Baptism pek tikah hlawhtling ten pe thei dingah theih tul mi pawl 11 February 2022

Baptism pek tikah hlawhtling ten pe thei dingah theih tul mi pawl

11 February 2022

         Baptism peknak cu thlasuah tiah an ko ih thluasuah tel lo ih tuah lo ding a thupi zet. Curuangah tuah ding, hrial ding mi pawl theih a tul. Hrekkhat Pathian riantuantu pawl cu Pathian in ziang hmuahhmuah a thei theh ko ti men in daithlang zetin an tuah theu. Timtuahnak caantha an ngah ko an mah lam ih timtuah dingah pelhnak cu mai riantuannak parah duhnak, ziang ih siar lo nak a si.

         Baptism pek tikih thlacamnak cu ‘(Baptism hmin le nu le pa ih pek mi hmin sal in) Pa, Fapa, Thiang Thlarau ih hmin in Baptism ka lo pek’ ti a si. Baptism petu in cu tiin a ti lai ah Baptism peknak thianghlim cu Baptism petu ih cal in a toih ding. Ti a luan lawngah sualnak pawl a hlo ti duhsan a si. Baptism pek tikah Baptism peknak ti thianghlim a cal ah toih in siseh, phim in siseh pek a theih. Pathian thuzirnak ih theih mi vekin lo theih lo ih tul mi dinhmun vekah Baptism a la tu tinkim in Baptism an pe thei ti a si.

      Asinan, a thupi dinhmun vekah Baptism petu, riantuantu a um lo caan vek a ti duhsan a si. Baptism petu minister pawl cu Deacon sinak a lak tu ihsin thokin ordination a ngah zo tu Catholic Puithiam pawl an si. Catholic Pawlpi dinhmun in ziang vek hmun, zokhal si sehla Baptism pek tikah a dang thlacamnak pawl thawn pek a si lo vekin pek khal a ngah lo. Hi thuhla pawl thawn pehpar in thusuhnak in sut.

1. Hrekkhat Puithiam pawl in Catholic mipi pawl Baptism pek tikah hlawhtling lo zet ih rak pek mi pawl an um maw?

August, 2020 ah zumnak thawn pehpar mi thuzirhnak zungih suh mi, Pope Francis ih nemhnget mi thuthan sungah Baptism pek lai ah Puithiam in ‘kan mah’ ti mi hmang in Baptism rak lak tu Catholic Puithiam pawl dinhmun in tikholhnak Sacramentu a hlawhtling lo’ tiah a rak than.

         ‘Kan mah’ ti mi in mi tampi a kawhhmuh. Asinan, a ngaingai ih Baptism petu cu Bawi Jesuh a si. Hrekkhat Puithiam pawl in ‘Pa Pathian, nu, lukaitu pa, lukaitu nu, pi pu pawl, sungkhat pawl, rualpi pawl, kohhran mipi pawl thawn kan mah in nang mah cu Pa, Fapa, Thiang Thlaru ih hmin in Baptism kan lo pek’ tiin an pe theu. Lamhmuhnak vekin tuah lo in Sacramentu cu hlawhtling ten ka tuah sak zo ti a theih lo. Ziangah tile cui caanserh cu Sacramentu tuahnak a si lo. Tuah tiih ruat ter ding fang lawngih tuah mi a si.

1. Cuti a sile Sacramentu hlawhtling lo in a lak tu pawl hrangah ziangtin a si ding?

Deacon siseh, Puithiam siseh Baptism pek tikah thlacamnak cam lo ih a rak pek a si le cui dinhmun vekah Baptism a lak tu pawl ih tikholhnak cek fel sal a tul. Kan dung rei lo te ah America ram, Phoenix Diocese ah hi vek thil a rak cang. Cui Diocese ih riantuantu Puithiam pakhat in Pawlpi ih lungkim lo mi thlacamnak thawn Baptism a rak pek nak cu Puithiam a cannak kum 20 a rak luan zo. Cui Puithiam cu Andres Arango a si. A mah cun a daithlangnak hrangah ngaithiam a rak dil. Baptism a rak pek mi pawl cu Pawlpi in a cek fel sal ih a bawm sal.

1. Cu a si le a besia tuk maw?

Bawi Jesuh a zumtu hrangah cun hivek Tikholhnak Sacramentu cu a besia tuk. Ziangah tile Baptism lak hnu lawngah sual hrampi a thiangfai theh ih Pathian ih fate taktak ah kan cang. Pawlpi ih Pathian thuzirhnak ca uk (CCC) ah ‘Baptism cu Christian pawl ih nunram hrampi a si. A dang Sacramentu thawngin sualnak pawl in kan thiangfai. Pathian ih Fapa thawngin hrinsalnak a si. Kan zaten Jesuh Khrih ih pawlkom sungtel ah kan cang. A rak din mi Pawlpi thawn kan kom awk.

         A hnatuan pawl kan tuan tlang. Baptism laknak a um hrih lo ahcun a dang Sacramentu pawl lak a ngah lo. A tlangpi thu in tikholhnak Sacramentu hlawhtling lo ih a lak tu an mal. Puithiam si lo nacing in puithiam vekah thuam aw in Baptism petu pawl ih tikholhnak thei lo ih lak mi dinhmun vek ah a cang thei.

         Vatican zungpi ah a cekci mi (2020) thuthan a suah hnu ah Baptism lak lai ih rak zuk mi video pawl zoh sal in an cam mi thlacamnak pawl ngai sal hnu lawngah a palhawk thu an thei fiang. America ram, Oklahoma khuapi ih Fr. Zechary Boazman cu hi vek dinhmun vekah a rak cang. Baptism a rak lak lai ih zuk mi video file zoh sal hnu ah theih a si. A mah Baptism rak pek tu cu Dallas Diocese ih Deacon pakhat a si. Deacon in Baptism a rak pek lai ih a cam mi thlacamnak a rak sual. Detroit Diocese ih Fr. Matthew Hood khal in a mah Baptism an rak peknak caanserh ih video a zoh sal kha theih a si. Hi thilcang pahnih ah Baptism peknak a hlawhtlin lo ruangah Puithiam hman an si nawn lo. Cu vekin Christian pawl khal Christian pawl an si nawn lo. A hlawhtling mi Baptism hrangah cun Baptism lak sal a tul. Hi vek dinhmun pawl zohton a si le a parlam ih sim zo vekin thlacamnak palh mi thawn Baptism rak lak tu, Puithiam pahnih rak pek mi Sacramentu pawl, an rak tuah mi Bawipai Thi le Sa pawl a rak hlawhtling lo.

1. Vatican dinhmun in hi thilcang ziangtin lai a rel ding?

2020 ih thuthan cu Vatican (2) conference ih thubohcatnak ‘Sacrosanctum concilium’ sirhsan in ‘zianghman sambaunak um hlah seh; Puithiam khal siseh, Pawlpi ih nemhnget mi tidaan ah mai duhduh in silhkhahnak, bal saknak, thlengnak pawl tuah theinak an nei lo’ tiah a rak simfiang.

1. Ziangruangah ‘kan mah’ tiih hmannak ruangah Baptism a hlawhtling thei lo?

‘Jesuh Khrih a mah rori in Sacramentu a rak din ih Pawlpi hnenah a rak ap’ tiin 2020 ih thuthan suah mi ah tarlang a si. Pawlpi in hi Sacramentu pawl tuah daan pawl a rak kilkhawi. Cui hlei ah Bible Cathianghlim pawl thawn a cekci ih tarlang mi Sacramentu pawl cu Jesuh Khrih in ziangtin a rak tuah timi felfai zet in Pawlpi ih a rak thlun mi a si. Nu le pa pawl, pi pu pawl, pawlkom ih Baptism peknak caanserh ih a thok lam ah tarlang a si zo tiin cui thuthan ah a simfiang.

         Tui tarlang mi dinhmun pawl zoh a si le Baptism petu Puithiam pawl, Deacon pawl in an mai riantuannak ah daithlannak ruangih a cang mi a si. Kan mai mawhnak ruangih a cang mi si lo hman sehla kan ralrin cu a tul thotho. Curuangah tu ah cun Baptism pe dingah Biakinn siseh, Baptism pe dingah nemhnget mi hmun ah siseh, Baptism la tu ding nauhak ih nu le pa pawl, sungkhat pawl, rualpi pawl, lukaitu nu le pa pawl dinhmun in Baptism pek lai ah Puithiam pawl ih cam mi thlacamnak pawl kha thuduh ruangah  si lo in mai fa le pawl ih thlarau hrang thathnemnak pawl sung ter lo dingah tha ten ngai a tul.

         Hi thuthang cu CNA thuthang ih kan ngah mi a si.

Photo courtesy of Catholic World Report

https://bit.ly/3sC1UKI