi a si. Ttongdangih kan sim asilen a mah Bawi Jesuh le Pathian cu pumkhat an si thu a zirh mi a si. Himi thu zirh mihi mipi in an cohlang thei lo a si. Amah le amah cu Pathian thawn bangrep in a khai sang aw lolen Pathian thawn pumkhat kan si tin, thu a zirh, an ti ih an cohlang thei lo a si.

          Zumtu u le nau, hi mipi pawl in Bawi Jesuh ih zirhmi an cohlang thei lo vek in kan nih khal Bawi Jesuh ih thu zirh mi kan cohlan thei lo mi hrek khat a um men thei. Tahtthimnak ah veihnih vei khat cu Bawi Jesuh in ‘dil uh la nan ngah ding’ tiah thu in kam. Asinan kan dil ih kan ngah fawn lo, tiah bei dawng in kan ti men thei. Cun mi hrek khat cun Missa sungah Bawi Jesuh a um ngaingai pei maw?, tiah kan zum lo tla si men thei. Milai ih kan ruah ban lomi le kan theih ban lo mi Pathian ih khuakhannak tampi a um ding. Asinan Pathian kan zumnak cu hlo ter lo ding ten zuam ciau uhsi. Thianghlim Peter ih zumnak a hlo lo dingih thla na camnak vek in kan nih khal thla in camnak aw, tiah Bawi Jesuh ih hnen ah thlacam ciau uh si. 

          Thuthangttha ngai tu nan zaten Pathian in nan zumnak fek sinsin dingin thlawsuah lo pe hram seh. Amen.