Zumnak ruangih thlarau le ruangpum damnak

Zumnak ruangih thlarau le ruangpum damnak

January 13, 2023
Marka 2:1-12

         Cui hnu ni malte a rei hnu ah Jesuh cu Kaprenaum khua a ra thleng salih inn ah a um ti thu kha a thang
ciamco. Mitamtuk an rat ruangah inn sung cu a lawngnak pakhat hman a um lo. Sangka kiang a leng tiang in an
khat ttheh. An hnenah Jesuh in thu a sim. Cuti ih a sim laifangah mi pali in mizengpa pakhat Jesuh hnenah an
rak zawn. Milai an tumtuk ruangah Jesuh hnenah cun a thlenpi thei lo. Curuangah Jesuh umnak zawn diphun
kha an baoh ih mizengpa cu a ihphah parah it in an vun thlak. Zumnak an nei zia kha Jesuh ih a hmuh tikah
mizengpa hnenah cun ‘Ka fapa, na sualnak cu ngaithiam a si zo,’ tiah a ti.
           Cutawk ih a to ve mi daan thiam hrekkhat pawl in, ziang tin so hivek in a ttong? Pathian thangsiat a si.
Pathian siar lo zoso mi sualnak a thlah thei?, tiah an thinlung te in an ti.
Jesuh in, tho aw, na ihphah la awla na innah va tin aw, ka lo ti, tiah a ti. Mizengpa cu a tho ih a ihphah
cu a lakih zamrang zetin a feh. An zaten an mang a bang tuk lawm mam ih, hi bangtuk cu kan hmu dah lo, an
tiih Pathian an thangtthat.
           Himi cu Pathian ih ttongkam a si. Bawi Jesuh Khrih hnenah thangtthat nak um seh law.
Zumtu u le nau, mitu ih kan theih vek in mizengpa cu a ihphah a lak ih zamrang zetin a feh. Culen mipi
pawl cu a mang a banguk lawmmam ih, hi bangtuk cu kan hmuh dah lo, an tiih ih Pathian an thangtthat, a ti.
Ziangruang bikah mipi pawl cu an mang a bang? Ziangruangah Pathian an thangtthat? Zumnak ruangah a si.
Zumnak ih rah pa 3 kan hmu thei a si.
          A pa 1 nak cu Bawi Jesuh ih mizengpa a sualnak a ngaithiam nak a si. Mi pali in mizengpa cu Bawi
Jesuh hnenah an rak zawn, a ti. Cun mi an tamtuk ih ruangah mangbang le awloksongih innpar an kaipi ih
luanglu an baoh tahrak in Bawi Jesuh ih umnak zawn ahcun mizengpa cu an von thlak a si. Cutik ah Baibal in hi
tin a sim: Zumnak an nei zia kha Jesuh ih a hmuh tikah mizengpa hnenah cun ‘Ka fapa, na sualnak cu ngaithiam
a si zo,’ tiah a ti.
           Zumtu u le nau, hi mizengzawn tu minung pa 4 pawl hi Peter, Andrew, James le John an si pei maw,
tiah Baibal thiam pawl in an ti. Cun hi pa 4 pawl in Bawi Jesuh ih, ka fapa na sualnak cu ngaithiam a si zo, a
timi hi an ruahsan mi a si lemlo ding. An ruahsanbik mi cu damnak a si. Ziangkhal a va silen Bawi Jesuh ih
mizeng zawn tu pa 4 le mizengpa ih zumnak fek an neih zia a hmuh tikah an dil lo mi le an ruah ban lo mi, sual
ngaithiamnak khal Bawi Jesuh in a pe si timi kan hmu. Ttongdang ih kan sim a silen thlarau damnak a pe tinak
a si. Hihi zumnak ih rah a si.
            Cun a pa 2 nak zumnak ih rah cu ruangpum damnak a si. Baibal in hitim in sim: Jesuh in, tho aw, na
ihphah la awla na innah va tin aw, ka lo ti, tiah a ti. Mizengpa cu a tho ih a ihphah cu a lakih zamrang zetin a
feh. Mizengpa in damnak a ngah tinak a si. Hi ruangpum damnak hi zumnak ih rah a pa 2 nak a si.
Cun a pa 3 nak zumnak ih rah cu Pathian thangtthatnak a si. Mimi pawl in mizengpa dam ih a feh an hmu tik ah
an zaten an mang a bang tuk lawm mam ih, ee hi bangtuk thil kan hmu dah lo, an tiih Pathian an thangtthat a si,
a ti. Mizengpa le a zawn tu pa 4 pawl ih zumnak ruangah mipi pawl in Pathian an thangtthat a si.
Zumtu u le nau, ruangpum thlarau damnak ding hrangah siseh, mipi ih Pathian an thangtthat sinsin thei nak ding
hrangah siseh, Pathian in nan zumnak lo fek ter sinsin hram seh. Amen.