Zumnak in Rumdamnak (sim tu Rev. Fr. Lucas Sum), April 14, 2021.

Zumnak in Rumdamnak

Thuthangtha sim tu Rev. Fr. Lucas Tha Ling Sum 

April 14, 2021 (Thosal zarh (2) nak, Ni thum ni.

Siarding: Jn 3:16-21

            Zumtu u le nau, nan zaten Pathian in a thar in Easter thlawsuah lo pe hram seh. Tuttum ah “Zumnak in Rundamnak” timi thu hlawm aw dingin ka lo sawm. Hmaisa ah Baibal Cathianghlim kan siar ta pei.

            Jn 3:16-21: “Ziangah tile Pathian in leilung hi a duhdawt zet ruangah a Fapa neih sun a pek ih amah a zumtu hmuahhmuah cu thi loin kumkhua-nunnak an nei ding. Ziangah tile leilung tlunah Pathian in a Fapa a run thlah tikah leilung thu tthentu dingah a thlah lo, leilung Ruuntu dingah a thlah a si. 

            Zokhal Fapa a zumtu cu thutthennak a tong lo ding; sikhalsehla a zum lo tu cu Pathian ih Fapa neihsun a zum lo ruangah thu tthennak a tong zo. Thu tthennak timi cu hitin a si; leilung thlun ah hin tleunak a ra thleng, asinan mi in tleunak hnak in thimnak an duh sawn; ziangah tile an tuahnak kha a tthat lo ruangah a si.       Zokhal thil tthalo a tuah tu cun tleunak a hua ih tleunak sung khal ah a ra lo ding, ziangah tile a thil tthalo tuah mi kha a lang pang ding ti a phang.

            Sikhalsehla a hman mi a tuah tu cu tleunak sungah a ra ih a tuah mi cu Pathian duhmi thlun in a tuah a si ti kha cui tleunak cun a lang ter, tiah a ti.”

            Zumtu u le nau, tuittum ih Baibal kan siar mi te hi kan hrangah hnga ngamnak ngaingai a si. Ziangruangah tilen Bawi Jesuh in hitin in sim: “Pathian in leilung hi a duhdawt zet ruangah a Fapa neih sun a pek ih amah a zumtu hmuahhmuah cu thi loin kumkhua-nunnak an nei ding a si,” a ti. Pathian ih Fapa Bawi Jesuh zumtu kan si ruangah kumkhua-nunnak kan nei ding a si, tinak a si.

            Mi hrekkhat in kumkhua-nunnak ka nei ngaingai pei maw? Zumtu ngaingai teh ka si maw?, tiah kan ruat pang men thei. Zumtu taktak kan si. Zumtu ngaingai kan si thu tet ti pahnih in kan zo pei:

            Pakhatnak ah: Matthai 28:19 sungah hitin Bawi Jesuh in a dung thluntu pawl hnenah thu a cah: “Curuangah miphun hmuahhmuah hnenah va feh uhla, ka dungtluntu va si ter uh; Pa le Fapa le Thiangthlarua hmin in tihnimnak va pe uh,” a ti. Cun Marka 16: 15 sungkhal ah Bawi Jesuh in a dungthluntu pawl hnen ah hi tin fiang ten a sim hrih: “Leilung khuazakip ah va feh uhla mi hmuahhmuah hnenah Thuthangttha va sim uh. Zokhal sisehla a zumih tihnimnak a ngah ahcun rundam a si ding” tiah a ti. Zumtu u le nau, dungtluntu pawl ih thuthangttha sim mi zumih tihnimnak lolen tikholhnak a ngah tu kan si. Curuangah, mituih kan Baibal ih in sim fek in, rundamnak ngah dingih Jesuh ih thukam mi kan si, tinak a si. Kan van a ttha tuk. Himi te hi kan hrangih thuthangttha bik a si.

            Cun a pahnihnak ah ziangtin zumtu kan si nak, tet ti kan piah thei a si, tilen tuvek ih RVA ihsin Pathian thutthangttha kan ngai rero mi te khal hi zumtu kan sinak ih tet ti tthabik pakhat a si ve. Pathian kan duhdawt le kan zum ruangah RVA ihsin thuthangttha kan ngai rero nak a si. Zumtu kan sinak tet ti khan rero a si. Curuangah tikcu le caan cemih thuthangttha kan ngai rero tla hi a lak a si hrimhrim lo. Kan thlarua rundamnak hrangah a si. a ttha tuk. Zuam sinsin uh si. 

            Hmun tin ram tin ih a um mi zumtu u le nau:

  • Pathian in nitin ten nan zumnak fek sinsin dingin thlawsuah lo pe hram seh.

  • Pathian in nitin ten nan zumnak karh sinsin dingin thlawsuah lo pe hram seh.

  • Pathian in nitin ten nan zumnak mi hnenah phuang thei dingin thlawsuah tampin lo pe hram seh. Amen.

 

Add new comment

2 + 3 =