Zumtu ih Zumnak (sim tu Rev. Fr. Peter Zin), January 30, 2021

Zumtu ih Zumnak

Thuthangtha sim tu Rev. Fr. Peter Zin

January 30, 2021

Siarding: 11:1-2, 8-19, Saam kan siar ṭheunak caan ah Luka 1:69-75; Marka 4:35-41.

           “Ziangahso cuti lawmmam ih nan ṭih? Zumnak nan nei hrih lo maw si?... Zumnak neih timi cu kan ruahsanmi kan ngah tengteng ding, ti zum le kan mit ih kan hmuh thei lomi a um rori a si, ti zum khi a si.” 

          Thuthangṭha a ngaitu duhdawtmi nu le pa, u le nau pawl, nan zate hnen ah Bawipa in thinlung, thlarau le taksa damnak a lo pek hai hram seh la nan hnen ah daihnak um ringring hram seh. Tuni January 30, 2021 (Zarhte) ni ih kan siar dingmi Bible pawl thwn pehpar in zumtu pawl ih kan zumnak thu mal lai ruat tlang in thlarau thazaang kan lak tlang ding in ka lo sawm. Kan siar dingmi Bible pawl cu Hebru 11:1-2, 8-19, Saam kan siar ṭheunak caan ah Luka 1:69-75 tiang siar a si ih Gospel siarnak cu Marka 4:35-41 tiang a si. 

          Kan siar ding mi Gospel cu Bawi Jesuh in thlipi hrang a daihternak thu a si. Veikhat ah Bawi Jesuh le a dungthluntu pawl cu misenpi pawl kha taan in tili ih khatlam ralah lawng thawn an feh. Cutiin an feh rero lai ah rinlopi ah thlipi nasa zet in a hrang ih tilet a tho ciamco tikah lawng sungah ti a lut vivo ih an lawng cu ti in a khat zik ti a si. Cutikah dungthluntu pawl ṭih le thinphang in an um. Culaiah Bawi Jesuh cu lawng ih mei lam ah a rak um ih tohkham par te ah a rak itthat ziar men. Curuangah dungthluntu pawl in an ṭhang ih, ‘sayapa, kan hlohral thluh ding hi na poisa lo maw si?’ tiin an ti.  Cutikah Bawi Jesuh cu a itnak in a tho ih thlipi kha, “Hrang nawn hlah” tiin le tilet khal cu “dai aw” tiah thu a pek hai. A thu pek mi vek in thli a hrang nawn lo ih tilet khal cu a dai ta. Cuhnuah Bawi Jesuh ih a sim mi ṭongkam kan zoh asile a dungthlutu pawl ziangruangah an ṭih timi kan hmu thei. Bawi Jesuh in a dungthluntu pawl ziang a ti tisile, “Ziangahso cuti lawmam ih nan ṭih? Zumnak nan nei hrih lo maw?” tiah a ti. Curuangah an ṭihnak hi kan zoh tikah thlisia a pin tuk ruangah siloin, tilet a roh tuk ruangah siloin zumnak an nei lo ruangah a si deuh ti hi kan hmu thei. Bawipa an lak ah a um na cing in Bawipa nih in kilkhawi ding, in humhim ko ding ti an zumnak hnak in kan hloral ding ti an ṭih nak khi a tam deuh. Curuangah Bawi Jesuh in “Ziangahso cuti lawmam ih nan ṭih? Zumnak nan nei hrih lo maw?” tiin a ti hai a si.

           Nitin kan nunnak ah kan zoh a sile vei tampi dungthluntu pawl vek in ṭih le thinphang in kan um caan a um ṭheu ding. A caancaan ah cu Pathian hnen ah kan phunzai caan hman a um men ding. Ziangruangah kan hnen ah hi vek na cang siang. Ziangruangah zamrangten in run lo, kan thlacamnak na ngai lo tivek in maw a phunphun in donhar in kan um caan a um phah ṭheu ding. Bawipa in kan thlacamnak in ngai lo mi a si lo. Kan harsatnak in thei pi lo khal a si lo. Bawipa cu kan thei ṭheu vek in a khul a fung zet vek a bang ṭheu nan a tlai dah lo ti a si. Kannih in kan duh mi lawng kan thei ih Pathian cun kan hmuh ban lo mi kan theih ban lo mi thiang a thei tu asi ruangah nuam tete in, a ṭhabik in hna a ṭuan ṭheu asi. Thlacamnak ah zohṭhim tlak mi sidingah thinsau tein, beidong lo tein thlacam thei ringring si a ṭul. Thla kan cam tin in hmakhat te sungah kan ngah ringring sehla thinsau lungfual tein thla a cam theitu tiah zoh ṭhim tlak timi hi a um thei lo ding. Thuṭhimnak ah nupi nu pawl ih zohṭhimtlak mithinghlim a si mi St. Monica hi zohṭhimtlak nu a si dingah Pathian in a thlacamnak hmakhat te ah a kim ter lo ih kum rei pi thla a cam ter. A thlacamnak ni malte asilole caan tawite sungah Pathian in kim ter ta sehla nu pawl ih zohṭhimtlak mithianghlim ah a cang lo men thei. 

          Himi cu thuṭhimnak pakhat lawng a si ih cu lo khal a thu hla tampi a um thei lai. Kan dil mi bik a kim hlan ah kan thlacamnak thawng in a dangdangah Pathian hnaṭuannak tampi a rak um rero ti kha thei uh si. Bawi Jesuh in a duh sela cu a mah rori to mi lawng kha thlisia le tilet in dai lo lawlaw in a tuah thei mi a si ko. Asinan himi thisia le tilet an tuarnak in zirh duh mi, sim duh mi a nei asi. 

          Cun dungthluntu pawl ih an ṭihnak kan zoh asile kan hloral thlang ding ti an phang ruangah a si. An ruahsannak a hlo thlang tiin kal khal kan ti thei. Zumnak le ruahsannak thawn peh parin Bible a veikhatnak kan siar mi ah kan hmu thei. Hebru 11 sungah, “Zumnak neih timi cu kan ruahsanmi kan ngah tengteng ding, ti zum le kan mit ih kan hmuh thei lomi a um rori a si, ti zum khi a si,” a ti. Minung hi ziangtikah kan beidong ti a si le kan ruahsan mi kan ngah nawn lo ding, a cang thein awn lo ti vek in ruahnak kan nei tikah kan bei a dong ṭheu. ‘Zumnak neih timi cu kan ruahsanmi kan ngah tengteng ding, ti zum le kan mit ih kan hmuh thei lomi a um rori a si, ti zum khi a si,’ ti a sivek in ruahsannak kan nei nawn lo le cu kan zum nak a hlawhsam tinak a si. Cun kan mit ih kan hmuh thei lomi a um ti zumnak, kan ruah ban lo mi kan thei lo mi Pathian in in tuah sak ding tivek zumnak pawl hi zumnak taktak a si. Zumnak a nei taktak mi hrangah cu beidong ti hi a um thei lo ih Pathian in ziang a duh ih ziang a tuah pei ti lawng zoh le hngak ding kha a si. 

          Bible veikhatnak kan siar mi thotho ah zumnak thawn pehpar in Abraham ih zumnak thu in sim. Pathain in Abraham hnen ah a fapa that ih thawinak pek ding a dil tikah Abraham ih ruatnak cu Pathian in Isaak cu thihnak ihsin a thotersal ding tiin a ruat. Simduhmicu a fapa cu a thi rori ding ti in ruahnak a nei tinak a si. Tefa tampi na nei ding le a ti fawn, a fapa neih sun le a thatter fawng tikah, minung ruahnak in cu thil cang thei a si lo. Abraham in ziang a cang lai ding ti a thei lo nan beidong lo le thin phang lo ṭih lo te in Pathian a rinsan thei thotho lai a si. Kha kha zumtu ih zumnak taktak cu a si. Zumnak taktak a nei ruangah ṭih lo in beidong lo in a um theinak a si.

          Duhdawtmi zumtu nu le pa le u le nau pawl, ziang vek in harnak kan tong caan khal ah zumtu kan si vekin Bawipa in ziang a duh a si pei, Bawipa in ziangtin a tuah leh pei timi zumnak ruahsannak nei in beidong lo in a nung ringring thei tu zumtu dik kan si theinak dingin Pathian hnen thluasuah dil in zuam cio uh si. Pathian in thlarau thazaang lo pe cio hram seh. 

Fr. Peter Lal Zin Thang (Hakha Diocese)