Pathian ih Nu Maria (January- 1)

    Pathian ih Nu Maria (January- 1)

           Fala thianghlim Maria cu Pathian ih Nu tiah hlanlai ihsin an rak upat zet mi a si. Kumzabi 4 ah Constantinople ih Bishop a si mi Nestorius in Nu Maria cu minung cannak lawng la tu Jesuh ih Nu lawng a si ih Pathian ih Nu a si lo thu cu thuk zet in a sim ih Greek tong in “Theotokos” ti mi a rak dodal. Asinain, Bawinu Maria cu Pathian a si mi Jesuh ih Nu a si vek in “Pathian ih Bawinu” tiin kawh ding thu kha kum 43 ah Ephesus khuapi ih an tuah mi thurelkhawmnak ah an rak than. Cui thurelkhawmnak ih mipi pawl in Bishop pawl khuapi sungah an hruai ih nuam zet in neh nak puai an rak tuah. Cu lawng si lo in thurelkhawmnak a hlawhtlinnak ni hngilh lo nakah Pope Sixtus a pathum nak ih tuah mi a sunglawi zet mi St. Mary Biakinnpi an rak sak.

          Tui ni ah hin kan nih khal in Bawi Jesuh ih vunzim tan nak puai le Jesuh hmin pek nak puai kan hmang a si. Jesuh ih duh san cu “rundamtu Pathian” ti nak a si. Lk 2:21 sungah, “Zarhkhat hnu ah Naute cu a serhtan caan a kim tikah Jesuh tiah a hmin an sak” tiin kan hmu thei. Gen 17:12 sung khal ah “nan tesinfa mipa hmuahhmuah in an serh nan tan ding” tiin Pathian in Abraham hnen ih a sim mi a si. Serhtan ti mi cu “Pathian hnenih apnak” ti duh san a si.

          Kan theih ding mi ah Bawinu Maria Pathian ih Nu si nak a ngah nak cu kan Pathian a si mi Bawi Jesuh a hrin nak in Pathian ih Nu si nak a rak ngah nak a si. Hi mi thu ah hin theih thiam lo ding a um lem lo ding ah zum a um. Mihrek cun hi thu hi a pom thei lo tu an tampi lai. Hmansehla, AD 431 ih Ephesus khuapi ih a veithumnak Ecumenical Council ah Bishop Paul in a rak nemhnget mi a si.

          Kum 1950 ah Pope Pius XII nak in zumnak thuthuk ah a nemhnget ih Pathian ih Nu, Sual hram nei lo ih a seem mi Nu, kumkhua Fala Thianghlim a si nak cu Pawlpi sungah felfai zet in a run than a si. Cun kumthar ni sunglawi thu ah hin kumthar kan ti mi hi kan hman ding mi kum ih hmaisabik ni tiin tla kan ti thei. Pathian hnenah kum hlun sungah dam le cak ten kum thar kan thleng tiih lungawi nak ni khal a si.

          Kan Pathian hnenah lungawi thu sim tlang uh si. Hi mi theih kauh nak ah mirang Calendar le Julian Calendar tiin a rak um. Gregorian Calendar cu Christian Biaknak pawl ih hman tam a si. Julian Calendar cu Orthodox Church pawl ih an hman tlang pi mi a si. A tu ah cun leilung pi ah hin Gregorian Calendar hi hman tlangpi a si. Gregorian Calendar hlan ah Julian Calendar hi Pawlpi in kum 100 hrawng an rak hmang tiin thuanthu ah kan hmu thei. Julian Calendar an rak hmang ih a famkim lo ruangah Gregorian Calendar an rak hman nak a si.

Pope Gregory XIII in 1502-1585 sungah Julian Calendar a run rem sal ruangah Gregorian Calendar tiin an run kawh nak a si. Hi mi thu a rak ngai tu nan zaten kumthar cibai thlasuahnak Pathian in lo pe hram seh.

https://www.youtube.com/watch?v=W2E8ApivC44

Add new comment

6 + 2 =