Bible le lai Pupa pawl ih tuah daan sim fiangnak (Oct 14, 2022)

Bible le lai Pupa pawl ih tuah daan sim fiangnak. (oct 14, 2022)

          Mipumsiarnak 29:28-40, thawn pehpar aw ih U Run Thio ih sim mi a si. Innsang pakhat ciar sang zawl hnih nan keng pei ti a si. Pupa pawl ih an hman daan cu zinglamah tilva pakhat an thatih zanlam ah raithawi a cu an tiih tilva pakhat an that ih a thaiziang zinglamah an sangken mi an ei. Zanlam thawinak ah raitluan tuucang an that ih sualthalh thawinak ah Me pakhat an that cu cu Isreal pawl ih hman dan a si.

Kan Pupa pawlin  Zauzik ah thingtek parah meisa an vangih “zawi phul mei tluang sawn maw, kanmai kan mai phul mei tlauang sawn maw? Zawi tumvang ring sawn maw? Kan mai kanmai tumvang ring sawn maw?” tiah ni sarih sung puainak ah sunglawi tak in an rak hmang. Cumi kan zoh sal tik ah Isareal pawl ih Pathian ih a pek mi thu kam thawn a bang aw. Cucu kan Pu kan Pa khal in tuisun tiang an thlun ih tu kan ni khua ih tui kum hnihnak kan tuah mi hi kan Pu kan Pa pawl ih an rak tuah mi hi kan thlau siang lo pei.

Bible ca sungah nan nunphunh thlau hlah uh tiah in ti. Rawl nan lak tikah a hmaisabik ah Puithiam hnen nan pe pei an ti mi kha, kan Pu kan Pa khal in an lak hmaisa bik mirawl thar kha khuazing Pathian hnen pe hmaisa lo in thlairawl kan khawm thei lo an rak ti. Hlamhmai pumhnih maw a si lole fang rel hnih maw reltan maw tin an rak pek cu cu Puithiam hrangah an rak pek. Lorawl nan khawm tikah lori tiang nan hawl lo pei ziangah tile ramdang mi le rethei mi pawl nulepa lo pawl in an ei ding hrangah tan hrim uh, a lep khal hawl hlah uh tin an rak ti theu.

 Kan pukanpa pawl khal in ramri kiangih rawllep khal la hlah uh tiah an rak ti theu. A sinan tuisan mino pawl cun daan run thlun thei lo in rawllep khal kan hawl rero. Kum khat ah veithum puai an rak tuah. Judah kum le kan lai kum siar daan a bangaw. Meisen thla an ti ih March le April an tawm aw ih Lorih meisen an rak ul. Kaileng an kah, tlangvel pawl thawn Saihlum kah an rak zuamaw. Cui sin thlaram thla an ti ih June, July thla ah a hrek veve ah thlaram an rak ti.

Cusin Nimkuut tin thla an rak siar. Pupa pawl in Mirang kum in an rak siar lo. Kan lai kum siar le Judah kum siar daan a bangaw.  Curuangah September le October ih kan tuahnak hi kan Lai kum le Judah kum a bangrep. Kan kum cem a si ih kum thar khal a si.Curuangah rawl khawm puai nan tuah ding a ti mi hi kan tuah. Curuangah kum khat ah veithum puai an tuah ding a ti mi hi March le April ah Meisen thla ah an rak thawi.

Khuaseen zaten an rak ul. Cun thlaram thla thar puai an ti tikah June thla hrek le July thla hrek a tawmawk ruangah Vannileh an ti ih khai thla ah khan Lasii an rak biak ih thinghnge parah mei vangin nithum an rak puai. Cutin tui October thla ih kan hman mi hi Bible ca sung vek a si le nisaan ni 14 in nan thok pei ih ni sarih sung puai nan tuah pei tiah a rak ti.Cucu kan PuPan an run thlun ih kum cem kumthar Puai, Fanger puai an run ti. Cui Fanger Puaiah sangzawl hnih an keng ih Puithiam hrangah zawl khat, seenpi ei dingah zawlkhat, zinglamah tilva an that, zaanlamah an rak that cuti cun an rak hmangih cui Fanger Puaiah cun a ni thumnak ah Sa er berthing cu mualah an rak ei. Pathian an biak tikah Biaktheng nei lo in an um lo.

 Puanthlam Puai a ti ruangah thlamte nei lo khal an um lo. Curuangah mual ih tin kim ah thlamte an nei ih biaktheng Sasen peknak an rak nei. Cuti cun nisarih sung kan Pupa pawl in an rak hmang ve. Cule Daanpeksalnal sungah kan zoh a si le nan thenhra then khat pawl le thaithar rawl pawl pe uh ziangah tile mithi ngai khal in ka um lo ih thisiah khal ka hmang lo tin Pathian tihzah nak thawn nan Luu kun in thla cam uh tiah Josuah in a rak sim. Cu mi thlun in kan Pupa pawl khal in thi an rak siah, toh an rak pi nisarih sung an rak pi. Cule lo hlah anrak ti ih sung le te a nai bik in sunhlan lo an rak feh pi. Zuthawn an rak tah pi aw. Hi mi cu Khuagli ih U Run Thio ih sim mi kan Pupa pawlih an rak tuah daan le Isreal miphun pawl ih an rak thlun mi a pehthlai awk daan a run rel mi a si.

 

 

Add new comment

3 + 7 =