Zumtu pawl ih kan ttul bik mi Thlarau Thianghlim

Rev. Fr. Lucas Sum ih thuthangtha sim mi (May 30, 2020)

Zum tu u le nau, nan zaten Thlarau Thianghlim in lo umpi hram seh.

Tuittum ah "Zumtu pawl ih kan ttul bik mi cu Thlarau Thianghlim" a si, timi kan ruat tlang pei.

Zumtu u le nau, tui kan dung zarh pi May thla 24 sunah Bawi Jesuh Vancung ram ih a kainak puai kan tuah. Cun tui zarh pi May thla ni 31 sunah Pestecost kan timi Thiangthlarau ttumnak  Puai kan tuah ding a si. Curuangah Bawi Jesuh Vancungram ih a kai ni le Thiangthlarau ttum ni kar lah caan hi cu Jesuh ih dungtluntu pawl in  Thlarau Thianghlim an hngah caan a si.

Ziangruangah Bawi Jesuh in vanih ka Pai hnenah kan kai dingih nan hnen ah Thianghlarau ka run thla ding a si, tiah a dungtlung tu pawl hnenah thu a kam? Ziangruangah dungtlun tu pawl in Thiangthlarau an ttul? Thiangthlarua in ziang so a tuah sak ding?

Himi thu suh nak pawl let dingah tampi a um. Asinan tui ttum ah cun pahnih lawng kan ruat pei.

A pakhatnak ah: Ziangruangah dungtlun tu pawl hnen ah Thiangthlarau thlah a ttul a si tilen Bawi Jesuh ih sim mi le zirh mi a tamtuk le a thuh tuk ih ruangah dungthlun tu pawl in an thei fiang thluh cawk lo. Curuangah Bawi Jesuh ih sim mi le zirh mi an theih fiang thei dingah zirh tu le bawmtu Thiangthlarau an ttul a si. Hitin Baibal sungah fiang zet in kan hmu: Johan bung 14, cang 26: "Ka hmin in ka Pa in a run thlah ding mi bawmtu Thlarau Thianghlim in ziang hmuahhmuah a lo zirh dingih ka lo sim cia mi hmuahhmuah khal a lo cing ter sal ding" tiah Jesuh in a dungthlun tu pawl hnen aha sim.

Cun a pahnih nak ah: ziangruangah dungthlun tu pawl in Thlarau Thianghlim an ttul a si tilen thu dik le thu hman ih hruai tu dingah a si. Johan bung 16, cang 13 sungah hi tin kan hmu thei: "Sikhalsehla Thlarau a run tikah cun Pathian thudik langtertu a si ruangah thudik hmuahhmuah ah a lo hruai ding" tiah Jesuh in dungthlun tu pawl a sim.

Zumtu u le nau, a tawi zawng ih kan sim asilen Bawi Jesuh leitlun ih a um nawn lo ih ruangah thudik le thuhman hmuh suak thei nak dingah dungtlun tu pawl in zirh tu le hruai tu Thlarua Thianghlim an tul tinak a si.

Tui caan khal ah mitampi ih kan ttul bik mi cu thudik zirh tu Thlarau Thianghlim khi a si. Ziangruangah tilen thlarau lam ih kan khual tlawnnak ah vei tampi mangbang le awloksong in kan um theu. Tahtthimnak ah vanram kai nak dingah: (1) Pumkhawm a ttul maw, ttul lo? (2) Pawl a ttul maw, ttul lo? (3) zumnak lawng in a tawk maw? tuahnak the a ttul maw? (4)Tthen hra tthen khat pek tengteng a ttul maw?( 5 ) Asilolen pian thar tengteng a ttul maw? piang thar lo in teh vanram kai a thei pei maw? tivek pawl in kan thinlung in cawk bawi ttheh theu.

Zumtu u le nau, dungtluntu pawlin ziang hmuahhmuah zirh tu dingih Thlarau Thianghlim an ttul vek in kan nih khal nitin kan nunnak ah zirh tu Thlarau Thianghlim kan ttul ve a si. Dungtluntu pawlin thudik ih hruai tu dingah Thlarau Thianghlim an ttul vek in kan nih khal thudik ih in hruaitu dingah Thlarau Thianghlim kan ttul ve a si.

Thuthangtha a ngai tu nan zaten, Thlarau Thianghlim in lam lo hruai in lo umpi camcin hram seh!