Chin le Kachin aan rak unau awk daan thutawi

Chin le Kachin

            Tibet ram ihsin an suakih kawlram an rung thleng tikah Chin le Kachin cu unau suak khat an si vek in hmunkhat ten um nak hmun le ram hawl in an feh tlang vivo. Tuih Kachin ram an thleng tikah nikhat cu hram lak ih an feh rero laiah Kachin cu a va daileng ta. A upa Chin cu a rak feh sungih thing kung le ram ban tla a rak sat phah vingvo. A nau cun a dawi sal tikah a u ih a ram ban kung a sat mi pawl cu sau pi an rak cerh zo ti a hmu. Cutikah ka u ram ban sah mi a cerh sau tuk zo, ka man nawn lo ding a ti ih tui Kachin ram ah a um lan ta. Tuih ni tiang a hmin cawi in Kachin ram tiin an ko lan ta. Chin cu a feh vivo ih kham ti hmun ah kum tawk fang a um. A khua kiangih a luang mi tiva cu Chindwin tin hmin a sak. Cuih hlan ah cun Talavuati tiva tin an rak ko. cuih hmun ah kum tampi a um ih milai an pung zai vvo tikah um nak dang an hawl. Mi hrekkhat cu khawm pat ah an thleng ih cuih mi pawl cu Lushai, paih te, thado , kuki le naga tla an si. Khua a rei tikah mi hrek cu Chindwin tiva an thlun ih homalin, mawlaik, kalaywah ah an thleng. Mi hrekhat cu an suk vivo ih minkin, kani le mungywa an thleng. A hrek cu an suk hla sin ih a tuih makwe ram then tiang an thleng. Cuih pawl cu kawl pawl in laimi hrek khat pawl tin an rak ko ih tuini ah Asho chin tin kawh mi pawl ansi.

Chin, Kachin le Naga

            Chin, Kachin le Naga pawl cu unau suakkhat te an si. Voikhat cu hmun le ram hawl nak ding an tawi vak nak dingah vok kuang lawng cu banhla kuang in an tuah. Tiva sungih cuih lawng thawn an feh rero laifang ah tisung ih an lawng thlam cu rulpi malsak vekin Kachin in a vun hmu. Cuih a thil hmu mi cu Naga in that a tum rero nan a hmu thei lo. Chin cun "khale, Naga nang in lawng rak hlau awla, kei in rulpi ka rak bawh ding. Kachin nang in rul pi a rat le rat lo in zoh pi aw la, in cuk tum ih a lu a hundak asilen ka nam sau in ka sat tanding" tin a nau le a sim. An feh rero laiah cun an long thlam cu rulpi vekin a hung lang.

            Chin cun a naam sau pi thawn rulpi ka sat a ti nan an banhla kuang lawng kha a sat tan pan lo maw. An lawng then hnih ah a then awk ruangah hmun khat ten feh tlang thei nawn lo in Kachin le Naga cu tiva thlanglam kap ah an suak ih, Chin cu saklam tipi kap ah a suak. Cuih sin Chin cu kawl le shan pawl rak umnak kabaw horkuam ah a va um ih kachin le naga umnak thawn tipi ral deng ah an umdah ta asi. Hiti-in lai mi kan pi le pu khal cu kumzabi pa 8 nak hrawng ah Irrawady le  chindwin tiva karlak ah um hmun a ak khuar ih, cuih hmun ihsin ram khat nak le hmun rem can nak hawl in an thawn ih an vai vivo asi. Mi hrek khat cun Chin hi kalai tin an ko ruangah kalai, kachin, karen, kaya pawl hi unau suak khat an si, an ti.

Kawl ram sung ih an sul hnu pawl

1. Sagaing khawpi sungah Chinywa timi a um ih, metei cithlah pawl an um lai an ti.

2. Sagaing khaw pi sungah chinsuh timi laimi pawl ton khawm nak hmun tu tiang a um lai.

3. Mungywa khua kaing chindwin tiva kap ah piter 13 a sang mi lung phun pakhat cu kawl pawl in chin phaya tin an ko.

4. Pagan kyuaksa hmaisabik an ngan nak ah, chin pawl cu chindwin valley ah an rak um ih cuih hmun cu chin khur tin an rak ko.

5. Hih cauk sungah mungywa saklam chindwin horkuam cu chin kut sugnah a um tin a ngan.

6. HIh chindwin tiva kap ih an um nak ah, Tuluk ram an um lai ih tibur fawh nak kuak pi le kuakpa an rak hman mi an hmang lai.

7. Til va thisen thawn raithawi ih thing le lung biak nak khal an rak tuah. Himi biak nak hi tibet mongolia an um lai ih an um nak ram mi pawl ih biak nak an cawn mi a si.

8. Lovah ur in lo thlo ih pumcawm an rak thiam zo ih Homilin kiangkap hrawng ah lo an thlo rero.

9. K. zawla in "kan pipu paw rak um nak ti dang lam thei lo khua pakhat cu Yangon leh zinanchawng karlak ih a ummi chinywa asi" tin a rak ngan.

10. Kalay horkuam sung khal ah laimi pawl ih dawr rak tuah nak chin saing timi kalay khaupi kapte ah a um lai. Cuih mi lan hnu peng  5 hlat hrawng ah lai mi pawl ih tang cil nak hmun chinttalin timi a um ih tuah cun zingalin khua tin an ko. Cun Angteng khua kian ga laimi pawl ih ral ven nak hmun a um ih, tu ah chinkin khua an ti.

            Hih thu pawl kan zoh tikah kan pipu pawl hi kaw ram ah an rak um hmaisa zo nan a hnu ah lai tlang ah an kai leh cop asi ti a lang fiang a si. Chin Cithlah pawl in kawlram ih an thlen hnu tiang in, tibet ram ih Pathian thei lo pawl hnenih an rak um lai an raithawi thlacam nak vekin an hmang ringring.

 "Aw cunghlum zakau kan pathian aw, ka hnuai tip ka khaw ziang aw, ka par ih nat nak um pawl khal in thianghlim ter hram aw. Cun ruah pi khal a can hman ten sur ter awla, mal in sawm sak aw, miphun hnam tin hnak ih cungsang sawn dingin in cak ter ih in bawm hram hram ding in ka secang leh ka vok thau tha thawn, ran nung thisen thawn ka lo pan a si. Na veng hnen leh na khuapi a nu a pa in sawm theh awla lungawi aipung ten, hmunkhat ah rawl kan kil tlang ding" tiin an sam theu a si.